भांगरभूंय | प्रतिनिधी
जें घडलां तें इतिहास. त्या संदर्भांत जें बरयलां, चित्रीत केलां वा दस्तावेजीकरण केलां तें पुराय खरो इतिहास आसताच अशें न्हय. इतिहासाचेर बरयतना संशोधन आनी अभ्यासाची चौकट जाय. आवड जाय.
1961 वर्सा गोंयची सुटका आनी 1962 वर्सा गोंयचें भारतीय संघांत विलीनिकरण जालें हाचे विशीं चडशें लिखाण जावंक ना. कित्याक म्हण खबर ना ह्या विशयाचेर खूबशें दुर्लक्ष जालां. भारतीय स्वातंत्र्य संग्रामाचेर जायतीं पुस्तकां आमकां वाचपाक मेळटात. पूण गोंयच्या मुक्ती संघर्शाचेर आनी लश्करी कारवायांचेर खरें सत्य संदर्भ आशिल्लें पुस्तक, जाचे मुक्तीबगर भारताचें स्वातंत्र्य अपूर्ण उरलें, तें फकत कांय दिसां आदीं म्हाका वाचपाक मेळ्ळें.
गोवा 1961, ‘द कम्पलीट स्टोरी ऑफ नॅशनलिज्म अँड इंटिग्रेशन’ हें आदलो पत्रकार, इतिहासकार आनी म्हजो इश्ट वाल्मीकी फालेरो हाचें इंग्लीश पुस्तक. सोंपे भाशेंत तांणी गोंय मुक्तीच्या वेग-वेगळ्या तासांचो इतिहास मांडला. खंयच्याय पानार नदर मारल्यार संशोधनात्मक बसकेची खोलाय नदरेंत भरता.
मोटी तकालस घेवन संशोधन केल्ल्या ह्या पुस्तकांत लेखक वाल्मीकी फालेरो हाणें ‘ऑपरेशन विजय’ ची पुराय खबर, ताचे आदीं आनी उपरांतच्या घडणुकांचो आस्पाव करून एक व्हड कॅनव्हास पितारला. गोंय, भारत आनी आंतरराष्ट्रीय मळार जाल्ले राजनितीक येत्न, भासाभास, युक्तीवाद, नियोजन, दूरदृश्टी, रणनिती, प्रत्यक्ष कार्यावळी आनी तांचे परिणाम हे सगळे तपशील लेखकान आपल्या प्रभावी शैलींत सांगल्यात. तातूंत कसलोच पाल्हाळ ना आनी गरज नाशिल्ल्या गजालींचो आसपाव ना. सगळें कशें जुस्ताजुस्त! भाशा रसाळ आनी सुटसुटीत आसा. संशोधनात्मक तपशील आनी संदर्भ आयले तरी कथनात जडसाण आनी क्लिश्टता ना. हें पुस्तकाचें मोटें यश अशें म्हणन दिसता. ह्या लेखकान कांय दशकां सातत्य राखलां ताका लागून ताच्या बरपाक एक रियाजाची धार आयल्या.
देशांतलें आनी गोंयांतलें त्या वेळावेलें राजकी वातावरण आनी ताचें बदलपी चित्र, गोंयचे सुटके खातीर घडिल्ली देशी स्वातंत्र्य चळवळ आनी गोंयचे सुटके झुजाऱ्यांची भुमिका आनी ताचो परिणाम, गोंय भारतांत विलीन जाले उपरांत ताचो जाल्लो परिणाम, वाल्मिकी फालेरो स्पश्टपणान मांडटा. आपलीं मतां स्फटिका सारकीं स्पश्ट आनी
पारदर्शकपणान मांडपाक तो अनमनना वा फाटींफुडें जायना. मेकळेपणान निर्भीडपणान लेखकान हो आलेख
रंगयला.
भारताच्या स्वातंत्र्या उपरांत पुरायपणान भारतान सुरू केल्ली ही पयली लश्करी कारवाय. छत्तीस वरां चलपी लश्करी कारवाय जावपाक खंयच्यो घडणुको जापसालदार आशिल्ल्यो? तेन्ना गोंयचें राजकी वातावरण कशें आशिल्लें? गोंयकारांनी स्वता खंयची भुमिका घेतिल्ली? हाची जाप ह्या पुस्तकांत आशिल्ल्या धा प्रकरणांनी आमकां मेळटा. इतिहासाच्या अभ्यासकांक हातूंत नव्यान खूब कितें शिकूंक मेळटलें.
गोंयच्या स्वातंत्र्य संघर्शांत किरिस्तांव फुडाऱ्यांचें योगदान खूबदां आडनदर जालां. हिंदू लोकां भशेनच गोंयच्या क्रिस्तांव समाजांतलो एक वर्ग भारतीय राश्ट्रवादाचो पुरस्कार करतालो आनी गोंयचे मुक्ती खातीर अथक परिश्रम करतालो हें
पुराव्यां सयत लेखकांन दाखोवन
दिलां.
‘फॅलेसीज’ ह्या पुस्तकाच्या निमाण्या प्रकरणांत गोंय मुक्ती उपरांत मुद्दाम वावुडलेल्यो वावड्यो, खबरो हांची लेखकान दखल घेतल्या आनी पुराव्यां सयत तांचें खंडन केलां. इतिहासाच्या पानांत जे घडिचार जाल्यात तांचें तटस्थपणान दस्तावेजीकरण जावप गरजेचें आनी ते नदरेन हें बरें काम लेखक फालेरो हांणी केलां.
लेखक वाल्मीकी फालेरोन आतां मेरेन जायतीं पुस्तकां बरयल्यांत. ‘पॅट्रिओटिझम इन ऍक्शन- गोवन्स इन इंडियाज डिफेन्स सर्विसेस’ आनी ‘सावरिंग स्पिरिट- 450 वर्सां मडगांवची एस्पिरिटो सांता चर्च (1565-2015)’ हीं तांची कांय फामाद
पुस्तकां.
गोवा, 1961 हें एक म्हत्वाच्या विशयाचेर खोलायेन संशोधन केल्लें तकालस घेवन बरयल्लें कार्रेगाद पुस्तक. भारतीय इतिहासाची आवड आशिल्ल्या तशेंच इतिहासाच्या अभ्यासकांनी तें वाचपाकूच जाय. हें पुस्तक संवसारीक नामनेची प्रकाशन संस्था पँग्विन प्रकाशन संस्थेन उजवाडाक हाडलां.
पुस्तक – गोवा 1961, ‘द कम्पलीट स्टोरी ऑफ नॅशनलिज्म अँड इंटिग्रेशन’
बरोवपी – वाल्मीकी फालेरो
प्रकाशक – पँग्विन पब्लिकेशन्स
पानां – 391, मोल – 699 रुपया
सखाराम शेणवी बोरकार
9923306751
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
