भांगरभूंय | प्रतिनिधी
पंदरा ऑगस्ट देशाचो स्वातंत्र्य दीस येवन गेलो. ते निमतान फांतोडेर प्रभात फेरयो कोणी काडल्यो. कोणें बावटे हातांत घेवन घोशणा दीत व्हड व्हड मिरवणुको काडल्यो. त्यो पळोवन जायत्या जाणांक देशाची याद जाली. कांय जाण बावटे घेवन उमेदीन मिरवणुके भितर वांटेकार जाले. तांकां आमी आमगेल्या देशा विशींची लागणूक पावयली. ही धाधोसकाय जाल्ली पळोवपाक मेळ्ळी. फुडाराक 19 डिसेंबर येतलो. 26 जानेवारी येतलो. त्या दिसांनीय अश्योच मिरवणुको जातल्यो. गांवभर भोंवतल्यो. फक्त त्या दिसांनी देशाची याद काडप, आनी उपरांत ताका विसरप, बद्द फुडल्या वर्सा ते दीस परतून येतले तेन्ना देशाक याद करप! इतलें पुरतेंच ह्या अशा व्हड व्हड दिसाचें निमित्त? खरें म्हणल्यार ते दीस आमकां आमगेल्या दायजाची, लागणुकेची याद करून दितात. देशा विशीं आमगेलो मोग, निश्ठा जागयतात आनी त्या लागणुकेच्या आदाराचेर आमी देशाचे उदरगतीक हात बोट लावप! देशाचो मान आनी शान वाडोवपाक आमचे तांकीन फावो तसो आदार दिवप!
खरें म्हळ्यार जण एकलो देशाचो नागरीक हो ताचे परीन देशाचो एक आदाराचो खांबो. त्या आदाराचेर खंय तरी तागेलो देश उबो आसा, तिगून आसा ही जाणविकाय जल्मभर करून दिवपी हे दीस. जण एकलो आपल्या पोटा-पाणयाचो जो कितें वावर करता तो आपलें कुटुंब पोसता. सांगताक देशाचोय फुडार घडोवपाक आदार करता. ही जाणविकाय पुराय वर्स स्वताक जावप ही गजाल हांगा मुखेल. उणेंच स्वातंत्र्य दिसा, गोंय सुटके दिसा वा गणतंत्र दिसा तरी ह्या जाणविकायेची याद जावप! हीच देशाक व्हड भेट जावं येता.
आतां जेन्ना आमी ह्यो ल्हान विद्यार्थी धरून ते पिरायेन व्हड मनीस वांटेकार जावन वाजयत-गाजयत गेल्ल्यो मिरवणुको पळयतात! तेन्ना आमकां कितें चित्र दिसता? खरें म्हळ्यार ह्या मिरवणुकांनी आमकां जायत्यो गजाली अपेक्षीत आसतात. देखीक तातूंत आस्पाविल्ल्या भुरग्यांचें जावं जाण्ट्याच्या मनाकाळजांत देशप्रेम-देशभक्ती भरिल्ली दिसची. मिरवणूक उलगले उपरांतची वेळ सोड! निदान देशाच्या नांवान जावपी मिरवणुकेच्या कार्यकाळांत तरी आचरणांत, वागण्यांत शिस्त दिसची. उणेंच तें भान तरी आसचें. मिरवणुकी भितर वांटेकार जाल्ले मनीस थोडे जरी शिस्ती भायर वागले जाल्यार ते मनाक खटकताच.
पयलींच्या तेंपा सावन देश, देशभक्ती ह्या संबदान आमकां फावो ते धडे-देखी मेळूंक नात. नवे पिळगेकूय आमी आयज तेच वाटेन व्हरतात. देशप्रेम, देशभक्ती ह्यो गजाली त्या दोन-तीन दिसां पुरत्योच उपलब्ध आसतात? पुराय वर्सभर आमकां त्यो सोदून लेगीत सांपडनात अशी आमगेली गत जाल्या. देशप्रेम, देशभक्ती जण एकाच्या काळजांत भरिल्ली आसा. पूण योग्य मार्गान वा आदारान ती प्रदर्शीत करून आत्मसमाधान भोगपाक वाट ना. अशी शी आयज प्रत्येक देशवासियांची गत जाल्या.
तुमचो आमचो जण एका नागरिकाचो देशाच्या कायद्या कडेन दीसपट्टो प्रत्यक्ष संबद हो येताच. चडशे येरादीरचे नेम पळटना ते कायदे लागणुकेन, निश्ठेन पाळचे परस त्या कायद्याक बगल दिवन, आडवाटेन मुखार वचपाची आमकां पुर्वापार संवय जाल्या. आपले काम जालें पुरो. उपरांत पाडपडूं ते कायदे-बियदे! पूण त्या कायद्या विशींची लागणूक पाळून जर ते आचरणांत हाडले जाल्यार! तीच एक देशभक्तीची देशा विशींच्या मोगाची एक देख जाता. ल्हानशीं आसूं! तातूंतल्यान स्वता कितें तरी शिकता. सांगताक हेरांकूय स्वताची देख मेळटा! आयचो हो मायकोव्हेव तेंप मनीस आयज देशा विशीं अदीक एकसुरो जावपाचे वाटेन चालत आसा. कित्याक आनी कोणाक जाय तें देशप्रेम, देशभक्ती? आपूण बरो आपली मोबयलांत घुस्पल्ली जीण बरी अशें संकुचीत जाल्ल्या जिणेच्या मळार कोणे कोणाक सांगप ह्यो गजाली!
मिरवणुको जातात. देशाच्या नांवान आड्डून आड्डून घोशणाय आमी दितात. सामुहीक झेंडा वंदन जाले उपरांत त्या मिरवणुकांची सांगताय जाता. सामुहीक राष्ट्रगान जाता. चॉकलेटीचो प्रसादय मेळटा. उपरांत राष्ट्रभक्तीन, राष्ट्रप्रेमान भरिल्ली तीच तीच भाशणां आयकुचीं पडटात. जण एकल्याक आस्त, केन्ना काय ह्या भोगवळीच्या संकश्टांतल्यान भायर सुटूंक मेळटलें?
आतां ही एक खरे मिरवणुकेची गजाल सांगता, ती मिरवणूक जाले उपरांत तिची सांगता कशे भशेन आनीक खंय जाली ती हांवें पळयल्या. देखून तुमकां ती सांगन अशें दिसता. हांगासर कोणाचेंच देशप्रेम, निश्ठा हांचो अपमान करपाचो म्हजो हेतू ना. देशाच्यो बकत्शायो, फकांडांय करपाची तर नाच्च ना. देशाच्या स्वातंत्रतायेच्या मिरवणुकेच्या नांवान हे अशेय प्रकार घडटात तें पळोवन वायट दिसलें. स्वताचीच लज जाली. पूण त्यो गजाली देशभावा सामकार हाडेल बगर दुसरो बरो उपाय ना अशें दिसलें. देखून कवितेच्या रुपांत ती मुखार हाडटां…
घेवन बावटे खांदार
नेटान बसून गाडयेच्या टॉपार
गेल्ले ते मिरवणुकेक स्वातंत्रतायेच्या
फांतोडेर सावन आड्डून आड्डून सराटून
घोशणा भारतमातेच्या नांवार
आनीक गाळी-फस्ती आशी-कुशीक
चलतल्यांच्या नांवार!
एकदांची सोंपली मिरवणूक
आतां उरल्या भोगावळ झेंडो हुबोवपाची
तरिपूण “टायट” उबे रावचें पडटा जनगण मनाक..
एकमेकाक तिरश्या दोळ्यांनी पळयतात
कोण खरोच म्हणटा राष्ट्रगीत काय करतात बकत्शायो
सगलें चल्लां देशाच्या स्वातंत्र्याच्या नांवार
सोंपली भोगावळ, पूण उरला बावटो हातांत
तो आयज तरी खंयच पडपाक जायना
वरां जायत आयल्यांत बारा- तरिपूण झेंड्याचे धंगण आसा
मिरवणुकेन सगले पावले बार्रार
हें आनी नवें कितें, आंग काडलें बारकारान
सगल्यांक लायनींत उबे केले बार्रा मुखार, बावट्या सयत
एक एकल्याक मेळटलें तुमच्या वांट्याचें
कोणा- कोणाक कितलें दिलां, ताचो हिशेब कळपाक
ही हांगा लायन केल्या
“जालें रे जनगणमन” लायनींत रावून बेजारिल्ल्यान म्हणलें
म्हजें सोंपले रे! एकलो आड्डलो वाटेक लागलो
आतां आमगेलो नंबर केन्ना येता पळोवया
प्रसाद घेवन अंदूंचो पंदरा ऑगस्ट सोंपोवया
महेश पारकार
9420768518
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
