सरभोंवतणी

भांगरभूंय | प्रतिनिधी

० श्रावण म्हयन्या निमतान फाल्यां आयतारा 27 ऑगस्टाक गाड परिवार श्री गाडपुरूश वंश देवस्थानांत गावकारवाडा चव्हाट्यार श्रावणी आयताराची पुजा घडोवन हाडल्या. ह्या निमतान धर्मीक विधी जातले. तशेंच भजन, गोंधळ नाच, गवळण आनी आरती हो कार्यावळी जातल्यो.

० गोमंतकीय विश्वकर्मा मनु- मय (च्यारी) ब्राह्मण समाजाचो विश्वकर्मा समाज उत्कर्ष मेळावो आयतारा 27 ऑगस्टाक सकाळीं 9.30 वरांचेर फर्मागुडीच्या गोपाळ गणपती सभघरांत आयोजीत केलां.

० वाळपय कीर्तन तपस्वी सर्गेस्त नारायणबुवा बर्वे श्रद्धांजली कार्यावळ, आयतारा 27 तारखेक सकाळीं 10 वरांचेर वाळपयंतल्या गोविंद काणेकार सभाघरांत.

० कुडटरेच्या श्री शांतादुर्गा चामुडेश्वरी महामाया देवस्थानांत 27 ऑगस्टाक सांजवेळार 7 वरांचेर दुसरो श्रावणी आयतार मनयतले. ते निमतान सभासद पुरस्कृत कला साधना कुडटरी वतीन ‘स्वरधारा’ ही भजन कार्यावळ जातली.

० अ. गो. साईसेवा मंडळ आनी श्री राष्टोळी साईबाबा मंदिर, मरड सांगोल्डा हांच्या जोडपावलान मंडळाच्या 200 व्या श्री साईसत्चरीत्र चक्रिय पारायण सुवाळ्या खातीर 200 यजमानां सयत आयतारा 27 ऑगस्टाक श्री राश्टोळी साईबाबा देवळांत सत्यनारायण पुजा आयोजीत केल्या.

० दिवचल सरकारी प्राथमीक शिक्षक कॉ. ऑप. क्रेडीट सोसायटीचो 59 वो वर्धापन दीस, विद्यार्थ्यांचो भोवमान, निवृत्त शिक्षक वांगड्यांचो भोवमान आनी संस्थेची बसका 27 ऑगस्टाक सकाळीं 9 वरांचेर छत्रपती शिवाजी महाराज सरकारी शाळा संकुल, दिवचले जातली.

० श्रीकाडसिद्धेश्वर संप्रदायाच्या सिद्धगिरी गुरुकुल ट्रस्टाची बसका आयतारा 27 ऑगस्टाक सांजवेळार ४ वरांचेर उसप नानोडा- दिवचले जातली.

० म्हापशें श्री लक्ष्मीनारायण देवळांत श्रावणी सोमारा निमतान आश्विन भोबे आनी भावां वतीन 28 तारखेक सांजवेळा 7 वरांचेर ‘भक्तिरंग’ हो अभंग आनी नाट्यगीतांचो कार्यक्रम.

० दिवचल इनर व्हील क्लबा वतीन 1 आनी 2 सप्टेंबराक चवथीचो बाजार आयोजीत केला. हांतूत सजावटीच्यो वस्तू, कपडे, फराळ आनी हेर वस्तूंचे स्टॉल लावपाक एक हजार रुपया नोंदणी शुल्क घेतले. चड म्हायती खातीर मिलिंदा कामत 9822123530, लिंडा तेली 9823165054 हांचे कडेन संपर्क करचो, अशें कळीत केलां.

० कला आनी संस्कृती संचालनालच्या बरेपणान आनी इन्स्टिट्यूट मिनेझीस ब्रागांझाच्या जोडपावलान स्वररजनी वतीन ‘मै केवल तुम्हारे लिये गा रही हुं’ ही कार्यावळ 3 सप्टेंबराक सांजवेळा 6 वरांचेर आयएमबीच्या सभाघरांत जातली.

० सांखळे रवींद्र भवना वतीन दिवचल आनी सत्तरी तालुको मर्यादीत “घुमट आरती” सर्त 10 सप्टेंबराक जातली. ही सर्त रवींद्र भवनांत सकाळीं 10 वरांचेर जातली. पयलीं येवपी फकत 10 पंगडाक प्रवेश मेळटलो.