सुखाचो एक खीण पुरो

भांगरभूंय | प्रतिनिधी

आयज आमी जें आसात तें जायत्या जाणांच्या  आशिर्वादाच्या आनी मार्गदर्शनाच्या योगदानानूच .! सहज मेळटा ताचें मोल आमका  कळना. खंयचेय सृश्टीच्या फाटल्यान तप आनी कश्ट आसतातूच.

फाल्यांची खोशेन आनी उमेदीन वाट पळोवप म्हणल्यार ‘तरणाटेंपण’ आनी फाल्यां फांतोड जाली ना जाली तरी कांयच दिसना… सगलें सारकेंच अशें दिसता  जाल्यार आमी ताची व्याख्या ‘जाण्टेंपण’ अशी निर्भयपणान करतात, पूण खरें म्हणल्यार ही सगळी मनाची स्थिती अशें म्हाका सदांच खरपणान दिसता. 

आजो- आजये खातीर सगळ्यांत कंवळो मोग म्हणल्यार तांचीं नातरां. पावस पडला, पयसुल्ल्यान सुकणीं आयलीं आंगणांत उदक पियेवंक, खिणाक दोगांकय नातरांच पावल्यांत अशें दिसता… ! कुटुंब वेवस्थेक जाणवपी हें रिकामेंपण भरपाची तांकां प्रामाणीकपणान इत्सा आसता … भुरगीं आनी नातरां पयस जावप, तांचे खेद, आनी मागीर आजो- आजयेन एकामेकांक समजून घेवप सगळें भितरल्यान… अजूनय एकामेकांक लागीं आशिल्ल्या सुखाचो नियाळ घेता, जेन्ना तीं दोगांय सांजवेळा बागेंतल्या बाकड्यार शांत बसतात आनी तांचे मदीं चलपी संवाद खूब कितें सांगता… . ते थोडे सोबीत सुखाचे खीण तांची सांज सोबीत करतात… 

तोखणायेच्यो यादी ते खीन्न मन आयुश्यभर सुखी दवरतल्यो. शाळेंत इश्टां वांगडा एकठांय घालयिल्ले ते सोबीत खीण विसरूंक जायनात. त्या काळाच्यो कितल्योशोच यादी मनांत सदांकाळ उरतात. शाळेंत बाकार बसतना भेदभाव ना, मनाचें निरपराधीपण आसता. मदले सुटयेन एकामेकांले  डबे  खोशयेन खातात.  पी. टी च्या वराक सुखी खिणांचो परतून विचार करतकूच मन ताजें जाता अशे दिसता… मनाक बरें दिसता मात्शें…  मजेशीर खिणांचो नियाळ घेवन आमचें मन आमकां परतून ताजें करता…म्हणून आमच्या जिवितांत निर्माण जाल्ल्या सुखी खिणांचो वेळोवेळ नियाळ घेवप गरजेचें…. मन थोडें लेगीत उबारपा खातीर हें म्हत्वाचें.

मनांत सुख दवरपाचो यत्न करात. ते तुमकां दर दिसा सुख दितलें. आनंद आसल्यार उमेद आसता. उमेद आसल्यार मनांत सकारात्मक विचार येतात. सकारात्मक विचार आमकां यत्न करपाक प्रेरीत करतात. यत्न जाल्यार येसस्वी जावपाची शक्यताय निर्माण जाता. जंय शक्यताय आसता थंय जियेवपाक वाव आसता. संभाव्यतायेचो प्रवास उदास मनांतल्यान जावंक शकना. सुखी मन तुमकां हे शक्यताये कडेन व्हरता.

इतलीं कामां करपाचीं आसात. गरज आसा ती जिद्द दवरपाची. मनान घेतलें जाल्यार  खूब कितें करूं येता. स्वार्थ सोडलो जाल्यार व्हड व्हड गजाली साध्य करूं येतात. फकत एकदां यत्न करात. आमची खरी गिरेस्तकाय म्हळ्यार आमच्या जिवितांत येवपी लोक. जांकां लागून आमी सुखाचे खीण परतून जियेवंक शकतात. पूण आमकां तें कळना लेगीत. आमी सुखाचे सोबीत खीण एकठांय करूं येतात… आनी तातूंत सुदारणाय करूं येता. गरज पडल्यार आमी स्वताक तशेंच हेरांकय उर्बा दित रावूंक शकतात… फाल्यांचो विचार करून आयज सदांच बरें जगपाचो यत्न करचो अशें म्हाका काळजा थावन दिसता. आयज आमी जें आसात तें जायत्या जाणांच्या  आशिर्वादाच्या आनी मार्गदर्शनाच्या योगदानानूच .! सहज मेळटा ताचें मोल आमका  कळना. खंयचेय सृश्टीच्या फाटल्यान तप आनी कश्ट आसतातूच.

सुखी वृत्ती आसप म्हणल्यार तुमची उमेद वाडोवप. आमच्या जिवितांत उदासीनताय  दवरपाची ना जाल्यार आमी खुशाल, सुखी जावंक जाय. आमच्या सुखाचें घर म्हळ्यार सुखी वृत्ती. सुख हें आमकां देवान दिल्लें वखद आनी आमी तें घेतल्यार आमचें जिवीत सुखी आनी तृप्त जातलें. सैमांत, सृश्टींत जंय जंय पळयतले थंय आमकां सुख दिसतलें. मेळटलें. पूण हाचे खातीर आमी पयलीं स्वताक खुश करपाक जाय आनी हेरांक खोशी करपाक जाय. कारण खरें सुख दुसऱ्याक दिवपांत आसता, तें घेवपांत वा मागपांत न्हय. आमचें जिवीत यशस्वी करपाक जाय जाल्यार आमकां सुखी मन आसूंक जाय. मनशाच्या तोंडार शुद्ध, निर्मळ हांसो मनशाचें काळीज जिखता आनी अशा सुखी मनशाच्यो यादी हेर मनशांच्या मनांत रावतात. खरें सुख स्वताच्या यत्नांतल्यान मेळटा आनी मनशाचें जिवीत सुखी करता.

मनशाच्या जिवितांतलें सुख हें मनशाक मेळिल्लें  दैवी दान. सुखी मनीस रोखडोच स्थीर जाता. सुखाक लागून आत्म्याक बळगें मेळटा. म्हणून खंयचेंय काम हातांत घेतल्यार तातूंत सुख आसत जाल्यार तें काम सोंपें दिसता. सुख म्हळ्यार मनशाच्या मनांतल्यान निर्माण जावपी एक क्रिया. जशें दिव्यान दिवो लावपाक मेळटा, तशेंच एका मनशाच्या मनांतलें सुख जायत्या जाणांक खोशी करता.

यशस्वी जिणे खातीर सगळ्यांत पयलीं आमचें मन सुखी आनी उल्हासपूर्ण आसूंक जाय.  मनशाच्या जिवितांतलें सुख हें मनशाक  मेळिल्ली  दिव्य देण. जसो पारिजातक आपल्या सुगंधान  दुसऱ्यांक  सुगंधित करता, खोशी करता तसोच मनशाच्या तोंडा वयलो हांसो काळजाक जिखता. सुखाचो एक खीण पुरो, ताची लागवड करात… 

गौरी भालचंद्र

94223 73926