भांगरभूंय | प्रतिनिधी
खबरां संस्था
डापेस्ट (हंगेरी)ः संवसारीक अॅथेलेटिक्स सर्तीत सेगीत दुसऱ्या दिसा भारतीय अॅथेलिटांनी निर्शेणी केली. संतोष कुमार तमिलार्नसन 400 मीटर आडमेळ्याचे सर्तींत जाल्यार सर्वेश कुशारे उंच उडी प्रकारांत आयतारा पात्रताय फेरीचो आमडेळो पार करपाक शकले नात.
तमिलार्नसन 400 मीटर आडमेळ्याचे सर्तींत पात्रतायेच्या तिसऱ्या हिटांत वांटेकार जाल्लो. ताणे 50.46 सेकंद अशी वेळ दिली आनी ताका सातवे सुवातेर खोशी मानची पडली. चार हिटांतले पयल्या नंबराचे खेळगडे आनी ते उपरांत सगल्यांत बरो वेळ दिवपी चार खेळगडे उपांत्य फेरये खातीर पात्र थारले.
आशिया सर्तींत बरी कामगिरी करपी सर्वेशाक उंच उडयेंत तीन यत्नां उपरांतूय 2.25 मीटराचें आव्हान पुराय करपाक जमलें ना. पात्रताय फेरयेच्या ब गटांत सर्वेश 11वे जाल्यार वट्ट सर्तकांत 20वे सुवातेर आयलो.पात्रताय फेरयेंत 2.30 मीटर उडी मारपी वा सगल्यांत बरी कामगिरी करपी 12 खेळगडे निमणे फेरयेंत पावले.
सर्तीच्या पयल्या दिसा दादल्यांच्या 20 किमी चलपाचे सर्तींत तीन भारतीय, तीन हजार स्टीपलचेस सर्तींत अविनाश साबले, बायलांचे लांब उडयेंत शैली सिंह, तिट्टे उडयेंत प्रवीण चित्रावेल, एल्डोस पॉल, अब्दुला अबुबकर हांतूतलो एकूय खेळगडो निमणे फेरयेंत पावपाक शकलो ना. दादल्याचें 1500 मीटर सर्तींत अजय कुमारान वैयक्तीक सगल्यांत बरी वेळ दिली मात तो उपांत्य फेरयेंत पावपाक शकलो ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
