कोरोनातल्यांन बरें जाल्ल्यांक मरण येवपाचो धोको
भांगरभूंय | प्रतिनिधी
भारतीय वैजकी संशोधन मंडळाचो अहवाल
नवी दिल्ली, खबरां संस्था : कोरोना म्हामारींतल्यान भायर सरता म्हणसर आनी एक धक्को दिवपी अहवाल मुखार आयला. कोविडा उपरांत बरे जाल्ल्या दुयेंतींक मरण येवपाचो धोको तीन पटींनी वाडटा, असो निश्कर्श भारतीय वैजकी संशोधन मंडळान (ICMR) काडला. तशेंच कोरोनाची लागण जाल्ल्या मध्यम ते खर दुयेंतींतल्या 6.5 टक्के दुयेंतींक एका वर्सा भितर मरण आयिल्ल्याचो निश्कर्श काडला. 31 हॉस्पिटलांतल्या 14 हजार 419 दुयेंतींचेर केल्ल्या संशोधनांतल्यान हो निश्कर्श काडला. ह्या दुयेंतींचेर एक वर्स नदर दवरिल्ली.
पोस्ट कोविड त्रास…
सप्टेंबर 2020 सावन हॉस्पिटलांत दाखल जाल्ल्या 17.1 टक्के दुयेंतींक पोस्ट कोविडाचो त्रास जाला. कोरोनांतल्यान बरे जाले उपरांत चार सप्तकां उपरांत थकवा येवप, स्वास घेवपाक त्रास जावप, दम लागप, एकाग्रताय उणी जावप अशीं लक्षणां दिसल्यार पोस्ट कोविडाची स्थिती निर्माण जाता.
ह्या अभ्यासा प्रमाण 60 वर्सां वयर आशिल्ल्या दादल्यांक डिस्चार्ज दिल्या उपरांत मरण येवपाचो चड धोको आशिल्लो. तशेंच, कोविडा उपरांतच्या फाॅलोअप वेळार वासिनाचो पयलो डोस घेतिल्ल्या लोकां मदीं मरण येवपाचो धोको 40 टक्क्यांनी उणो जालो.
दुयेंतींची जतनाय घेवपाची गरज
मजगतीं, ह्या अभ्यासाचो संबंद मध्यम ते खर दुयेंतींच्या मरणा कडेन आसा. आयसीएमआर कडेन संबंदीत आशिल्ल्या वरिश्ठ अधिकाऱ्यान सांगलें, हो निश्कर्श सौम्य संसर्ग आशिल्ल्यांक लागू जावचो ना. कोरोना वांगडा हेर दुयेंत आशिल्ल्या दुयेंतींक कोविड मरण जावपाचो धोको शक्य आसा अशें तांणी फुडें सांगलें. हाचो अर्थ यकृत सिरोसिस आनी मूत्रपिंड दुयेंस आशिल्ल्या लोकांनी चड जतनाय घेवपाची गरज आसा. चड काळ दाह, जायत्या अवयवांचे लुकसाण, कोरोना संसर्गाक लागून फुफ्फुसांचो विकृतताय हाका लागून हीं मरणां आयल्यांत अशेंय ह्या अभ्यासांत म्हणलां.
नव्या वेरिएंटाक लागून भिरांत
संवसारांत कोरोनाच्या नव्या वेरिएंटान लोकांचो हुस्को वाडयला. EG.5 हो एक नवो प्रकारचो कोरोना व्हायरस सांपडला आनी देशांत 50 परस चड दुयेंती मेळ्ळ्या. जाल्यार बीए. 2.86 वेरिएंट आशिल्ल्या दुयेंतीं चार देशांनी नोंद जाल्या. ह्या सगळ्यांच्या फाटभुंयेर प्रधानमंत्रीचे मुखेल सचीव पीके मिश्रा हांणी सोमारा कोविड-19 ची उच्च पांवड्यावेली बसका घेतली. “भौशीक भलायकी वेवस्था तयार करची आनी राज्यांनी इन्फ्लूएंझा सारकिल्ल्या दुयेंसांच्या केशींचेर नियंत्रण दवरचें” अशें केंद्रीय भलायकी सचीव सुधांशू पंत हांणी बसकेत निर्देश दिले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
