भांगरभूंय | प्रतिनिधी
बारधनयाचो दावो : चावडी- काणकोण शाळेक तेंकून बार
काणकोण, प्रतिनिधी : ‘आवल’ ही पुर्तुगेज काळांतली शाळा चावडी- काणकोणाच्या मध्यभागांत आसा. हे शाळेच्या लागसार म्हळ्यार शाळेच्या दुरगाक तेंकून दोन सोऱ्याचीं दुकानां आसात. सोरो पिवपाक येवपी ह्या चिऱ्यांच्या दुरगाचेर ग्लास दवरताले आनी गजाली मारीत सोरो पियेताले. शाळेंतल्या विद्यार्थ्यांक हें दृश्य दिसतालें म्हणून तेन्नाची मुख्याध्यापक गीता लोलयेंकार हिणें नगराध्यक्ष रमाकांत नायक हांचे कडेन थंय आडोस करपाची मागणी केल्ली. पूण पत्रे वा लोखणाची जाळी मारपाचें काम खर्चीक आशिल्ल्यान पालिके कडल्यान तें जावंक शकलें ना. पूण ह्या कामा खातीर सर्वशिक्षा अभियानान निधी मान्य केल्ल्यान शाळेंतल्या भुरग्यांक सोऱ्याचें दुकान बायेन दिसचें ना अशे तरेन ह्या दुरगाचेर पत्रे लावपाचें काम हालींच चालू केल्लें. मात सोरो दुकानाच्या धनयान कामगारां कडेन दादागिरी करून तें काम बंद उडयलें. देखून तें अर्द्यारुच उरलां.
मजेची गजाल म्हळ्यार ह्या बार मालकान पत्र्यांक लागून हांगा हवा खेळना. घुस्मटूंक जाता, अशें कारण दिवन लोकां कडल्यान सह्यांची मोहीम सुरू केल्या. मुळांत शिक्षणाचें देवूळ मानतात ते शाळेच्या 100 मीटर अंतराचेर सोऱ्याचें दुकान आसप बेकायदेशीर. पूण ह्या बारधनयाक ह्या जाग्यार सोऱ्याचें दुकान उबारपाची परवानगी कशी मेळ्ळी, ही अजापाची गजाल.
हे सरकारी शाळेच्या आदल्या विद्यार्थ्यांक सह्यांची मोहीम सुरू जाल्या ही म्हायती मेळ्ळे बरोबर तांणी अबकारी निरिक्षकांक मेळून बारवाल्यांक समज दिली दुरगाचेर पत्रे लावन घेतले. ते कोणे बागयल्यार वा लुकसाण केल्यार सगली जापसालदारकी बारधनयाची आसतली, अशी शिटकावणी नागरिकान दिल्या.
अबकारी निरिक्षक शांबा नायक आनी थळावे नगरसेवक आनी नगराध्यक्ष रमाकांत नायक गावकार हांकां निवेदन दिवन हे विशीं म्हायती दिवपाचें थारलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
