भांगरभूंय | प्रतिनिधी
उत्तर अमेरिकेंत मॅक्सिको हो देश आसा. स्पॅनीश भाशेंत ताचो उच्चार मॅहिको असो जाता. उंच दोंगर, रान, खिंड, रेंवट वाठार अशे वेग-वेगळे प्रदेश आशिल्लो हो देश. मॅक्सिकोचे उत्तरे वटेन युनायटेड स्टेट्स, दक्षीण आनी पश्चिमेक पॅसिफीक म्हासागर, दक्षीण-पुर्वाक ग्वाटेमाला, बेलीज आनी कॅरेबियन दर्या आनी पुर्वेक गल्फ ऑफ मॅक्सिको आसा. मॅक्सिको सिटी हें मॅक्सिको देशाचें राजधानी शार. मॅक्सिकोची लोकसंख्या सुमार 12.67 कोटी आसा. ह्या देशांत तेल, रुप्या, तांबे, आनी सैमीक वायूचे खूब सांठे आसात. तशेंच शेती उत्पाद तयार करपी हो म्हत्वाचो देश आसा. शेती पीक आनी हेर सैमीक संसाधनांची निर्यात ह्या देशांतल्यान युनायटेड स्टेट्स, कॅनडा सारकिल्या देशांनी जाता. तरी आसतना ग्रामीण मॅक्सिकोंतले लोक गरीब आसात.
हवामान – मॅक्सिकोच्या उत्तर, दक्षीण, मध्य अशा वाठारांनी विवीध हवामान आसा. उत्तर मॅक्सिको हो सुको आनी गरम प्रदेश. ह्या वाठारांत खूब कमी पावस पडटा. गिमाळ्यांत 50 डिग्री तापमान जाता. शिंयाळ्यांत कुलकुल्याची शीं पडटा. मध्य मॅक्सिकोंत मे ते ऑक्टोबर म्हयन्यांत पावस पडटा. दक्षीण मॅक्सिकोंत गरम तापमान आनी दमटसाण आसता. ह्या भागांत उटंगाराचो पावस पडटा आनी चक्रीवादळां जातात.
शारी जीण – मॅक्सिको सिटी, टिअवाना, एकाटेपॅक, लिओन, प्येब्ला हीं मॅक्सिकोंतलीं कांय म्हत्वाचीं शारां. मॅक्सिको सिटी हें मॅक्सिको देशाचें राजकी, अर्थीक आनी संस्कृतीक शार थारलां. ह्या शारांत सगळ्यांत चड लोकसंख्या आसा. सुमार 16 मिलियन लोक मॅक्सिको सिटींत रावतात. टिअवाना हें शार मॅक्सिकोच्या पॅसिफीक दर्यादेगेर आसा. कॅलिफोनिर्या आनी युनाटडेट सिटी ह्या देशांक हें शार खूब लागीं आसा. ते खातीर ह्या शारांतली लोकसंख्या वाडत आसा. प्येब्ला हें शार पुर्वे कडल्या मॅक्सिकोचें अर्थीक केंद्र थारलां. ऑटोमोबायल, मॅटल उत्पादन आनी हेर म्हत्वाचे उद्देग ह्या शारांत आसात.
पर्यटन – मॅक्सिकोंतले चडशे लोक पर्यटन वेवसायाचेर निंबून आसात. पॅसिफीक म्हासागर आनी कॅरेबियन दर्यादेगेक लागून मॅक्सिकोंत जायत्यो दर्यावेळो आसात. इतिहास आनी संस्कृतायेचें मिश्रण आशिल्ल्या ह्या देशाक हजारांनी पर्यटक भेट दितात. तुलूम, प्लाया देल कार्मन, माझात्लान ह्यो कांय फामाद दर्यावेळो. मॅक्सिकोंतलो पोरणो सांस्कृतीक इतिहास सांगपी वॅडलहारा, सां मिगेल दे
आलियांदे, वाहाका ह्या थळांक पर्यटक भेट दितात.
संस्कृताय – मॅक्सिकोचे संस्कृतायेचेर स्पेनाचे संस्कृतायेचो परिणाम जाल्लो दिसता. स्पॅनिशांनी ह्या देशाचेर 300 वर्सां राज्य केल्ल्यान, युरोप आनी लॅटीन अमेरिका हाच्या संस्कृतायांचें मिश्रण मॅक्सिकोंत मेळटा. मॅक्सिकोंत 62 परस चड देशी भाशा उलयतात. पूण चडशे लोक स्पॅनिश भाशा उलयतात. ‘डे ऑफ द डॅड’ म्हणल्यार मेल्ल्या मनशाचो दीस हो मॅक्सिकोंतलो सगळ्यांत म्हत्वाचो उत्सव. वर्सांतल्यान एक फावट मेल्ल्या मनशाचो आत्मो परत येता आनी आपल्या मोगाच्या मनशांक मेळटा अशें हे लोक मानतात. ह्या दिसा खास जेवण तयार करतात आनी मेल्ल्या मनशाक फुलां, मेणवाती ओंपतात.
खाणां-जेवणां – मॅक्सिकोंतलीं खाणां-जेवणां पुराय संवसारभर प्रसिद्ध जाल्यांत. पारंपारीक पद्दत आनी आधुनीकतायेचें मिश्रण करून तयार केल्लीं खाणां ल्हानांक तशेंच व्हडांक खूब आवडटात. मको, आवाकाडो, तोमात, वनिला, कणंग, फुगी मिरसांग हे पदार्थ मॅक्सिकोंतल्या खाणांनी वापरतात. आल्फाहोरेस (सॅण्डविच कुकी), चुरोज, मार्गरिटा पाय, डुलसे दे लेचे (कॅरमल सॉस), फ्रूट पॉप्सिकल्स हे सारकिले गोड पदार्थ मॅक्सिकोंत फामाद आसात. चिलाकिलेस, दिस्कादा, टाकोज, बरिटोज, केसडिया हीं हेर खाणां-जेवणां मॅक्सिको तशेंच भारता सयत हेर देशांनी मेळटात.
स्नेहा सबनीस
9923633789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
