भांगरभूंय | प्रतिनिधी
15 ऑगस्ट दिसा आमी आमच्या भारत देशाचो 76 वो स्वातंत्र्य दीस, स्वाभिमानान आनी व्हड उमेदीन मनयलो. तुमकां खबर आसतलेंच की, पोरुंच्यान सरकारान स्वातंत्र्य दिसा निमतान, ‘‘हर घर तिरांगा’’ हो नवो उपक्रम सुरू केला. हो उपक्रम आमकां स्वातंत्र्य सैनिकांचें बलिदान याद करून दिता अनी सगले धर्म, जाती, प्रांत, भाशा, कुशीक दवरून आमच्या देशा विशीं एकचारपण आनी एकमेका विशींचो मोग आमच्या काळजांत जागयता.
भारत देशाचो तिरंगाे म्हणल्यार राष्ट्रीय चिन्न, आनी ताचो मान राखून दवरप, ही दर एका नागरिकाची जबाबदारी आसा. पूण ही जबाबदारी आमी नागरीक खरेंच वेवस्थीत रीतीन पाळटात व्हय?
Flag Code of India 2002, खूबशा प्रस्नांची जाप दिता. घरांत तिरंगाे दवरतना, ताची घडी लेगीत अशे तरेन आसची जेणे करून सबंध अशोक चक्र, ताचे वयर आनी सकयल समान मापाची तिरंग्याची बारीक नारंगी आनी पाचवी पट्टी आसची. असो घडी केल्लो तिरंगाे दोनूय तळहाताचेर धरून नमळायेन अशा जाग्यार दवरचो जेणे करून, तिरंग्याचो केन्नाच अपमान जावचो न्हय.
तिरंग्याचो अपमान करतल्याक Prevention of Insults to National Honour Act, 1971 कायद्या खाला तीन वर्सांची बंदखण वा दुडवांची ख्यास्त वा दोनूय (बंदखण आनी दुडवांची ख्यास्त) भोगूंक शकता अशें बरयलां.
फाटल्या दिसांनी घराचे भायर तिरंगे लायिल्ले दिसताले. थोड्यांचे तिरंगे पावसांत भिजिल्ले, जाल्यार कांय जाणांचें वाऱ्यान पिंजिल्ले. अशा पिंजिल्ल्या, भिजिल्ल्या आनी रंग इबाडिल्ल्या तिरंग्याक लेगीत व्हड मानान निरोप दिवप गरजेचें आसा.
पूण हो निरोप तोवूय मानान दिवप कसो? हो एक प्रस्न तुमकां पडला आसतलो. Flag Code of India 2002, कलम 1(2.2)(xiii) कलम 5(3.25) खाला इबाडिल्ल्या तिरंग्याक खाजगी रितीन पुरायपणान निरोप दिवप. निरोप दोन भशेन दिवं येता. एक म्हणल्यार इबाडिल्ल्या तिरंग्याक अग्नी दिवप ना जाल्यार पुरोवप.
अग्नी दिता जाल्यार, इबाडिल्ल्या तिरंग्याक असोच उजो पेटोवन दिवचाे न्हय. जाल्यार पयलीं एक सुरक्षीत सुवात सोदून, कांय लांकडा घालून पयलीं उजो तयार करचो आनी मानान घडी केल्ल्या तिरंग्याक अग्नीच्या मध्य भागांत दवरून निरोप दिवचो. पुरयता आसत जाल्यार इबाडिल्ल्या तिरंग्याक मानान घडी करून लांकडाच्या बॉक्सांत घालचो आनी एक सुरक्षीत सुवात वेंचून फोंड मारून पुरचो. इबाडिल्ल्या तिरंग्याक निरोप दिले उपरांत कांय खिणा खातीर मौन धारण करचें. इबाडिल्ल्या तिरंग्याक निरोप दिवपाची विधी एकंदरीत खाजगी रितीन करची.
दर एका नागरिकान देशाच्या तिरंग्याचो मान राखचो आनी चुकून लेगीत आमच्या देशाच्या तिरंग्याचो अपमान करचो न्हय वा जावपाक दिवचो न्हय, हाची काळजी दर एकल्यान घेवची.
दिगज बेणे
7030415870
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
