२ सप्टेंबराक कोंकणी कविता लेखनाचेर कार्यशाळा

भांगरभूंय | प्रतिनिधी

पणजी, खबरां मेज : तॉमास स्टीवन्स कोंकणी केंद्र, पर्वरी आनी अक्षरपथ-गोंय, हांच्या जोडपालवान शेनवार ता. 2 सप्टेंबर 23 ह्या दिसाक पर्वरे सभाघरांत कोंकणी कविता लेखनाचेर एका दिसाची राज्य स्तरीय कार्यशाळा आयोजीत केल्या. ही कार्यशाळा भाशा विज्ञानीक प्रो. किरण बुडकुले हांच्या मार्गदर्शना खाला जातली.
कार्यशाळेचो विशय “प्रेरणेच्या मुळा सावन कवितेच्या फळा मेरेन कवीचो आप – सोद” असो आसतलो. ही कार्यशाळा, कोंकणीत कविता बरोवपाक सोदपी नवोदितां खातीर तशेंच आपली कविता अदीक बरी करपाक सोदपी होतकरू कवीं खातीरय उक्ती आसा. हातूंत वांटेकार जावप्यांक कविता हे प्रेरक तांकीचो आपल्याच अंततर्मनांत सोद घेवपाक मेळचो; तशेंच स्वताचे आनी हेरांचेय कवितेचो सांगातान आस्वाद घेतां-घेतां आपले पुरतो आपलेच कवितेचो कस लावपाक मेळचो, असो हे कार्यशाळेची उद्देश आसा.
जर नवोदितांच्या जावं कवींच्या मनांत कवितेचें स्वरूप, लक्षणां, भास, तंत्र वा छंद हांचे विशीं कसलेय मुळावे दुबाव आसले, वा सरसकट कविते विशीं जावं आपलेच कविते विशीं उपस्थितांच्या मनांत हुस्के आसले, जाल्यार ते परस्पर चर्चा वा प्रस्न आनी जापो हांचे वरवीं सुटावे करचे, असोय एक प्रामाणीक यत्न हे कार्यशाळेत जातलो.
वांटेकार जांवक सोदपी उमेदवारांक कसलीच प्रवेश फी नासतली. त्या भायर तांच्या च्या – पाणी आनी जेवणाची वेवस्था तॉमास स्टीवन्स कोकणी केंद्र करतलें. कार्यशाळा पुराय जातगीर उमेदवारांक प्रमाण पत्रां दितले. सगळ्या उमेदवारांक https://forms.gle/PphJA9n4u33zaGqn7 ह्या लिंकाचेर आपलो गुगल फॉर्म 28 ऑगस्ट मेरेन धाडचो पडटलो. त्याच बराबर आपल्यो दोन वेंचीक (चडांत चड चार) कविता टायप करुन अर्जा वांगडा मेल करच्यो पडटल्यो. उमेदवारांचो आंकडो चड जाल्यार कवितांच्या आदाराचेर तांकता तितलेच उमेदवार वेंचून काडटले.
संबंदितांनी हे संदेचो मुजरत लाव घेवचो, असो उलो तॉमास स्टीवन्स कोंकणी केंद्रान मारला.