चांद्रयान पावलें चंद्राचे निमणे कक्षेंत

भांगरभूंय | प्रतिनिधी

फाल्यां चांद्रयान आनी प्रोपल्शन माॅड्यूल जातले वेगळे

नवी दिल्ली, खबरां संस्था : चांद्रयान- 3 खातीर आयचो दीस इतिहासीक जावन आसा. चांद्रयान-3 न आयज निमाणे कक्षेंत (153 किमीx163 किमी) प्रवेश केला. इस्रोन हे विशीं म्हायती दिल्या. 17 ऑगस्ट म्हळ्यार फाल्यांचो दीस चांद्रयान-3 खातीर खूब म्हत्वाचो. फाल्यां चांद्रयान-3 प्रोपल्शन मॉड्यूल लँडर पसून वेगळे जातलें. मजगतीं, इस्रोन 14 ऑगस्टाक तिसरे फावट चांद्रयान-3 ची कक्षा कमी केल्ली.
चांद्रयान-3 हें 153 किमी x163 किमीचे कक्षेंत दवरलें. हाचे वांगडा चंद्रबंधाची प्रक्रिया पुराय जाली. आतां प्रोपल्शन मॉड्यूल तयार करपाची वेळ आयल्या. लँडर मॉड्यूल तांच्या स्वतंत्र प्रवासा खातीर तयार आसा.
चांद्रयानान पयलेच फावट चंद्राचे कक्षेंत प्रवेश केलो. तेन्ना ताची कक्षा 164 किमी x 18,074 किमी आशिल्ली. कक्षेंत प्रवेश करतना ताच्या ऑनबोर्ड कॅमेर्‍यांनी चंद्राचे फोटोय काडले. इस्रोन ताचो व्हिडिओ करून आपले वेबसायटीचेर शेअर केलो. 5 ऑगस्टाक चांद्रयान-3 सांजेवेळार 7.15 च्या सुमाराक चंद्राचे कक्षेंत पाविल्लें.