भांगरभूंय | प्रतिनिधी
प णजेच्या पीपल्स हायस्कूलाक आयजय ‘सुर्लकाराचें स्कूल’ म्हणून वळखतात. हे शाळेन विद्यार्थ्यांक घडोवपाचो व्हड वावर केला. स. मंगेश फोंडू सुर्लकार हांचे फाटल्यान तांचे पूत डाॅ. जगदिश, डाॅ. विनय, धूव स्वरुपा ठाकूर हांचो शाळेचो शिक्षणीक पावंडो राखून दवरपांत मोलादीक वांटो आसा. डाॅ. विनय हे वेवसायान दोतोर आनी एक बरे नाटककारय. ताणीं कोंकणी नाटकुल्यांतल्यान जी समाजीक जागृताय केल्या ती यादींत उरपाची. हालींच ते संवसाराक अंतरले, चार उतरां तांचे यादीक.
पीपल्स संस्थापकांचे दोन पूत डाॅ.जगदिश, डाॅ.विनय, धूव स्वरुपा समाजीक लागणुकेक पाळो दिवपी. पीपल्स एज्युकेशनल ट्रस्ट ही ते लागणुकेची एक गवाय. प्राथमीक, माध्यमीक ते उच्च माध्यमीक शिक्षण एकाच पांख्या खाला हाडपाचें काम ह्या ट्रस्टान केलां. डाॅ. विनय त्या ट्रस्टाचे एक जापसालदार वांगडी म्हणून वावुरतना पीपल्स कुजिरा बांबोळे व्हरप ना असो निर्णय जालो. पीपल्साचे आधुनिक बांदावळीक तेंको दिवपा खातीर तें सदांच फुडें आसताले. शिक्षक, विद्यार्थ्यांची आडमेळीं भासाभासेंतल्यान पयस करतना ते पालक, विद्यार्थ्यां भितर भोंवपी, तांकां हांसोवपी, कार्यावळींक हजेरी लावपी.
पीपल्सा इतलेंच गोंयचे भलायके खातीर ताणीं केल्ल्या वावराची मोलावणी करूंक जमची ना. मुरगांव, वास्को सरकारी दोतोर म्हणून वावुरतना एचआयव्ही आळेबंदा हाडपा खातीर ताणीं केल्ले जागृतायेचीं फळां आयज मेळटात.
मुरगांव, वास्को म्हळ्ळ्यार पयलीं नदरे मुखार येतालें बायणा. थंय चलपी अनैतिक वेवसायांतल्यान जावपी दुयेंसां उणीं करपा पासत लोकां मदीं जागृताय करप एक व्हड आव्हान आसलें. हेर दोतोरांच्या आदारान भलायकी खातें लोकांक जागोवपा खातीर गोंयभर बसका घेतालें. लोकांक वायट दुयेंसाचीं म्हायती दिवपा पासत डाॅ. विनय हाणीं कोंकणी भाशेंतल्यान लेख, नाटकुलीं बरयलीं. कांय नाटकुल्यांक पीपल्स हायस्कूलाच्या विद्यार्थ्यां वरवी माचयेर व्हरपाचें कामय ताणीं केलें. ‘बाप्पा भजीं गाळटा’, ‘बाप्पाली गांथन’ आनी हेर बरींच नाटकुलीं भुरग्यां मेरेन, लोकां मेरेन आयजय पावोवप शक्य आसा. विनोदी नाटकांतल्यान डाॅ. विनय हाणीं कोंकणी भाशेकय नामना मेळोवन दिली. डाॅ.विनय शिक्षक नाशिल्ले, पूण नाटकुल्यांतल्यान समाज सुदारपाक लिखाणांतल्यान देखी दिवपाच्या ताणीं केल्ल्या वावराची तोखणाय जाल्या.
शारांतल्या हेर लोकांचो विरोध आसतना पेंगट बांदून बायणा लोकवस्तींत क्लिनिक उबारपाक, नितळसाणींचे म्हत्व सांगपाक डाॅ. विनय वावुरिल्ले. दुयेंतीक वखदा वांगडा आत्मविस्वास, सुविधा मेळोवन दिवपा खातीर केल्ल्या वावरांतल्यान ते सगल्यांचे ‘विनयभाई’ जाल्ले. समाजा पासत झगडपी, वावुरपी एक दोतोर म्हणून तांची याद उरची.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
