भांगरभूंय | प्रतिनिधी
खबरां संस्था
दुबयः फास्ट क्रिकेटय्या ह्या युगांत खंयच्याय पंगडाची खंयच्याय पंगडाक हारोवपाची तांक आसता. चड करून टी-20 मॅचींत पंगड फाटीं पडल्यार पुनरागम करपाक कुस्तार जाता असोच प्रकार संयुक्त अरब अमिरातींत (यूएई) जालो आनी न्यूझिलंडाक दुसरे टी-20 मॅचींत यूएई कडल्यान हार खावची पडली. दुबय आंतरराष्ट्रीय क्रिकेट स्टेडियमाचेर जाल्ले हे मॅचींत यूएईन न्यूझिलंडाक 7 विकेटींनी हारोवन क्रिकेट मळाक अजपाचो धपको दिलो. टी-20 क्रिकेटींत यूएई खातीर हें जैत मेणल्यार व्हडले येश म्हणपाक जाय. कारणी आसीसी टी-20 क्रमवारींत न्यूझिलंड तिसरे सुवातेर आसा जाल्यार यूएई 16वे सुवातेर आसा
यूएईन पयलेच फावट टी-20 आंतरराष्ट्रीय मॅचींत न्यूझिलंडाक हारोवन इतिहास रचलो. पयलीं खेळून न्यूझिलंडान 20 ओव्हरींत 8 आवट 142 धांवड्यो केल्यो. तांचो फाटलाव करतना यूएईन 15.4 ओव्हरींत 3 आवट 144 धांवड्यो करून ही मॅच जिखली. यूएईचो कॅप्टन मोहम्मद वसीम आनी असिफ खान हांणी सामकी बरी खेळी केली. ओपनर वसीमान 29 बॉलांत 4 चौके आनी 3 सक्यांनी 55 धांवड्यो केल्यो. ह्या वेळार ताचो स्ट्रायक रेट 189.66 असो आशिल्लो. असिफ खानान 5 चौके आनी एका सक्यान 29 बॉलांत नाबाद 48 धांवड्यो केल्यो. तिसरे सुवातेर खेळपी वृत्त अरविंदान 21 बॉलांत 2 चौके आनी 3 सक्यांनी 25 धांवड्यांची म्हत्वाची खेळी केली.
पयलीं खेळटना न्यूझिलंडाचे बॅट्समन यूएईच्या स्पीन बॉलिंगे सामकार फ्लॉप थारले. मार्क चॅमपमान 46 बॉलांत 63 धांवड्याची म्हत्वाची खेळी केली. ताणे 3 चौके आनी 3 सके हुबयले. तो सोडून न्यूझिलंडाचे बाकीचे बॅट्समन अपेशी थारले. वट्ट 7 जाण दोन आंकडी धांवड्यो करपाक शकले नात. डेन क्लीव्हर शून्याचेर आवट जालो.
यूएईच्या अयान खाना 3 विकेटी घेतल्यो. ताणे 4 ओव्हरींत फकत 5चे इकॉनॉमीसयत 20 धांवड्यो दिल्यो. महमंद जावादुल्लाहान 4 ओव्हरींत 20 धांवड्यो दिवंन 2 विकेटी घेतल्यो. अली नसीर, जहूर खान आनी मोहम्मद फराजुद्दान हांणी दरेकी एक विकेट घेतली. न्यूझिलंड यूएई आट हे टी-20 माळेंत तांच्या वरिश्ठ खेळगड्यां विणे खेळटा. नियमीत कॅप्टन केन विलियमसन दुखापतीक लागून हे माळेंत वांटो घेवपाक शकलो ना. डेव्हन कॉन्वे, फिन ऍलन, डॅरिल मिशेल, आनी ईश सोधी सारके स्टार खेळगडे फ्रँचायजी क्रिकेटींत व्यस्त आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
