भांगरभूंय | प्रतिनिधी
केरी-सत्तरी: सांखळी कोंकणी सेवा केंद्र ही संस्था आपलो वर्सावळीचो ‘शंकर भांडारी यादस्तीक’ सुवाळो अंदूं 27 ऑगस्ट दिसा मनयतली. ह्या सुवाळ्याक मुखेल सोयरे म्हूण मुख्यमंत्री डॉ. प्रमोद सावंत हाजीर रावतले. जाल्यार मानाचे सोयरे म्हूण उद्देगपती अवधुतबाब तिंबलो हाजीर रावतले.
जाल्यार कोंकणी लेखक आनी संघटक अनंत अग्नी मुखेल उलोवपी आसतले. सांखळेची नगराध्यक्षा रश्मी देसाय ह्या सुवाळ्याची खाशेली आमंत्रीत आसतली.
ह्या सुवाळ्याक दिवचल म्हालांतले एक दानशूर भांगरा-रुप्याचे वेपारी सतीश माशेलकार हांचो ह्या वेळार भोवमान जातलो.
ह्या वर्सुके कार्यावळींत गोंय राज्य आनी म्हाल पांवड्यार धावी आनी बारावेच्या परिक्षांनी कोंकणी विशयांत चडावत गूण मेळोवपी विद्यार्थ्यांचो इनामां भेटोवन भोवमान करतले. अंदूं धावेचे परिक्षेंत राधा प्रदीप काकोडकार आनी बारावेचे परिक्षेंत दिप्तम राजेंद्र पै वैद्य हे विद्यार्थी गोंयांत कोंकणी विशयांत पयले आयल्यात.
ही कार्यावळ वयर उल्लेख केला त्या दिसा सांजवेळा 3.30 वरांचेर सांखळेच्या दादा बोरकार यादस्तीक सभाघरांत जातली, आनी ती सगल्यां खातीर उक्ती आसतली अशें केंद्राचे सचीव प्रा. रघुदास तारी हांणी कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
