गंडभैरांवालो आगुस्त!!

भांगरभूंय | प्रतिनिधी

एक अणभव – 20  

हें हावसिंग सोसायटीचें कथानक प्रत्यक्ष अणभवांचेर आनी कांय काल्पनीक गजालींचेर आदारून आसा. प्रत्यक्ष जिवो वा मरण आयिल्लो मनीस, घडणूक हांचे कडेन हाचो संबंद ना. तो जुळत जाल्यार निव्वळ एक योगायोग समजुचो. 

– लेखक

गंडभैरांवाक आमी सगळ्या वांगड्यांनी निळू केल्लो. निळू म्हजो निळू, कोलतेंन खेळू, घर लासल्यार लासूं, पूण निळू म्हजो खेळू! . (आतां मुखार….) 

आमगेलो निळू म्हणजेच गंडभैरांव खोशयेचो गजर वाजयतां वाजयतां एक तारीख उदेली आनी लोंढो भिकाजीन देखभालीची जापसालदारकी घेतली. बिल्डरान पंढरीक लोंढो भिकाजीच्या सुवादीन केल्लो. एक दोन पयलींचे कामगार सोडल्यार बाकीचे मडगांवच्या कामरा कडेन दिसवड्या कोंतार मेळटात तसले अवतार दिसताले. सगळ्यांक पंढरीचे सुवादीन करून आनी सगळ्यो जबाबदाऱ्यो पंढरीच्या खांद्यार घालून लोंढो भिकाजी परत गेलो. सवाय भितरले एके सेक्युरिटी एजन्सी कडे ताणें संधान बांधून आमगेल्या संकुलांत गार्डस हाडून दवरले. लोंढो भिकाजी दोन दिसांनी परत आयलो आनी ताणें जेन्ना पारखिले की पंढरी जवाबदारी घेता, स्वतःचे आंग काढून घेत ताणें आमगॆले संकुल पूर्णपणान पंढरीचेर सोडले. पंढरी सगळे साम्भाळटालो. बिल्डर जेन्ना देखभाल करतालो तेन्ना बिल्डराली गाडी देखभालीक लागपी डीजेल जावं कितेंय जड वस्तू, हाडून संकुलांक पावयताली. पूण लोंढो भिकाजीन कारभार हातांत घेत पसून डीजेल सुद्दा पंढरीक आपले स्कुटरीचेर दवरून हाडचें पडटालें. पंढरीन हें सगळें करपाक थोडो येरादारी भत्तो दिवपाची मागणी लोंढो भिकाजी कडेन केली, पूण सगळें पगारांत आयलें, तितलें भितर सगळें जावपा जाय अशेंच उत्तर ताचे कडल्यान पंढरीक मेळटालें. एका म्हयन्या भितर कितलेशेच कामगार बदलत रावले. पंढरीवेलो पेज वाडूंक लागलो तशें पंढरीन आपल्या वाड्यार उतर घालून थळावे कामगार हाडून कामार दवरले आनी आपल्या वांगडाच सोसायटीकुय बी थोडी थिरताय हाडली.  

म्हयनो सोंपतालो तसो गंडभैरांव लोंढो भिकाजीक चेक बरयतालो, तेंवय व्हरून दिवपाचें काम पंढरीचेर आशिल्लें. एक फाटीं वडामुळाक तर दुसरे खेपेक सिग्नला कडेन, तिसरे खेपेक आंब्या कुशीन तर चवथे फावट जंक्शनाचेर वचून पंढरीक चेक दिवचे पडटाले आनी मागीर चार- पांच दिसांनी परत असोच खंयच्या एका कोनशाचेर आपोवन पंढरीक तागेलो आनी कामगारांलो पगार मेळटालो. लोंढो भिकाजीले ऑफिस खंय आसा तें कोणाक खबर नाशिल्लें. शेवट मेरेन पंढरीन तागेलें ऑफिस पळयलेंना. 

तीन म्हयन्यां भितर वर्सुकी सर्वसाधारण सभा घेवपाची आशिल्ली. फक्त हांव आनी पुरतोषांम वाडत्या खर्चाचेर आवाज काढताले. गंडभैरांवाले निष्काळजीपणा खातीर आमकां भुर्दंड पडटालो. तिडक येताली ती व्यक्त करपाक ई- मेल हेंच एक साधन आशिल्लें. गंडभैरांव उत्तर दिनाशिल्लो. जे शेरमांव तो आमका समितीचेर आसतना सांगतालो, ते स्वता आचरणाक हाडनाशिल्लो. वर्सुकी सभेक ताडीमोडींन स्वताक तोखेत लांबलचक भाषण केलें. आमचेर टिकेची झोड काडली. लोंढो भिकाजीचेर तुस्त तोखणायेचो शिंवर केलो. सुण्याचो विशय काडून तिणें सुप्रीम कोर्टाचे निर्णय दाखयत अशे पद्धतीन उलयली की ही सगळी चूक जे कोण हें दाखोवन दितात तांचीच. म्हगेल्या घराचे पडवेर सुणो हागल्यार वा हरबक्षाल्या पडवेर तिगेल्या किरयादान जेवण घाल्यार चूक आमचीच- तिगेली न्हय, असोच तिच्या उलोवपाचो स्वर आशिल्लो. करतलो करून गेलो, आनी सोप्यार न्हिदिल्याक मार पडलो, अशी गत तिने आपल्या भाशणांतल्यान आमची करून उडयिल्ली. दुसऱ्या कोणाक उलोवपाक थंय संद ती दिनाशिल्ली. बदनशिबान तकनिकी दोशा खातीर एकुय शब्द म्हज्यान उलोवपाकय जालोना. पुरतोषमान आवाज काडलो, पूण ताका दोन उतरां उलयतानाच बंद केलो. एकतर्फी विडिओ मिटिंग ताडीमोडींन रोखडीच आपले मर्जीतली वावरावळ उरकयत बंद केली. कितलीशेच चुकीची विधाना हातूंत बरयिल्लीं. आमी इ- मेल बरोवंन चुको दाखोवन दिल्यो, पूण फायदो जालो ना. गंडभैरांव आनी ताडीमोडीली हिटलरशाही चालू आशिल्ली. आमकांय उबगण आयिल्ली. पंढरीय लोंढो भिकाजी वांगडा काम करून उबगणिल्लो, वित्रागिल्लो. आमगेलो मेल-मेल चो खेळ चालू आशिल्लो, पूण तिव्रताय वेळेनुसार कमी जाल्ली.  

दीस /म्हयने पसार जाले आनी परत वर्सुकी सर्वसाधारण सभा घेवचो वेळ आयलो. ह्या वेळार विडिओ मीटिंग घेवपाक रजिस्ट्रारान मान्यताय दिवूनाशिल्ली. हांव आनी म्हजो पंगड तयारी करून मीटिंगेक गेले. आमकां उलोवपाक दिवचेंना असो दुबाव आशिल्लो म्हणून आमी लेखी निवेदनूय घेवन गेल्ले. मिटिंग क्लब हावसांत सुरु जाली. पाषाव बिलू जावन कोनशाक बशिल्लो. ताडीमोडीन विशय वळेरी घेवन पयलो मुद्द्दो, फाटले वर्सुकी सभेचें मिनिट्स वाचपाचो आनी पास करपाचो थाराव मांडलो. हांवें सांगलें की फाटल्या वर्साच्या मिनिट्सा भितर खूब चुकीचें बरयिल्लें आसा, तें म्हाका वाचून चर्चा करपाक जाय. आनी ताचेर जें स्पश्टीकरण हांव दितां तें चर्चा करून ह्या मिनिटसांत बरयात. चिटणीस ताडीमोडींन सांगलें की मिनिट्स म्हणजे जें उलयलें तें तश्याच्या तशे शब्दशा बरोवप, तें चूक आसूं वा बरोबर, आनी ती वाचल्यार पुसून ताजेर चर्चा जावपाक शकना. धडाधड फटिंगपणा बरयिल्ले मिनिटस पास करूंक हांवें आक्षेप घेतिल्लो. चिटणीस ताडीमोडी आपलें तेंच घेवन बशिल्ली आनी सुरवातेक अजाप दिसून अचंबित जाल्लो हांवें हो कसलो कायदो म्हण विचारीत हुज्जत घालपाक सुरू केली. 

चेरमन पाषाव म्हगेल्या आक्षेपाचेर कायच भूमिका घेनाशिल्लो. लोल्या भशेन थंड बशिल्लो. गुलगुलात ह्या वादांक मध्यस्ती करूंक ताडीमोडी वाटेंन उबी रावली आनी मोर्चा दुसऱ्या मुद्यां कडेन गेलो, ऑडिट रिपोर्ट, स्वताक अर्थीक तज्ञ म्हणपी गंडभैरांवान हें सगळें फाटल्यांतल्यान सांबाळिल्लें आनी तो मीटिंगेक येवन फाटल्यान बशिल्लो. ताका येवन बसपाक कायद्यान हक्क नाशिल्लो. कारण वांगडी तो न्ही तर ताडीमोडी आशिल्ली. ऑडिट रिपोर्टाचेर हांवें प्रश्न विचारपाक सुरवात केली. चिटणीस वा खजिनदार उलोवचें पयलींच गंडभैरांवान मदीं तोंड घालें आनी हांवें परत आक्षेप घेतलो. पाषाव कांयच उलोवपाकूच तयार जायना आनी हांव परत परत आक्षेप घेतां ते पळोवून गंडभैरांव उबो रावून म्हाका आनी पुरतोषांम आनी आमगेली पैनीच्या समितीक गाळ्यांचो शिंवर घालूक लागलो. असंस्कृत समाजातुय अशिक्षितांनी असली सूज वागणुक चार-चौगां मुखार केल्ली हांवें पळोंव नासली. सगळ्या संकुलांत अर्थीक तज्ञ गंडभैरावालो आवाज दुमदुमतालो.  

त्या वेळार म्हाका आमी इस्कोलांत आसतनाची याद जाल्ली. म्हज्या इस्कोलांत गांवच्या खांची कोनशांतल्यान येवपी भुरगे खूब हुशार आशिल्ले. अर्दें शिक्षण शारांत करून इस्कोला खातीर गांवांत येतगेर अभ्यासेतर विशयांचेर हांव तसो मंदबुद्धीच आशिल्लो. इस्कोलांत हे भुरगे आगुस्त चालू जातगेर, सुण्या म्हयनो चालू झालो म्हण्टाले. ह्या म्हयन्यांत आमकां विचित्र परिस्थितींत उबीं आशिल्लीं सुणीं इस्कोलाचे पडवे सकल दिश्टी पडटाली. इस्कोलांचे मदले सुटयेंत आमी सगळे तांचेर फातर मारताले, केन्नाय फातर बसून तीं विलग जातालीं, पूण चडशी व्हडल्या आवाजान केकाट्टालीं. होळोंम्ब घालतालीं. म्हाका व्हड जावन बुद्धी येतकीच कळ्ळें की आमी हें सगळें चुकीचें करताले. हे मिटिंगेच्या दिसाकुय त्या सुण्यां बशेन गंडभैरांव केकाट्टालो. घडयेक सुण्याच्या सहवासात रावून रावून तोवूय तांचे भशेन वागूक शिकलो जावुये. आनी ताकाय आगुस्त लागलो जावुये. तो म्हयनोय बी आगुस्ताचोच तर आसलो. गंडभैरांव केकाटतालो. होळोंम्ब घालूक लागिल्लो. हांव चेरमन पाशावां कडेन पळयत म्हजो मुद्दो मांडपाचो यत्न करतालों. गंडभैरांव इतल्या व्हडल्यान केकाटतालो की म्हजोच न्ही तर दुसऱ्या कोणाचोच आवाज थंय आयकू येनाशिल्लो. निमाणे आमकां वाज येवन हांव आनी पुरतोषमान गंडभैरांवाले केकाटणे, तागेले तांडव फोनार विडिओ रेकॉर्ड करूंक सुरु केले. गंडभैरांव रेकॉर्डिंग बंद करात म्हणून गुरगुरत आनीक गाळयाचो शिंवर घालीत आमचेर जुडून आयलो. इतल्यान पुलिशेच्या गाडयेच्या सायरनाचो आवाज आमच्या कानार पडलो. पयस येवपी आवाज हळू हळू लागीं येत पुलिशेची गाडी आमची मिटिंग चलतल्या त्या क्लब हावसाच्या भायर येवन थांबली. (फुडें चलता…)