भांगरभूंय | प्रतिनिधी
फ्रान्सीस फर्नांडीस: कामाक्षी उच्च माध्यमिकांत देशभक्ती गीत सर्तीचें उक्तावण
फोंडें: ल्हान पिरायेंतूच भुरग्यां मदीं देशभक्तीची भावना जागृताय करून ताचे वाडी खातीर देशभक्ती गितांची सामकी गरज आशिल्ल्याचें उलोवप कामाक्षी उच्च माध्यमीक विद्यालयाचे आदले प्राचार्य फ्रान्सीस फर्नांडीस हांणी केलें.
कुर्टी हांगासरल्या कामाक्षी उच्च माध्यमीक विद्यालयांत सर्गेस्त सनत नायक यादस्तीक आंतर शालेय देशभक्ती गीत सर्तीच्या उक्तावण सुवाळ्याक मुखेल उलोवपी ह्या नात्यान फर्नांडीस उलयताले.
सुरवेक अर्था सावंत, वैष्णवी सावंत, दिवीका पालकार, कशीश नायक हांच्या नाचान कार्यावळीक सुरवात जाली. पालक आनी शिक्षक तेच प्रमाण एकंदरीत समाज देशा खातीर तन्मयतायेन आनी तत्परतायेन कार्यरत रावल्यार भारत हेर देशां परस एक पावल मुखार वतलो हातूंत दुबाव नाशिल्ल्याचें फ्रान्सीस फर्नांडीस हांणी मुखार उलयतना म्हणलें.
ह्या वेळार संस्थेचे अध्यक्ष विनायक सदा नायक, उपाध्यक्ष उल्हास गाड केरकार, संस्थेचे भांडारी प्रकाश नायक, ज्येश्ठ शिक्षिका सुरेखा संजय नायक, सर्तीचे परिक्षक आश्विनी जांबावलीकार आनी अक्षय नायक माचयेर हाजीर आशिल्ले.
भारत देश हो संदींचो देश आसा. दरेक विद्यार्थ्याक आयोजकां कडल्यान ज्यो संदी उपलब्ध आसात त्या संदींचो पुरायेन फायदो घेवन जिणेंत वेगळ्या मार्गान मार्गक्रमण करप गरजेचें आशिल्ल्याचें संस्थेचे अध्यक्ष तशेंच सनत विनायक नायक चेरिटेबल ट्रस्टाचे मुखेल ट्रस्टी विनायक नायक हांणी म्हणलें.
फाटलीं 24 वर्सां कामाक्षी उच्च माध्यमीक विद्यालया वतीन आंतरशालेय समुह देशभक्तीगिताचें आयोजन करतात. ह्या वर्सां वट्ट 22 पंगडांनी हे सर्तींत वांटो घेतलो. हे सर्तींत कवळेंच्या लोकमान्य टिळक माध्यमीक विद्यालाक पयलें इनाम फावो जालें. जाल्यार वागळे हायस्कूल मंगेशीक दुसरें, आरपीआरएस हायस्कुलाक तिसरें. जाल्यार उमेद वाडोवपी पयलें इनाम सरस्वती हायस्कूल कवळें हांकां मेळ्ळें. दुसरें आयव्हीबीडी हायस्कूल ढवळी, तिसरें महात्मा गांधी हायस्कूल गावणें, चौथें आल्मेदा हायस्कूल फोंडें जाल्यार पांचवें शारदा इंग्लीश हायस्कूल दुर्भाट हांकां फावो जालें.
सर्तीचे संयोजक म्हूण प्रा. निशा चेरियन हांणी काम पळयलें. निवेदन वरदा गाड केरकार हांणी केलें. जाल्यार उपकार सुरेखा नायक हांणी मानले. ही कार्यावळ येसस्वी करपा खातीर शिक्षक आनी हेर कर्मचाऱ्यांनी हातभार लायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
