भांगरभूंय | प्रतिनिधी
श्रा वण म्हयनो चलता.हिंदू धर्मांतलो हो सगळ्यांत शुभ, पवित्र म्हयनो. श्रावण म्हणल्यार गोडशांच्या घमघमाटान भरिल्लो सैम. श्रावण म्हणल्यार उजवातीच्या परमळात परजळपी म्हयनो. शिरत्यांच्या हातार जेवणाची गरमसाण फांकोवपी हो म्हयनो. श्रावण म्हणल्यार कवितांचो शिंवर करपी. बायलांचो आंबाडो फुलांनी सजोवपी, फांतयो, हार, पड, झेल्यांक एकठांय गुथपी हो फुलकार म्हयनो.
खरेंच श्रावण म्हणल्यार सैमाची व्हडवीकाय वाडोवपी. नवें रूप, नवें तेज, नवे रंग आमच्या भावविश्वांत, वातावरणांत भरपी हो एक कलाकार. मनशांक आनी देवांक लागीं हाडपी म्हयनो. एका नास्तिक मनशाचें सुद्दां मन बदलून उडोवपी हो म्हयनो. गणपतीच्या आगमनाचे स्वागत म्हणल्यार श्रावण. चवथीची पूर्व तयारी म्हणल्यार श्रावण. ज्या सोरपाक आमी सदांच भितात ताका दैवत्व दिवपाचो हक्क म्हणल्यार श्रावण. नागाक नवे चैतन्य दिवपी हो श्रावण. सोरपाक हरशी भिवपी कितलेशेच लोक देव देव करीत नाचूंक लागतात, ते ह्याच म्हयन्यांत. अशे तरेन जीविताच्या दर एका कणांत देवत्व भरपी म्हणल्यार श्रावण म्हयनो. अश्टम, सुतापुनव अशे तरातरांचें सण, परबो वांगडा घेवन येवपी हो म्हयनो.
श्रावण हो गोडशांचो म्हयनो. तरेतरेच्या पक्क्वानांनी घराक परजळावपी हो म्हयनो. पातोळयो, मुटले, पायस, मणगणे आनी हेर गोडश्या खाणांचो गंध पसरावपी असो हो श्रावण. वर्सभरांत चुकूनच शिजतात, तीं खाणां, पक्वांन्ना शिजोवपी हो म्हयनो. जिबेक रूच हाडपी, काळीज थंडावपी असो हो म्हयनो. फुलांचो बहर, सातातोन, जायांच्या पडाचो हो म्हयनो. धर्तरेक पावसान भिजोवपी, जिण फुलोवपी, सवायशिणीचो हो म्हयनो. दरएकल्या मनशाच्या भावर्थाचो. हे श्रावणातले दीस जावन आसात भक्तीचे. देव आनी भक्ताच्या सांगाताचे. दरेक दीस पुजेचो, वेगवेगळ्या दिव्यांचो, प्रसादाचो. वेगवेगळ्या रुचीच्या जिन्नसांचो जिबेर संगम घडोवपी हो म्हयनो. देवाचेर मनशाचो भावार्थ, विश्वास, आपुलकी वाडोवपी हो म्हयनो.
श्रावण म्हणल्यार मनशांक एकवटाचो संदेश दिवपी गुरुच म्हणपाचो. परब्या निमतान पयस पयस आशिल्ले सोयऱ्या धायऱ्यांक, एकाच घरातल्यांक एकठांय हाडपाचो संयोग जुळोवपी हो संयोजक. केळीचे शिरतेर पक्वानांचो घमघम, तातूंनूच शिंवर पावसाचो आनी वाद्याच्या सुरांची छमछम. श्रावण म्हयनो भजनांचो, आरत्याचो. दर एका सुरांत वास्तव्य देवाचे आनी पवित्र्याचें. संगीताचो चंवर फाकोवपी हो म्हयनो. श्रावण जाण्ट्यांचो, तरणाट्यांचो, भुरग्यांचो, बायलां, चलयांचोय.
श्रावण म्हणल्यार नुस्तेकारांक नवी उर्बा, नवी स्फूर्त दिवपी हो खीण. हो म्हयनो आसा स्वातंत्र्याचो, शूरविरांचो. भावा भयणीच्या अतूट बंधनाचो हो म्हयनो. राखी भावाच्या हक्काची, गवाय दिता गोड नात्याची. मनशाच्या भावविश्व, यादी गिरेस्त करपी हो म्हयनो. असो हो श्रावण सगळ्यांक बरी भलायकी दिवं, इतलेच देवा लागीं मागणे. “नाका कसली चिंता, नाका कसलोच क्लेश, पावित्र्य फुलचें धरतरेर, हेच मागणे आसा शेष”.
शिल्पा लाड
8411007204
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
