भांगरभूंय | प्रतिनिधी
शुभमन गिल आनी यशस्वी जयस्वाल हांचे भागिदारी नेटार भारतान चवथे टी-20 मॅचींत वॅस्ट इंडिजाक 9 विकेटींनी हारयलो. ह्या जैता सयत भारतान पांच मॅचींचे माळेंत 2-2 अशी बरोबरी केली. पांचवी आनी निर्णायक मॅच 13 ऑगस्टाक फ्लोरिडाच्याच लॉडरहिल क्रिकेट मैदानाचेर जातली.
वॅस्ट इंडिजान दिल्ली 179 धांवड्यांची मोखीचो फाटलाव भारतान 17 ओव्हरींनी फकत एक विकेट वगडावन केलो.
भारताच्या जैतांत गिल आनी जयस्वाल पर्जळ्ळे. दोगांयनी पयले विकेटी खातीर 165 धांवड्यांची भागिदारी केली. वॅस्ट इंडिजा आड भारताच्या ओपनरांनी आतां मेरेन केल्ली ही व्हड भागिदारी थारली. जयस्वालान नाबाद 84 धांवड्यांची खेळी केली, जाल्यार गिल 77 धांवड्यो करून बाद जालो. तिलक वर्मा 7 धांवड्यांचेर नाबाद उरलो.
ते आदीं मुखेली रोवमॅन पॉवेलान टॉस जिखून पयलीं बॅटींग करपाचो निर्णय घेतलो आनी हेटमायराच्या अर्द शेंकड्या नेटार वॅस्ट इंडिजान 8 विकेटी वगडावन 178 धांवड्यो केल्यो.
मुखेली हार्दीक पांड्यान डावाची पयली ओव्हर घालपाक अक्षर पटेलाक हाडलो. पूण, मायर्सान ताका एक सको आनी एक चवको मारलो. फास्ट बॉलर अर्शदीप सिंगान मायर्साक बाद केलो. वैयक्तीक 17 धांवड्यांचेर विकेटकीपर संजू सॅमसनान ताची कॅच धरली. ते उपरांत ब्रॅण्डन किंगान (18) आक्रमक बॅटींग केली. पूण, अर्शदीपान ताकाय तंबूंत धाडलो. ताची कॅच कुलदीप यादवान धरली. कुलदीप यादवान विंडिजाक मोठो धपको दितना निकोल्स पुरनाक बाद केलो. ते उपरांत मुखेली रोवमॅन पॉवेल बाद जालो. अशा वेळार शाई होपान एक बाजू सांबाळून धरतना जलद रितीन धांवड्यो केल्यो.
होपान 29 बॉलांनी तीन चवके आनी दोन सक्यांचे मजतीन 45 धांवड्यो केल्यो. दुसरे वटेन हेटमायरान खेळपट्टीचेर जम बसयल्या उपरांत व्हड शॉर्ट मारपाक सुरवात केली. हे मजगतीं, रोमारियो शॅफर्ड 9 धांवड्यो करून बाद जालो. जेसन होल्डरान तीन धांवड्यो केल्यो. ताका मुकेश कुमारान बोल्ड केलो. हेटमायरान 39 बॉलांनी तीन चवके आनी चार सक्यांचे मजतीन 61 धांवड्यो करून स्कोर 178चेर पावयलो. अर्शदीप सिंगान 38 धांवड्यो दिवन 3 विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
