आतां 23 ऑगस्टाक मनयतले राष्ट्रीय अंतराळ दीस

भांगरभूंय | प्रतिनिधी

बंगळुरू, खबरां संस्था : हाचे मुखार दरवर्सा 23 ऑगस्टाक हो राष्ट्रीय अंतराळ दीस म्हूण मनयतले. आमचे युवा पिळगेक सदांच विज्ञान- तंत्रज्ञानाची प्रेरणा मेळची म्हूण हो निर्णय आमी घेतला, अशें प्रधानमंत्री नरेंद्र मोदी हांणी सांगलें.
चांद्रयान – 3 मोहीम यशस्वी जाल्ल्यान जायत्या भारतीयांच्या मनांत अंतराळा विशीं उमळशीक तयार जाल्या. आतां हजारांनी भुरगीं खगोशस्त्राचो अभ्यास करपाक उत्सुक आसात. हे फांटभूंयेर श्री. मोदी हांणी ही घोशणा केल्या. ते आयज इस्रोच्या विज्ञानिकां कडेन उलयताले.
भारतांतलीं भुरगीं विज्ञानिकां मदीं आपलो फुडार पळयता. ताका लागून तुमी चंद्राचेर फक्त तिरंगो हुबोवंक नात, तर व्हड येश जोडलां. भारतीय पिळगी तंत्रज्ञान, विज्ञानान भारावन गेल्या. ताका स्पेस मिशनाचें येश जापसालदार आसा. मंगलयान, चांद्रयान, गगनयान हाका लागून युवा पिळगेचो उत्साह वाडला. तुमी भारतीय भुरग्यां मदीं आकांक्षाचें बीं रोयलां. तें फाल्यां रुख जातलें, असो विस्वास श्री. मोदी हांणी उक्तायलो.
ज्या जाग्याचेर चांद्रयान देंवलें, ताका आयच्यान ‘शिवशक्ती’ ह्या नांवान वळखतले. तशें चांद्रयान – 2 चें ज्या जाग्याचेर पावल पडिल्लें ताका ‘तिरंगा’ नांव दिलां, अशी घोशणाय श्री. मोदी हांणी केली. हो तिरंगा पाँयट आमकां शिकवण दितलो की खंयचेंय अपेस हें निमाणे नासता. जर दृढ इत्साशक्त आसत, तर येश मेळटात, अशें तांणी सांगलें.

मोदी जाले भावूक

हांव सामको सकाळ फुडें तुमकां मेळपाक आयलों, तेन्ना तुमची अडचण जाली आसतली. पूण भारतांत पावल दवरतकच म्हाका शक्य तितले बेगीन तुमच्या दर्शना खातीर येवपाचें आशिल्लें, अशें सांगतना प्रधानमंत्री मोदी हांचो गळो भरून आयलो. तुमकां सगल्यांक सलाम करपाचो आशिल्लो. तुमच्या कश्टाक सलाम, तुमच्या धिटायेक सलाम, तुमचे निश्ठेक सलाम, तुमचे हिंमतीक सलाम, अशें श्री. मोदी हांणी भरिल्ल्या आवाजांत म्हणलें तेन्ना सभाघर भावूक जालें.