भुरग्यांक मानसीक रितीन सुरक्षीत करुया!

भांगरभूंय | प्रतिनिधी

पालक आपल्या भुरग्यां कडेन कशे संवाद सादतात, ताचो परिणाम तांचे भितर तयार जावपी आसक्ती शैलीचेर जावं येता.

कोणूच जल्माक येतनाच असुरक्षीत आसना. प्रत्येक गजालीक ना म्हणप (rejection), कठोर उतरां (unkind words), टिका करप (Criticism), एका भुरग्याक स्वता विशीं कमीपणां हाडटा. भुरग्या भितर असुरक्षीतताय वा स्वता विशीं कमीपणां निर्माण जावपाक जायतीं कारणां आसात, पूण चडशे ताची सुरवात भुरगेपणांतल्यान (ल्हान पिरायेंतल्यान) जाता. जेन्ना भुरग्यांक फावो तें प्रमाणीकरण वा आवयबापायचो आदार मेळना तेन्ना ताका अपुर्णताय वा अयोग्यतायेची खोलायेन भावना निर्माण जावंक शकता.
जी आसक्ती शैली (attachment style) भुरगेपणांत निर्माण जाता ताचो तांचेर आजिवन प्रभाव उरता. हो प्रभाव तांच्यो भावना आनी गरजो तांच्या जोडीदाराक, इश्टांक आनी कुटुंबाक सांगपाचे तांकीचेर पडटा तशेंच तांच्या संघर्शाक (conflicts) जाप दिवपाचे तांकीचेरय पडटा आनी आपल्या संबंदां विशीं अपेक्षा कश्यो तयार करतात हाचेरय ताचो परिणाम जाता.
तुमी वाडिल्ले आसक्ती शैलींतल्यान (attachment style) तुमच्या नात्यां विशीं आनी तुमच्या विशीं सगळें स्पश्ट जायना पूण ती समजून घेवप तुमकां नात्यांत लक्षांत येवपी नमुन्यांचे (patterns) स्पश्टीकरण दिवपाक मदत करूंक शकता.
पालक आपल्या भुरग्यां कडेन कशे संवाद सादतात, ताचो परिणाम तांचे भितर तयार जावपी आसक्ती शैलीचेर जावं येता. भुरगीं आपले खोशे खातीर पालकांचेर आदारून आसतात आनी तीं तांकां आनी दुसर्‍यांक कशी प्रतिक्रिया वा वागणूक दितात, तें पळोवन समाजीक कुशळटाय (social skills) शिकतात. आवय-बापूय भुरग्यांचे गरजे कडेन विसंगतपणान (inconsistent) लक्ष दितात जाल्यार भुरग्यांक चिंतेस्त आसक्ती शैली (anxious attachment style) तयार जावंक शकता. तांकां आपल्या नात्यांत सुरक्षीतताय जाणवपाक अडचणी येवंक शकतात. ल्हान आसतना आवय-बापूय भायर सरतना तांकां ते चिकटून रावतात. व्हड जातकच तांकां तांच्या नात्यांत मत्सर (jealousy) निर्माण जावपाची प्रवृत्ती तयार जावं येता.
आवय- बापायचें भुरग्यां कडेन फटींग उलोवप, तांच्या कडल्यान पयस रावप, तांकां घरांत कामाक दवरल्या तांचे सुवादीन करून परत परत भायर सरप, ‘हांव तुजे कडल्यान पयस वतलें’ असो भंय घालप, भुरग्यांच्या मनांत नासतना तांकां दुसर्‍यां म्हर्‍यांत धाडप, भुरग्यांच्या रुपाचेर, वजनाचेर, परिक्षेंतल्या गुणांचेर, खंयचेय कुशळटायेंत (skills) उणाव आसल्यार तांकां नांवां दवरप, तांचेर सदांच परिपूर्ण (perfect) जावपाक दबाव घालप, ह्या सगळ्यां खातीर सुद्दां भुरगीं मानसीक रुपान असुरक्षीत जावपाक शकतात आनी ताचो प्रभाव तीं व्हड जातकर सुद्दा उरपाक शकता.
पालकांक कांय सुचोवण्यो
पालक म्हूण तुमी तुमच्या भुरग्यांच्या संकश्टांत संवेदनशील आनी मोगाळ रितीन सातत्यान प्रतिसाद दिवन असुरक्षीत आसक्ती शैली (insecure attachment style) आडावपाक मदत करूंक शकतात. पालक आपल्या भुरग्यांक सातत्यान प्रतिसाद दितात जाल्यार भुरग्यांक संकश्टांत कितें करचें तें कळटलें. तुमच्या भुरग्यांक खंयचेय परिस्थिती विशीं ते तुमचे कडेन उलोवंक शकतात हें कळयात. तुमच्या भुरग्यांक तांची सुरक्षीतताय हो तुमचो पयलो हुस्को आसा अशी खात्री करून दियात. भुरग्यांची तोखणाय करात पूण विचार करून करात. तांची दुसर्‍या कडेन तुलना करूं नाकात. भुरगीं पालकां कडल्यान स्वता विशीं जें आयकतात तेंच तांकां खरें दिसता. भुरग्यांक स्वता विशीं बरें दिसपाक मदत करपाक जाय जाल्यार दुबळेपणां परस तांचे बळग्यांचेर (strengths) चड लक्ष केंद्रीत करचें. हाका लागून तांची वागणूक सुदारतली. तांकां मदत करप आनी मायेस्त कृतीन तांचो आत्मन्मान आनी हेर बर्‍यो भावना निर्माण करप म्हत्वाचें. भुरग्यांक भुरगेपण अणभवपाक मदत करची, तांच्या आवडी – निवडींचेर लक्ष दिवचें, तांकां परिपूर्ण जावपाक जबरदस्ती करची न्हय. तांकां मानसीकरित्या निरोगी आनी सुरक्षीत वातावरण दिवपाचो यत्न करुया.

शमा केणी
9921862988