भांगरभूंय | प्रतिनिधी
खबरां संस्था
माद्रीदः स्पेनान पयलेच फावट बायलांच्या फिफा संवसारीक करंड फुटबॉल सर्त जिखली. फायनलींत तांणी इंग्लंडाक 1-0 अश्या एकसुऱ्या गोलान हारयलें. व्हो म्हत्वाचो गोल 29 व्या मिनटाक ओल्गा कार्मोनान केलो. 2011 उपरांत फिफा बायल फुटबॉलाक नवो चॅम्पियन मेळा. 2011 वर्सा जपानान पयलेच फावट व्हो करंड जिखल्लो.
दादले आनी बायलांची संवसारीक फुटबॉल सर्त जिखपी स्पेन दुसरो देश थारला. जर्मनीन हाचे पयलीं हे करंड जिखल्ले. बायलांच्या संवसारीक करंड फुटबॉल सर्तीक 1991 वर्सा सुरवात जाल्ली. हे सर्तींत चड चार फावट अमेरिकन पंगड वस्ताद थारल्लो. संवसारीक क्रमवारींत 6 नंबराचेर आशिल्ल्या स्पेनान ह्या सिझनांत फकत एक मॅच वोगडायली. ताणी सी ग्रुपांत पयली सुवात मेळोवपी जपानाक हारोवन दुसरी सुवात मेळयल्ली. ग्रूप दोनांतल्या सुरवेच्या मॅचींत स्पेनान कोस्टारिका आनी झाम्बियाक हारयल्लें. बाद फेरयेंत स्पेनान पयलीं स्वित्झलँड आनी उपांत्यपूर्व मॅचींत अतिरिक्त वेळांत नेदरलंडाक 2-1 अशें हारयल्लें.
उपांत्य मॅचींत स्पेनान स्वीडनाचेर खर संघर्शा उपरांत जैत मेळोवन फायनलींतली आपली सुवात निश्चीत केल्ली. फायनलीं पयलीं स्पेनान 17 गोल केल्ले. एताना बोनमाती, जेनिफर हर्मोसो आनी एल्बा रेडोडोन दरेकी तीन गोल केल्ले. स्पेनान 7 गोल घेतले.
संवसारीक क्रमवारींत चवथे सुवातेर आशिल्ल्या इंग्लंड पंगडान 2022 वर्सा बायलींची युरो कप सर्त जिखून फिफा संवसारीक करंड फुटबॉल सर्ती खातीर पात्र थारल्लो. फायनलीं पयलीं तांणी हाख घेतली ना. तांणी डेन्मार्क आनी चीना वांगडा ग्रूप डीत पयली सुवात मेळयल्ली. रावंड ऑफ 16त इंग्ंलडान पेनल्टी शूट आवटात नायजेरियाक हारयल्लें. उपांत्यपूर्व मॅचींत आनी उपांत्य मॅचींत तांणी दरेकी कोलंबिया आनी येजमान ऑस्ट्रेलियेक हारयल्लें. फायनलीं पयली 6 मॅचींत मिल्ली ब्रायटच्या फुडारपणा खाला इंग्लंड पंगडान 13 गोल केले आनी 3 गोल घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
