भारतीय मुसलमान पयलीं हिंदूच आशिल्ले : आझाद
भांगरभूंय | प्रतिनिधी
नवी दिल्ली, खबरां संस्था : ‘इस्लाम 1500 वर्सां पयलीं स्थापन जालो. भारतांत भायलो कोणूच ना. आमी सगळे ह्या देशांतलेच आसात. भारतांतले मुसलमान मुळांत हिंदू आशिल्ले, उपरांत तांणी धर्मांतर केलें, अशें विधान जम्मू-काश्मीराचे आदले मुख्यमंत्री गुलाम नबी आझाद हांणी केलां.
तांणी कांय म्हयन्यां पयलीं काँग्रेसींतल्यान फुटून डेमोक्रेटिक प्रोग्रेसिव्ह आझाद पार्टी (डीपीएपी) स्थापन केल्या.
हिंदू धर्म इस्लामा परस पोरणो. सगळे मुसलमान पयलीं हिंदू आशिल्ले. 600 वर्सां आदीं काश्मीरांत फकत काश्मिरी पंडित आशिल्ले. उपरांत तातूंतले जायते लोक धर्मांतर करून मुसलमान जाले. धर्म राजकारणांत भरसून वचूंक फावना. लोकांनी धर्माच्या नांवान मतदान करचें न्हय, अशेंय तांणी सांगलें.
मुसलमानूय हे भुंयेर रावतात. तांचें मांस आनी हाडांय ह्या भारतमातेचो भाग आसात. मागीर हिंदू- मुसलमान कित्याक? दोनूय ह्या भूंयेंत मेळटात, अशें आझाद हांणी मुखार म्हणलें. लोकांनी भावपण, शांतताय आनी एकचार तिगोवन दवरपाचें आवाहनूय तांणी केलें.
हाचे आदीं जेएनयू विद्यार्थी संघटनेची फुडारी शेहला रशीद हिणें जम्मू- काश्मीराचे उदरगती खातीर मोदी सरकाराची तोखणाय केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
