भांगरभूंय | प्रतिनिधी
आदल्या तेंपार आमच्या पुर्वजां कडेन घडयाळ आनी रेडियो ह्यो वस्तू नाशिल्ल्यो. हाताच्या बोटांचेर मेजपा इतल्या लोकांच्या घरांत ह्यो वस्तू दिसताल्यो. आमच्या पुर्वजांक वाड्या वयल्या कोंब्यान साद घालो, कावळ्यांची कांवकांव, सुकण्यांचो किलबिलाट, इगर्जेची घांट आयकूंक आयली काय सकाळ जाली हाचो अदमास येतालो.
फांतोडेंच्या निळ्या- काळश्या मळबांत तांबसो रंग शिंवरीत सकाळ उदेंताली. सुर्य ल्हवू ल्हवू वयर येतालो. मागीर आंथरुणा वयले उठून सगले आपल्या सदच्या कामांक सुरवात करताले. बांयचें उदक काडून तोंड धुंवप, चूल पेटोवप. घरांत तयार केल्ली च्या आनी भाकरी खावन आपल्या कामांक वताले. स्वता कुळागर, आंबो, काजू बागायत, पोरसूं लायताले. तरातरांची भाजी, फळां घरचे घरा मेळटालीं. आपल्या कुटुंबा वांगडाच लोकांचेंय पोट भरताले, आमचे पूर्वज.
सुर्य तकलेर आयलो काय इगर्जेची घांट वाजताली. बारा जालीं हें रोखडेंच कळटालें. लागींच्या देवळांत शेनाय, चौगुडो वाजलो काय दनपरां साडेबाराच्या आरती देवळांत जाता, हें तांकां अचूक कळटालें. हातांत घडयाळ ना, म्हूण कोण केन्ना आडखळ्ळो ना. जशीं जशीं सुर्याचीं किरणां मोव जायत वतात, तशी तशी सांजवेळ जाता हें सुकण्यांक रोखडेंच गमता. ते आपल्या घोंटेराचे दिशेन उडटात. गाय वासरा वांगडा गोठ्यांत वता. हाचे वयल्यान मनशाक सांजवेळ जायत आयला तें समजता. आपुणय हातांत घेतिल्लें काम बेगीन सोंपोवन घरा वचुया, अशें ताका दिसता. तिनसांजचो देवघरांतलो लामणदिवो, तुळशी मुखार पणटी पेटली काय तिनसांजेची सुलूस लागताली. रातच्या वेळार आंगणांत बसून कुटुंबा वांगडा केल्ल्यो गजाली, असो दिनक्रम घडयाळाच्या काट्याक पळयनासतना वेवस्थीत चलतालो. सगलीं कामां करप, कश्ट करून पयसो मेळोवप हें तांचे कडल्यान शिकप. आपले जमनींत, शेतांत लागवड करप…. तांची जीण म्हणजेच एक घडयाळ. जाका दोन काटे. मिनीट आनी सेकंदाचो.
सिद्धी तिळवे
9158200950
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
