भांगरभूंय | प्रतिनिधी
भांगरभूंय । खबरां मेज
पणजीः दिवचलच्या राधाकृष्ण विद्यालयांत भारताचो 76वो स्वातंत्र्य दीस व्हडा उमेदीन मनयलो. पूज्य साने गुरुजी ज्ञानोपासना मंदिर संस्थेचे अध्यक्ष विद्याधर शिरोडकार मुखेल सोयरे म्हणून हाजीर आशिल्ले. त्याग आनी समर्पणान जीण जगल्यार आमी दुसऱ्याक एक नवी दिका दाखोवपाक शकतात अशें तांणी सांगलें.
यशवंत गांवस, गोपाळ मोरजकार, राजन कडकडे, आत्माराम नाटेकार, मुख्याध्यापिका हेमा चणेकार, पालक-शिक्षक संघाचो अध्यक्ष उदय डिचोलकार, साने गुरुजी प्राथमीक शाळेच्या पालक- शिक्षक संघाचे अध्यक्ष प्रवीण जाधव कार्यावळीक हाजीर आशिल्ले. कार्यावळीची सुरवात मानेस्तांचे हस्तुकीं राष्ट्रध्वजाक मानवंदना दिवंन आनी राष्ट्रगीतान जाली. स्वातंत्र्यदिसा निमतान शाळेच्या विद्यार्थ्यांनी देशा खातीर बलिदान दिवपी फुडाऱ्यांची भेशवण केल्ली. सुरेखा परमार- भारत मात, समिक्षा नायक- झांशीची राणी, राहुल मधुवाला- मंगल पाण्डे, लव माने- भगतसिंग, सुमन बेरा- सुभाषचंद्र बोस, आर्यन याडगोड- लाला लजपतराय, देव सिंग- चंद्रशेखर आजाद हांचो तातूंत आसपाल आशिल्लो.
मुख्याध्यापिका हेमा चणेकारान सगल्यांक येवकार दिलो. सूत्रसंचालन श्रीपाद भिडे हाणे केलें आनी वनिता कन्नूर हिणे उपकार मानले. विद्यार्थ्यांनी तयार केल्ल्या वण्टी पत्रकाचेर ह्या वेळार अनावरण केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
