जुलय म्हयन्यान रेकाॅर्ड मोडलो !
भांगरभूंय | प्रतिनिधी
न्यूयाॅर्क, खबरां संस्था : फाटलो जुलय म्हयनो 1880 उपरांत सगळ्यांत उश्ण म्हयनो आसपाची शक्यताय आसा, अशें नासान सांगलां. 143 वर्सांचो विक्रम ताणें मोडला. हेर खंयच्याय जुलय म्हयन्यांचे तुळेंत तो 0.24 अंश सेल्सियस उश्ण आशिल्ल्याचें तांणी सांगलां. नासाच्या मतान, 1880 उपरांत सगळ्यांत उश्ण पांच जुलय म्हयने फाटल्या पांच वर्सांतले आशिल्ले. युरोपीय संघाच्या हवामान वेधशाळेनूय जुलय 2023 हो सगळ्यांत उश्ण म्हयनो अशें जाहीर केलां.
बेगीन पावलां उबारप गरजेचें: नासा
संवसारीक उश्णतायेचो परिणाम अमेरिकेंत स्पश्टपणान जाणवता, अशें नासान 14 ऑगस्टाक म्हणिल्लें. हें थांबोवपा खातीर बेगोबेग पावलां उबारपाची गरज आसा. दक्षीण अमेरिका, उत्तर आफ्रिका, उत्तर अमेरिका आनी अंटार्टीकाचे कांय भाग जुलयच्या हेर तापमाना परस 4 अंश सेल्सियस चड गरम आशिल्ले. दुसरे कडेन ह्या जुलयच्या तापमानाची 1951 ते 1980 मजगतींच्या जुलयच्या सरासरी तापमाना कडेन तुळा केली तेन्ना तापमान 1.18 अंश सेल्सिअस चड आशिल्ल्याचें दिसून आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
