….आनी शिक्षिकेन त्या भुरग्याक मारपाक सांगलें.
भांगरभूंय | प्रतिनिधी
उत्तर प्रदेश, खबरां संस्था ः उत्तर प्रदेशांतल्या मुजफ्फरनगरांतले एके शाळेंत एक विचित्र घडणूक घडली. एके शिक्षिकेन वर्गांतल्या एका मुसलमान विद्यार्थ्याक सगळ्यां मुखार उबो केलो आनी वर्गांतल्या उरिल्ल्या विद्यार्थ्यांक एक- एक करून मुखार येवन ताचेर थापट मारपाक सांगलें.
हे घडणुकेचो व्हिडियो व्हायरल जाला. तातूंत शिक्षिका वर्गांतल्या मुसलमान विद्यार्थ्यां विशीं दुस्वास निर्माण करता अशें दिसता. तिणें मुसलमान धर्माचेर वादग्रस्त विधान केल्ल्याचेंय आयकूंक येता. सरकारी अधिकाऱ्यांच्या म्हणण्या प्रमाण, ही धक्को दिवपी घडणूक बिरेस्तारा , 24 ऑगस्टाक मनसुरपूर पुलीस स्टेशनाचे हद्दींत खुब्बारपूर गांवांतले शाळेंत घडली. शिक्षिकेचें नांव त्रिप्ता त्यागी आसून ती ते शाळेची धनी आसा. शिक्षिका आनी तिचे मालकीच्या नेहा पब्लिक स्कुलाची चवकशी पुलीस प्रशासन आनी शिक्षण खातें करता.
नेमके कितें घडलें?
शिक्षकेन मुसलमान विद्यार्थ्याक सगळ्यां मुखार उबो केलो आनी उपरांत वर्गांतल्या सगळ्या विद्यार्थ्यांक मुखार येवन ताका मारपाक सांगलें. तशेंच ह्या भुरग्यान आपल्या वाठारांत (मुसलमान वसणुकांनी) वच्चें अशें तिणें म्हणलें. शिक्षिकेच्या आदेशा प्रमाण वर्गांतल्या एका भुरग्यान त्या मुसलमान भुरग्याक रडटा आसतना लेगीत तोंडार थापट मारलें. हाचे उपरांत शिक्षिका मरपी भुरग्याक सांगता, ‘तूं अशें कितें मारता, नेटान मार.’ हाचे उपरांत आनीक दोन भुरगीं उठलीं आनी तांणीय ताचेर थापट मारलें. मागीर ती शिक्षिका म्हणटा, आनीक कोण उरला मारपाचें. आतां फाटीचेर मारात. ताचें पोले तांबडे जाल्यात.
मजगतीं, हे विशीं प्रतिक्रिया दिवपाक ती शिक्षिका मेळूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
