जेनेरिक वखदां विशींचो निर्णय तात्पुरतो स्थगीत
भांगरभूंय | प्रतिनिधी
नवी दिल्ली, खबरां संस्था ः राष्ट्रीय वैजकी आयोगान (एनएमसी) दोतोरांक फकत जेनेरिक वखदां दुयेंतींक दिवपाचे आदेश दिल्ले. पूण आतां एनएमसीन हो निर्णय स्थगीत दवरला. दोतोरांचो दबाव आयले उपरांत आतां जेनेरिक वखदां वांगडाच हेर वखदांय दिवपाक मेळटलीं अशें स्पश्ट केलां. बंदी काडले उपरांत आतां दोतोरांक जेनेरिक वखदां तशेंच हेर ब्रँडेड वखदांय दुयेंतींक बरोवन दिवपाक मेळटलीं.
एनएमसीन 2 ऑगस्टाक जारी केल्ल्या आदेशा प्रमाण, खाजगी दोतोरांक फकत जेनेरिक वखदां दुयेंतींक दिवचीं पडटालीं. ह्या आदेशाक खाजगी दोतोर आनी इंडियन मेडिकल असोसिएशनान खर विरोध केलो. इंडियन मेडिकल असोसिएशन आनी फेडरेशन ऑफ रेसिडेन्ट दोतोर असोसिएशनान केंद्रीय भलायकी मंत्री मनसुख मांडविया हांचे कडेन चर्चा केली, उपरांत एनएमसीन निर्णय फाटीं घेतलो.
भारतांत जेनेरिक वखदांचो दर्जो बरो ना अशें दोतोर सांगतात. ताचो वापर केल्यार दुयेंतीच्या जिवाक धोको निर्माण जावंक शकता. जेनेरिक वखद खंयच्याय ब्रँडेड वखदां परस सवाय आसता. हाका लागून दुयेंतींक उणो खर्च येता.
आरपीएम नेमावळ 2023 प्रमाण दोतोरांक चड जतनाय घेवपाक सांगलां. खासा करून ब्रँडेड जेनेरिक वखदां म्हळ्यार ज्या वखदांचो पेटंट कालबाह्य जाला वा पेटंट सोंपला, ब्रँड नांवान बाजारात विकतात. हीं वखदां खंयच्याय पेटंट वखदां परस उण्या मोलाचीं आसतात. ब्रँडेड वखदां म्हारग आशिल्ल्यान पालिका म्हामंडळांनीय जेनेरिक वखदां वापरपाचो निर्णय घेतला. गरीब मनशाक ब्रँडेड वखदांचो उपचार परवडना. देखूनच जेनेरिक वखदांक मान्यताय मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
