भांगरभूंय | प्रतिनिधी
-जीएसआयडीसी वरवीं पुलाचें जातलें बांदकामः फळदेसाय
पणजी : अंतर उणें आसुनूय फेरीबोटीक लागून दिवाडेकारांक पणजे पावपाक बरोच वेळ लागता. दिवाडी ते पोरणें गोंय ह्या 600 मिटर लांबायेच्या 110 कोटी खर्चाच्या पुलाक मुख्यमंत्री डॉ. प्रमोद सावंत हांणी तत्वता मान्यताय दिल्या. जीएसआयडीसी वरवीं पुलाचें बांदकाम जातलें, अशी म्हायती आमदार राजेश फळदेसाय हांणी दिली.
राज्यांत पूल वा रस्त्यांच्या व्हड प्रकल्पांक केंद्र सरकार अर्थीक मजत दिता. दिवाडी ते पोरणें गोंय पूल राष्ट्रीय म्हामार्गांत येना, तरी लेगीत केंद्राची अर्थीक मजत मेळोवप शक्य आसा. केंद्राची अर्थीक मजत मेळ्ळी ना, तरी स्वताच्या खर्चान पूल बांदपाची राज्य सरकाराची तयारी आसा.
भौशीक बांदकाम खातें तशेंच जीआयडीसीच्या अधिकाऱ्यां कडेन मुख्यमंत्री डॉ. प्रमोद सावंत हांणी चर्चा केल्या. पुलाचो आराखडो तयार करपाचो आदेश जारी जाला. पुलाचें बांदकाम तशेंच निधी विशीं मुख्यमंत्री डॉ. प्रमोद सावंत हांचे कडेन आपली चर्चा जाल्या, अशें आमदार राजेश फळदेसाय हांणी सांगलें.
हजारांनी लोकांक पोरणें गोंय ते दिवाडी पूल जाय. ह्या पुलाक लोकांचो विरोध आसचो ना. जाग्या खातीर कांय लोकांचो विरोध आसप शक्य आसा. हाचेर सरपंच, पंच चर्चा करून उपाय काडटले, अशें आमदार राजेश फळदेसाय हांणी सांगलें.
दिवाडी लोकांक फेरीबोटयेक लागून पणजे पावपाक कळाव जाता. पावसांत फेरीबोटीचो प्रवास धोकादायक थारपाची शक्यताय आसता. सकाळीं आनी सांज वेळार वराचीं वरां रावचे पडटा. हाका लागून हो पूल गरजेचो. आराखडो तयार जावन म्हयन्या भितर निविदा जारी जातली, अशें तरेन हालचाली सुरू आसात.
एएसआयच्या एनओसीक लागून कळाव शक्य
पुलाच्या बांदकामाक भारतीय पुरातत्व खात्या (एएसआय) कडल्यान ना हरकत दाखल्याची गरज आसा. पोरणें गोंय न्हंय कुशीच्या वाठारा लागी इतिहासीक बासिलिका चर्च आसा. बासिलिका चर्च हे संवसारीक दायज थळ आशिल्ल्यान एएसआयच्या ना हरकत दाखल्याची गरज बांदकामांक लागतली. हे विशीं लेगीत चर्चा जाल्या. केंद्र सरकारा कडेन चर्चा करून एनओसीचो प्रस्न सुटावो करचो पडटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
