भांगरभूंय | प्रतिनिधी
खबरां संस्था
डब्लीनः दुसरे टी-20 मॅचींत आर्यलंडाक 33 धांवड्यांनी हारोवन जसप्रीत बुमराहाच्या भारतीय पंगडान 3 मॅचीची ही माळ 2-0 अशी आघाडी घेवंन जिखली. भारताच्या 185 धांवड्याचो फाटलाव करतना आर्यलंडाचो डाव 20 ओव्हरींत 8 आवट 152 धांवड्यांत सोपलो. ओपनर अॅण्ड्यू बॅलब्रिनीच्या (73) झुंजार खेळीक लागून भारताक जैता खातीर निमणे 20वे ओव्हरी मेरेन वाट पळोवची पडली. ऋतुराज गायकवाडान 58, संजू सॅमसनान 40 आनी रिंकू सिंगान 38 धांवड्यो करून भारताच्या जैताक योगदान दिलें.
भारतान पयलीं खेळून 20 ओव्हरींत 5 आवट 185 धांवड्यो केल्यो. येसस्वी जयस्वाल (18) आनी तिलक वर्मा (1) 34 धांवड्यांत बाद जाल्या उपरांत ओपनर ऋतुराज गायकवाड आनी संजू सॅम्पनस हांणी तिसरे विकेटी खातीर 71 धांवड्याची भागिदारी करून डाव साल्वार केलो. संजून 26 बॉलांत 5 चौके आनी एका सक्यान 40 धांवड्यो केल्यो. गायकवाडान 6 चौके आनी एक सक्यान 43 बॉलांत (58) अर्दे शेंकडो केलो. रिंकू सिंगान तीन सके आनी दोन चौक्यांनी 21 बॉलांत 38 धांवड्यो केल्यो. शिवम दुबे 16 बॉलांत दोन सक्यांनी 22 धांवड्यो करून नाबाद उरलो. बॅरी मॅकार्थीन 36 धांवड्यात दोन विकेटी घेतल्यो. मार्क अडेर, क्रेंग यंग आनी बेंजामीन व्हायट हांका दरेकी एक विकेट मेळ्ळी, गायकवाडाक मॅकार्थी आनी संजूक बेजामिन व्हायटान बोल्ड केलें.
19 धांवसंख्येचेर प्रसिद्ध कृष्णान आपले पयलेच ओव्हरींत ओपनर कॅप्टन पावल स्टर्लींग (0) आनी लॉर्कन टुकर (0) हांगा फाटोफाट आवट करून आर्यलंडाक दोन धपके दिलें. अर्शदीप सिंग आनी ऋतुराज गायकवाडान तांच्यो कॅची घेतल्यो. आर्यलंडाच्या पयल्या 20 धांवड्यांत अॅण्ड्यू बॅलब्रिनीच्यो 14 आनी अवांतर 6 धांवड्यो आशिल्ल्यो. 7 धांवड्यांचेर रवी बिष्णोयान हॅरी टॅक्टर बोल्ड केलें आनी 3 बाद 28 अशी तांची स्थिती जाली. हे उपरांत अॅण्ड्यू बॅलब्रिनीन आनी कर्टीस कॅम्परान (18) डाव साल्वार करून चवथे विकेटी खातीर 35 धांवड्याची भागिदारी केली. जॉर्ज डॉकरेल वांगडा बॅलब्रिनीन 13.5 ओव्हरींत पंगडाचो शेंकडो पुराय केलो. अर्शदीप सिंगान बॅलब्रिनीक 73 धांवड्याचेर विकेटकीपर संजू सॅम्पसना वरवी कॅच आवट केले. तेन्ना तांच्यो 123 धांवड्यो जाल्ल्यो. ताचे पयलीं जॉर्ज डॉकरेल (13) रनआवट जाल्लो बॅलब्रिनीन 51 बॉलांत 5 चौके आनी 4 सक्यांनी अर्द शेंकडो केलो. कॅप्टन जसप्रीत बुमराहान बॅरि मॅकार्थीक (2) कॅच आवट करून भारताक जैता लागीं हाडलें. बुमराहान मार्क अदायराक (23) तिलक वर्मा वरवीं कॅच आवट करून भारताचें जैत निश्चीत केलें. बुमहार, प्रसिद्ध कृष्णा आनी रवी बिष्णोय हांणी दरेकी दोन विकेटी घेतल्यो. अर्शदीप सिंगाक एक विकेट मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
