ऑनलायन गेमींग : 28 टक्के जीएसटी
भांगरभूंय | प्रतिनिधी
संसदेंत विधेयक मंजूर
भांगरभूंय । खबरां संस्था
नवी दिल्ली : संसदेंत जीएसटी आनी आयजीएसटी दुरुस्ती विधेयक मंजूर केलां. हाका लागून आतां ऑनलायन गेमींग म्हळ्यार कॅसिनो आनी हॉर्स रेसिंगाचेर 28 टक्के जीएसटी दिवचो पडटलो. जीएसटी मंडळान 2 ऑगस्टाक कायद्यांत बदल करपाची शिफारस केल्या. ह्या कायद्याक पयलींच मंत्रीमंडळान मान्यताय दिल्ली. लोकसभेंत ह्या विधेयकाक मान्यताय मेळ्ळ्या उपरांत आतां हें विधेयक राज्यसभेंत मांडले आनी थंयय ताका मान्यताय मेळ्ळी. केंद्रीय अर्थमंत्री निर्मला सीतारमण हांणी हाचे पयलीं लोकसभेंत हें विधेयक मांडिल्ले, थंय ताका पयलींच मान्यताय मेळिल्ली.
जीएसटी मंडळान 51 वे बसकेंत सीजीएसटी कायदो, 2017 च्या तिसरे अनुसुचींत कॅसिनो, हॉर्स रेसिंग आनी ऑनलायन गेमींतल्या कलमांचेर कर स्पश्ट करपा खातीर दुरुस्ती करपाची शिफारस केल्ली. ही दुरुस्ती म्हळ्यार ऑनलायन गेमींग, ऑनलायन मनी गेमींग, ऑनलायन गेमींग फारीक करपाक वापरिल्ले डिजिटल पयशे आनी ऑनलायन गेमींगच्या संबदीत पुरवणदारांचेर जीएसटी संबंदीत स्पश्ट आशिल्ले नेम. जीएसटी कायद्यांतल्यो दुरुस्ती तरतुदी 1 ऑक्टोबर सावन लागू जातली. स म्हयन्यां उपरांत जीएसटी नेमाचो नियाळ जातलो अशें जीएसटी मंडळान सांगलां.
लोकसभेत शुक्रारा केंद्रीय वस्तू आनी सेवा कर दुरुस्ती विधेयक 2023 आनी एकत्रीत वस्तू आनी सेवा कर दुरुस्ती विधेयक 2023 मंजूर केलें. हाचे वांगडा जीएसटी म्हळ्यार वस्तू आनी सेवा कर कायद्या प्रमाण ऑनलायन गेमींग, कॅसिनो आनी हॉर्स रेसिंग क्लबांनी खेळिल्ल्या पुराय रकमेचेर 28 टक्के कर लावपाचो प्रस्ताव मांडलो. राज्यसभेंत अर्थमंत्री सीतारामण हांणी वयलीं दोनूय विधेयकां मान्यताये खातीर दवरलीं आनी सभाघरांन चर्चा करिनासतना तीं मंजूर केलीं.
ऑनलायन गेमींग पयशां खातीर नेम
परकी संस्थांनी दिल्ल्या ऑनलायन मनी गेमींगाचेर जीएसटी थारावपा खातीर आयजीएसटी कायदो, 2017 त तरतूद जोडपाची शिफारस जीएसटी मंडळान केल्या. अशा परकी संस्थांक भारतांत जीएसटी खातीर नोंदणी करप म्हत्वाचे आसा. ह्या विधेयकांत ऑनलायन गेमींग, ऑनलायन मनी गेमींग, ऑनलायन गेमींग फारीक करपा खातीर वापरिल्ले डिजिटल पयशे आनी ऑनलायन गेमींगच्या संबदीत पुरवणदार हांचे खातीर नेम सुरू करतले.
राज्यांतल्या जीएसटी कायद्यांत दुरुस्ती जाय
सीजीएसटी आनी आयजीएसटी कायद्यांतल्यो दुरुस्त्यो संसदेन मंजूर केले उपरांत राज्यांक राज्य जीएसटी कायद्यांत दुरुस्ती करपा खातीर त्या त्या विधीमंडळाची मान्यताय घेवची पडटा. केंद्रीय मंत्रीमंडळान बुधवारा हे संबंदी प्रस्तावाक मान्यताय दिल्ली. हाचे आदीं जीएसटी मंडळान फाटल्या सप्तकांत केंद्रीय जीएसटी (सीजीएसटी) आनी आयजीएसटी कायद्यांत दुरुस्ती करपाक मान्यताय दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
