चांद्रयान-2 च्या ऑर्बिटान चांद्रयान-3 च्या लँडराक दिलो येवकार

भांगरभूंय | प्रतिनिधी

नवी दिल्ली, खबरां संस्था : भारता वांगडा पुराय संवसाराचें लक्ष इस्रोच्या चांद्रयान-3 हे मोहिमेचेर आसा. चांद्रयान-3 मोहिमेंतलो लँडर 23 तारखेक सांजवेळार चंद्राचेर देंवतलो. ताचे पयलीं चांद्रयान-2 न चांद्रयान-3 क येवकार दिला. चांद्रयान-2 आनी चांद्रयान-3 चो संपर्क जाल्ल्याची म्हायती इस्रोन ट्वीट करून दिल्या.
इस्रोन ट्विटा वरवीं म्हणलां, येवकार तुका इश्टा चांद्रयान 2 च्या ऑर्बिटरान चांद्रयान-3 च्या लँडराक येवकार दिलो. दोगांय मदीं संवाद प्रस्थापीत जालो. आतां लँडरा कडेन संपर्कांत रावपाचे आनीक मार्ग तयार जाल्यात. लँडिगाचें प्रक्षेपण बुधवारा सांजेवेळार 5.20 वरांचेर सुरू जातलें.
2019 वर्सा चांद्रयान-2 चें लँडर चंद्राचेर देंवतना कोसळिल्लें. पूण चांद्रयान-2 चे ऑर्बिटर चार वर्सां सावन चंद्रा भोंवतणी भोंवत आसा. चांद्रयान-2 च्या ऑर्बिटरान चांद्रयान-3 चे मोहिमे खातीर मजत केली.

मजगतीं, चांद्रयान-3 चो ‘विक्रम’ हो लँडर ताचे निमाणे कक्षेंत ( 25 बाय 134 किमी ) येसस्वीपणान स्थापीत जाला. आतां 23 तारखेक ताची देंवपाची वाट पळयता. त्या दिसा सुमार 5.45 वरांचेर चंद्राचेर देंवपाची प्रक्रिया सुरु करतले. 6.04 वरांचेर विक्रम चंद्राच्या दक्षीण ध्रुवाचेर सॉप्ट लँडींग करतलें, अशे इस्रोच्या शास्त्रज्ञांनी सांगलां.