भांगरभूंय | प्रतिनिधी
हें हावसिंग सोसायटीचें कथानक प्रत्यक्ष अणभवांचेर आनी कांय काल्पनीक गजालींचेर आदारून आसा. प्रत्यक्ष जिवो वा मरण आयिल्लो मनीस, घडणूक हांचे कडेन हाचो संबंद ना. तो जुळत जाल्यार निव्वळ एक योगायोग समजुचो. – लेखक
पयस येवपी आवाज हळू हळू लागीं येत पुलिशेची गाडी आमची मिटिंग चलतल्या त्या क्लब हावसाच्या भायर येवन थांबली. (आतां मुखार….)
ॐ भूर्भुवः स्वः तत्सवितुर्वरेण्यं भर्गो देवस्य धीमहि धियो यो नः प्रचोदयात् आनी शुभंकरोती कल्याणम म्हणपी गंडभैरांव एकदम शुद्ध इंग्लिशींतल्यान गाळी दिता तें आयकून आमी थोडे अचंबित जाल्ले. आगुस्ताचो खरोच इतलो परिणाम गंडभैरांवाचेर जालो काय कितें, काय आमगेल्या कानाक कितें जालां ह्या संभ्रमात आमी पडिल्ले आनी हांवे आनीक पुरतोषांमान आमगेले फोन भायर काडीत तो प्रसंग विडिओ रेकॉर्ड करूंक सुरवात केली. जणू काय गंडभैरांव नाच ग घुमा म्हणटा …ताडीमोडी कशी मी नाचू म्हणत संबंध क्लब हाऊवसाच्या भायर भितर पासयो मारता अशें दृश आमचे नजरे मुखार दिसतालें. गंडभैरांवाले तांडव नेटार चालू आशिल्लें. तांतूंत तिणें पुलिशेक केन्ना आपयले ते आमकांय समजलेंना. हांव आनी पुरतेषांम शुद्ध इंग्लीश गाळयाचो आस्वाद घेवपाक आनी रेकॉर्ड करूंक सामके गुंग जाल्ले. श्रावणाक शिवराक जेवून जेवून एक दीस कोणेय एकदम मसालेदार तिखट कोल्हापुरी मटणाची थाळी मुखार हाडून दवरल्यार जशी गत जाता, कांयशी तशीच गत आमगेलीय त्या वेळार जाल्ली. आगुस्ता वांगडा श्रावण म्हयनोय तर तेन्ना चालू आशिल्लो.
तशें पळयल्यार खंयय कितेंय जाल्यार सुणें दाव्या पांयार कुट्ता तशें गंडभैरांवाक आनी ताडीमोडीक बारीक सारीक गोश्टीं खातीर पुलीस केशी करपाचो खूब घोस्तय आसलो. संकुलांत खुपश्या शेजाऱ्याचेर सुण्यां विशय घेवन ताणें केशी केल्ल्यो. कोणाक सोड्ले नाशिल्ले. ह्या खेप गंडभैरांव केकाटता आनी आमी विडिओ रेकॉर्ड करता ते पळोंवून ताडीमोडींक निमित्त सांपडिल्लें. आनी तिने पुलिसाक आपोवणे धाडिल्ले. सायरन बंद करून चार पुलीस गाडये भायर देंवले. तसो गंडभैरांवाल्या केकाटण्या मुखार सायरनाचो आवाज खूबच फिको दिसतालो. विशयवळेरी कुशीन उरिल्ली, चेरमेन पाषावं कांयच उलायनाशिल्लो. आमी विचारता ते, आमगॆले आक्षेप कांन मनार घेनाशिल्लो. सगळे क्लब हाऊस गंडभैरांवाल्या आवाजान घणघणताले. दादा बॉम्ब फोडिल्ले भशेन गडगडाट संकुलात जातालो.
गंडभैरांव आमचेर फौजदारी केश घालता म्हणून गजाल मारतालो. ऑडिट रिपोर्टचेर प्रस्न विचारतगेर ताका म्हजेर खुन्नस आयिल्लो. पन्नास लाखांचो घोटाळो करतात आनी पांचशी रुपयांचो हिशोब मागतात कशे अशी बॉब ताणें मारली. हो ताणें हाडिल्लो ऑडिट रिपोर्टय सारको नाशिल्लो. बारीक सारीक खूब चुको अर्थीक तज्ज्ञ गंडभैरांवाच्या तकलेंत येवंक नाशिल्ल्यो. म्हाका अशेंय कळिल्लें की हो वा खंयचोय समितीचो वांगडी ऑडिटराक मेळनासतना हो भायले भायर करून हाडिल्लो. तातूंत त्रुटी आशिल्ल्यो म्हणूनच तर म्हाका प्रस्न विचारपाची संद मेळिल्ली. दलभंजन प्रत्येक उतरा-उतराक गंडभैरांवाक आलाशिरो दितालो. गंडभैरांव आमचेर जनरल बॉडी संमती नासतना पन्नास लाख दुडू उबारपाचेर केश करपाच्यो खबर करतालो, दलभंजन सांगतालो की ही केश तर जावंकूच जाय आनी त्या भायर तांणी संमती नासतना वांगड्यांक हे दुडू परतिले ताचेर बी आनी एक केश करूंक जाय. असल्यो माकड उडयो मारपाक ताका खूब सुख मेळटाले. त्या बोवाळात ताडीमोडींन ती आनी तिगेली सगली समिती राजिनामो दिता म्हणून बी जाहीर केल्ले. कारणां दितना तिणें म्हणिल्लें की पाषाव हाचे मुखार फक्त कुयटाकूच रावपाचो आनी खजिनदारूय दुसऱ्या देशांत वता, दलभंजन तर हांगा रावना, केन्ना- केन्नाय येता, म्हूणन हाचे फुडें तांकां सोसायटी चलोवप शक्य जावपाना. हें तर दाखोवपाचें कारण आसलें. गंडभैरांवूच तर लोंढो भिकाजीक हाताक धरून सोसायटी चलयतालो आनी ही समिती तर कामसूत्री बावल्या भशेन गंडभैरांव म्हणटा तें हय सायबा, हय सायबा करपी आशिल्ली. घडये गंडभैरांव ही एक चाल खेळटालो. फाटल्या वर्सभर बी पाषावं कुयटाकूच तर आशिल्लो. आपुण नाजाल्यार हांगा कांयच चलपाना असो गंडभैरांवांचो एक समज आशिल्लो. आनी तातूंतल्यान हीं सगळीं नाटकां खेळटाले, अशेंय आसू शकतालें.
हेवटेन धाड धाड करून पुलीस भितर सरले. आमचेर अनधिकृत विडिओ रेकॉर्डिंग करपाचो आरोप लायिल्लो. तांणी गंडभैरांवाक केकाटता तो पळयलो तेन्ना तांच्या खुमण्यावेले भाव पळोंवपा सारके आशिल्ले. तो तांगेलो सदचेंच गिरायक आशिल्लो. तसो क्लब हाउस हो कोणालो खाजगी जागो न्हय तर सगळ्यालो जागो. तरी पूण केस्तांव नाका म्हणून आमी पुलिसाले विनवणेक मान दित रेकॉर्डिंग काडून उडयलें. म्हज्या आयुष्यातलो पुलिसांक समोर वचपाचो हो पयलो खीण, धन्य धन्य हो गंडभैरांव म्हज्या विरुद्ध केश करून पुलिशेक ताणें आपयिल्ले, जे म्हज्या आयुष्यांत हांवे पयलीं केन्नाच अणभवूंक नाशिल्लें. तो अणभव ताणें म्हाका दिल्लो.
गंडभैरांवाले गाळ्यांचे सादरीकरण जवळ जवळ दोन अडेज वरा चलले. तातूंत तागेले शुद्ध इंग्लिशींत म्हणिल्लें मुखेल धमकीरुपी कडवे “आपल्याक तुमी सोसायटी कशे चलयतात तें पळोंवचें आसा” आपूण खात्री करतोलो की पुरतेषांमाक आपणे केश करतगेर दोन- दोन आठवड्यांनी हांगां पुलिशेक मेळूंक येवचे पडटले, आमी अर्थहीन ई-मेल बरोवुन तागेल्या बायलेक सतायतात, कोणे तरी इंग्लिशींतल्यान होनररी सेक्रेटरी बरयिल्लें ताका आपल्या बायलेक हनी म्हणता म्हूणन दिसलें आनी ताचेर बी ताणें गाळयो घालपाचें सोडलेंना. ई-मेल बरोवन सतावपाची परंपरा ताणेंच तर सुरु केल्ली. खूब दिसांनी शुद्ध इंग्लीश गाळयो म्हाका आयकूपाक मेळिल्ल्यो. म्हजेर आनी तिमण्णाचेर आमी कटकारस्थाना रचतात म्हूण ताणें आळ घालो. पुलीस अर्ध वर सुमार आमचे वांगडा आशिल्ले. तांकां हांवे फकांडां फकांडां भितर सांगलें की आतां तुमी एक बारीकशी पुलीस चौकी आमगेल्या संकुलांत उघडात, हांगा कोणीय पादल्यार पुसून गंडभैरांवाक तुमचो आधार लागता आनी चौकी घालून ताचें काम मात्शें सोंपें करात.
कोणे तरी सोसायटी डी- रजिस्टर करपाचीय फुसकुली थंय सोडली आनी दलभंजनान ती उबारून धरली. वावरावळीचेर बरयिल्लें कांयच मुखार वचनाशिल्ले. गंडभैरांवाली करंदाय मारप सोंपनाशिल्ली. शेवटाक ताणें म्हाका आनी पुरतेषांमाक सोसायटीच्या वांगडीपणा वेल्यान बडतर्फ करपाची मागणी केली. गुलगुलात आनी दलभंजनान ती उखलून धरली. दुतोंडी दलभंजनाक बडतर्फीचें समर्थन करतना, खोशयेचे उमाळे येताले. एक सोसायटीचो वांगडी नाशिल्लो मनीस, चिटणीस वांगडिणीलो घोव येवन वांगड्याचे मिटिंगेक दादागिरी करतालो, वांगड्यांक भायर काडपाची आजनेर करतालो अशे अद्भुत दृश्य आमचे मुखार आशिल्लें. सगले मिटिंग भर शबय शबय करीत शेवटाक मिटिंग सोंपली. चेरमन पाषावं घरा वचपाक भायर सरलो. विशयवळेरे वेली खंयचेच गजालीचेर चर्चा जाऊनाशिल्ली.
मिटिंग सोंपली आनी मिनिट्स येवचे वाटेर गंडभैरांवांन वांगड्यांक मिटिंगेचो सार वा सारांश बरोवून धाडलो. कर्मभोग म्हळ्यार चोराच्या उलट्या बोंबा, ह्या बरयिल्ल्या सारांशाचेर आमचेरूच सगळे आरोप आशिल्ले, आमकां लागूनच मिटिंग जालीना, आमीच सोसायटी चालोवंक दिनांत म्हूण गंडभैरांव थंय मदीं पडलो आनी हिरो म्हण केंद्रस्थ केल्लो. पाषावाली समिती विरगळावपाची घोषणाय तातूंत केल्ली.
सोसायटीच्या बाय लाॅव्हस वा कायद्या प्रमाण जे राजिनामो दितात तांणी नवे समिती कडेन हस्तांतरण करसर काम चलोवचें आसतां. पूण, हांगा हे समितीन म्हणजे पाषावान दीक्षा दिवन उबो केल्या गंडभैरांवान जनरल बॉडीची मंजुरी ना म्हणून लोंढो भिकाजीक निश्कलंक सेवा इकरा म्हयने दिल्लेबद्धल, तागेली तुस्त, तोखणाय करीत प्रशंसापत्र दित काम बंद करूंक एक म्हयन्याची नोटीस दिली. राजिनामो दिला म्हणटगेर हाचे फुडें चेक सायन करपाना अशेंय ताणें म्हणिल्लें. आतां सगळ्यांली वाट लागिल्ली. एकमेकांक ले टकाटक दे टकाटक ई-मेलांचो पावस सुरु झालो. गुलगुलाताच्या फुडारपणा खाल थोडे वांगडी गंडभैरांवाक मनोवपाची तयारी करूक लागिल्ले. फुडें देखभाल कशी जातली हाची सगळ्याक चिंता आता पडिल्ली. (फुडें चलता…)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
