भांगरभूंय | प्रतिनिधी
गजाल कोवीड काळांतली. आपल्या आवय- बापाय वांगडा एका हाॅस्पिटलांत कॅन्सर दुयेंतींक जेवण वांटपाक गेल्लें तेन्ना आकर्षणा सतीश हे सात वर्सांचे चलयेन थंय भुरगीं पळयलीं. तांकां पुस्तकां दिल्यार तांचें लक्ष वाचनांत घुस्पून उरतलें. तीं दुख्ख विसरतलीं अशें ताका दिसलें आनी ताणें सोयरे, लोक, इश्टां कडल्यान पुस्तकां एकठांय करपाक सुरवात केली. तातूंतल्यान आयज मेरेन ताणें स ग्रंथालयां उबारलीं. हालींच सातवें ग्रंथालय आंध्राचे मंत्री श्रीनिवास यादव हांचे हस्तुकीं सुरू केलां.
पयल्या स ग्रंथालयांत 5800 पुस्तकां आसात, सगलीं भुरग्यां खातीर. तर सातव्या ग्रंथालयांत 610 पुस्तकां आसात. तीं हैदराबाद, तेलंगण, कोईंबतूर, चेन्नय उबारल्यांत. तातूंत तेलगू, हिंदी आनी इंग्लीश भाशांतलीं पुस्तकां आसात.
आयज आकर्षणा इकरा वर्सांचें आसा. ताका हें नांव आदले राष्ट्रपती डाॅ. ए. पी. जे. अब्दुल कलाम हांणी दवरलां. आकर्षणाचो बाबा डाॅ. कलाम हांचे वांगडा काम करताले. ह्या उपक्रमाक आकर्षणाच्या आई- बाबाचो पुराय तेंको आसा. एके ल्हान चलयेन वाचन संस्कृताय रुजोवपाक एक चळवळ सुरू केली ती आदर्श अशी आसा. लोकां कडेन अशीं कितलींशीच पुस्तकां आसतात, पूण सुसज्ज वाचपघर उबारचें ही कल्पना एखाद्याकूच सुचपाक शकता.
वाचन संस्कृताय सोंपली अशें सगलेच जाण म्हणटात, मात आकर्षणा सतीशान आपले कृतीन तांकां जाप दिल्या. हीं ग्रंथालयां उबारपाक ताका तीन वर्सां लागलीं. तें सातवेंत शिकता. हीं वाचपघरां ताणें स्वता एकल्यान उबारल्यांत.
शांताराम वाघ
96234 525 53
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
