भांगरभूंय | प्रतिनिधी
भांगरभूंय । खेळां मेज
पणजीः गोंय क्रिकेट असोसिएशनाच्या नियोजीत सुसज्ज क्रिकेट स्टेडियमाक लागून सगल्या पिरायेच्या खेळगड्यांक क्रिकेट कुशळतायेक फावो ती दिका मेळून तांकां वांव मेळटलो. सध्या जाय तश्यो सुविधा नाशिल्ल्यान आडखळपी खेळगड्यांक ह्या स्टेडियमाचो आनी गोंयच्या क्रिकेट इकोस्टमीक लाब जातलो अशें गोंयचो आदलो रणजी खेळगडो सुरेश महादेवन हाणे सांगलें.
विराट फॅक्टरीचो एक वांटो आशिल्ल्या ए अॅण्ड एन स्पोर्ट्स ह्या क्रिकेट साधनांच्या पणजेंतल्या विक्री केंद्राच्या उक्तावण कार्यावळीत महादेवन उलयतालो. गोंयांय हुशार खेळगड्यांचो उणाव ना. मात मुळाव्यो सुविधा नाशिल्ल्यान पंगड तयार जावपाक शकनात. स्टेडियम जातगीर फकत रणजी खेळगड्यांकूच न्हय जाल्यार सगल्या खेळगड्यांक थंयच्या सुविधांचो लाब जातलो. जीसीएक मॅची आयोजीत करपा खातीर स्वताचे स्टेडियम मेळटलें तेन्ना ती एक व्हडली घडणूक थारतली अशें महादेवन हाणे सांगलें.
क्रिकेट स्टेडियम गोंयां खातीर वरदान थारतलें. गोंयांत निमणी आंतरराष्ट्रीय मॅच 2004 वर्सा फातोड्ड्या जाल्ली. ते उपरांत क्रिकेट नियामक मंडळान जो मेरेन गोंय क्रिक्रेट असोसिएशनाचें स्वताचें मैदान जावचें ना तो मेरेन गोंयांत मॅची आयोजीत करचे नात अशें सांगल्लें अशें आदलो रणजी खेळगडो प्रशांत काकोडे हांणी सांगलें. फुडाराक गोंयांत आयपीएल आनी आंतरराष्टीय मॅची जातल्यो असो हावेस ताणे उक्तायलो.
विक्री केंद्राचो जोड संस्थापक सुश्रृत नास्नोडकारा हें केंद्र दर्जेदार साधनां खातीर सुरू केला. गोंयांत विराट सुरू करपा फाटल्यान दर्जेदार वस्तुचीं पुरवण करपा खातीर केलां अशें तांणे सांगलें. आमी नेपाळी आनी यूएई पंगड पुरस्कृत केल्यात. शिवाय कबड्डी, टेबल टॅनील लीग, खोखो खेळाक आमी उर्बां दितात अशी म्हायती ताणे दिली. वेगवेगळ्या पंगडां कडेन उलोवणी करून आमी व्हो उपक्रम सुरू केला अशें केंद्राचो जोड संस्थापक अनिश पै काकोडे हांणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
