भांगरभूंय | प्रतिनिधी
भारत आनी आयर्लेण्ड ह्या पंगडां मदीं आयज माळेंतली तिसरी आनी निमाणी टी-20 मॅच जातली. पयल्यो दोनूय मॅची जिखपी भारत क्लीन स्वीप करपाचे इत्सेन मैदानांत देंवतलो. पूण, मुखेली जसप्रीत बुमरा आनी पंगड वेवस्थापन भोंवडेर एकूय मॅच खेळूंक नाशिल्ल्या खेळगड्यांक संद दिवपाची शक्यताय आसा.
29 वर्सां पिरायेचो विकेटकीपर बॅट्समन जितेश शर्माक आयज पदार्पण करपाची संद मेळुये. तो संजू सॅमसनाची सुवात घेवपाक शकता. तशेंच वॉशिंग्टन सुंदराचे सुवातेर शाहबाज अहमदाक निमाण्या इकरांत सुवात दिवपाची शक्यताय आसा. बॉलिंगे खेरीत शाहबाज बॅटींग लेगीत करता. फास्ट बॉलिंग विभागांत एक बदल जावये. प्रसिद्ध कृष्णा वा अर्शदीप सिंग हातूंतल्या एकल्याक विसव दिवन मुकेश कुमाराक संद दिवपाक शकता. आवेश खान हाका लेगीत अजून मेरेन खेळपाची संद मेळूंक ना. पूण, आयचे मॅचींत लेगीत ताका संद मेळवाची शक्यताय उणीच दिसता.
तशेंच जसप्रीत बुमराचें पुनरागमन येसस्वी थारलां. फॉर्मांत दिसपी बुमरान दोन मॅचींनी चार विकेटी घेतल्यात. तशेंच ताणें सामक्यो उण्यो धांवड्यो दिल्यात. दुसरे टी-20 मॅचींत चार ओव्हरींचे स्पेलांत एक लेगीत चवको दिवंक ना.
आंतरराष्ट्रीय क्रिकेटीक येसस्वी रितीन पदार्पण करपी रिंकू सिंगाचेर लेगीत सगल्यांची नदर आसतली. दुसरे मॅचींत ताणें 180चे स्ट्रायक रेटीन 21 बॉलांनी 38 धांवड्यो केल्ल्यो.
रवी बिश्नोई हो आयर्लेण्डाच्या बॅट्समनां खातीर कोडें जावन पडलां. फायदेशीर बॉलींग करपा खेरीत विकेटी लेगीत घेतल्यात. ह्या स्पिनरान दोन मॅचींनी खेळटना चार विकेटी घेतल्यात.
ऋतुराज गायकवाडान दुसरे मॅचींत आपले बॅटिंगे नेटार सगल्यांक प्रभावीत केला. चेपणाखाला खेळटना ताणें 43 बॉलांनी 58 धांवड्यांची खेळी केल्ली. ताणें आपले हे खेळींत कांय आकर्शक शॉर्ट लेगीत मारिल्ले.
यशस्वी जयस्वालाक सुरवातीच्या दोनूय मॅचींनी बरी सुरवात केल्या उपरांत व्हड खेळी करपाक जमूंक ना. पूण, आयचे मॅचींत व्हड खेळी करपाचो ताचो यत्न आसतलो. पयले मॅचींत 24 आनी दुसरे मॅचींत 18 धांवड्यो केल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
