म्हूर्त काडून दरोडो, पूण निमणे पुलिसांनी धरलेच

भांगरभूंय | प्रतिनिधी

पुणें, खबरां संस्था ः ज्योतिश्या कडल्यान गिरे आनी नखेत्रांची सुवात पळोवन नेमको म्हूर्त काडून तीन म्हयन्यां पयलीं बारामती (पुणे) शारांतल्या एका वेवसायीकाच्या घरांतल्यान एक कोटी रुपयांच्या भांगराच्यो वस्ती लुटिल्ल्यो. पुलिसांनी चवकशी करून ज्योतिश्या सयत दरोडो घालप्यांक धरले. सचिन अशोक जगधने (30, गुणवडी, बारामती), रायबा तानाजी चव्हाण (32, शेतफळ, इंदापूर), रवींद्र तानाजी भोसले (27, नीरा वाघज), दुर्योधन उर्फ ​​दीपक उर्फ ​​पप्पू धनाजी जाधव (35, जिंती, फलटण), नितीन अर्जुन मोरे (धर्मपुरी, माळशिरस) हांचे सयत दरोडो घालप्यांक म्हूर्त काडून दिवपी ज्योतिशी रामचंद्र वामन चव्हाण (४३,आंदरुड, फलटण) हाकाय अटक केल्या.
दुबावीत बारामती उद्देगीक वसणुकेंतले एके खाजगी कंपनीचे कामगार आसात, अशें पुणे ग्रामीण दळाचे अधीक्षक अंकित गोयल हांणी पत्रकार परिशदेंत सांगलें. 21 एप्रीलाक देवकाते नगरांतल्या सागर शिवाजीराव गोफणे हांच्या घरांत लुटमार करून एक कोटी रुपयांच्या वस्ती वयल्या पांच जाणांनी लुटिल्ल्यो. ह्या घडणुकी वेळार घरमालक देवदर्शना खातीर गांवांतल्यान भायर गेल्लो. दरोडेखोरांनी ताचे बायलेक मारपेट करून घरांतल्यान भांगरा- रुप्याचें अलंकार आनी रोख रक्कम मेळून एक कोटी रुपया लुटून व्हेल्ले.