भांगरभूंय | प्रतिनिधी
येजमान भारतान हांगाच्या मेयर राधाकृष्णन स्टेडियमाचेर चालू आशिल्ले आशियायी चॅम्पियन्स ट्रॉफीचे फायनलींत सुवात मेळयली. ताणें दुसरे सेमी फायनलींत जपान पंगडाक एक वटेन जाल्ले मॅचींत 5-0 अशा फरकान हारयलो.
आकाशदीप सिंगान 19व्या मिनटाक, मुखेली हरमनप्रीत सिंगान 23व्या मिनटाक, मनदीप सिंगान 30व्या मिनटाक, सुमितान 39व्या मिनटाक आनी कार्थी सेल्वमान 51व्या मिनटाक गोल केलो.
मुखेली हरमनप्रीत सिंगान सर्तींतलो आपलो आठवो गोल केलो. सर्तींत सगल्यांत चड गोल करपाचे वळेरेंत तो पयले सुवातेर आसा. भारत आतां आयज जावपी फायनलींत मलेशिया आड खेळटलो. पयले सेमी फायनलींत मलेशिया पंगडान दक्षीण कोरिया पंगडाक हारयलो.
भारता कडेन चवथे खेपे ही सर्त जिखपाची संद आसा. 2011, 2016 आनी 2018त पाकिस्ताना वांगडा जोड रितीन ही सर्त जिखल्या. भारतान पयल्या क्वॉर्टरांत आपलो शेक दवरलो. भारतान आक्रमक खेळाचेर भर दिलो. दुसरे वटेन जपानान फाटले मॅचींत केल्ले चुकींतल्यान धडो घेतलो. ताणें डिफॅन्स लायनीचेर चड मेहनत घेतिल्ल्याचें दिसलें. ताणें भारताक गोल करपा पसून आडावन दवरलो.
हरमनप्रीत सिंगाच्या पॅनल्टी कॉर्नराचेर भारताक लागींलागीं आघाडी मेळिल्ली. पूण, जपानान डिफॅण्डरांनी गोल पडपा पसून आडायलो. दुसऱ्या क्वॉर्टरांत लेगीत भारत गोल करपाच्या यत्नांत आशिल्लो. मनप्रीतान दोन खेपे जपानाच्या पॅनल्टी सर्कलांत प्रवेश केलो. पूण, पयलीं गोल जावंक ना. ते उपरांत 18व्या मिनटाक गोलाचेर स्वायप करचे पयलीं हार्दीकान सुमिता वांगडा वन टू वन गेम खेळ्ळो. बॉल जपानाच्या गोलकीपराक लागून आकाशदीपा वटेन गेलो. ताणें कसलीच चूक करिनासतना बॉल जाळांत घालो. दुसरो गोल हरमनप्रीतान 23व्या मिनटाक केलो. ताणें ड्रॅग फ्लिकाचेर गोल केलो.
तिसरो गोल तिसऱ्या क्वॉर्टराच्या निमाण्या मिनटाक आयलो. 30व्या मिनटाक मिडफिल्डर मनप्रीत सिंगान गोलाचेर शॉर्ट मारलो आनी बॉल मनदीप सिंगाचे स्टिकाक लागून गोलपोस्टांत गेलो.
तिसऱ्या क्वॉर्टरांत जपानान भारताक आपल्या गोलपोस्टाच्या बॉक्सांत येवपाची संद दिली ना. भारतान उत्कृश्ट खेळ करून चवथो गोल केलो.
चवथ्या क्वॉर्टरांत लेगीत भारतान आक्रमक खेळ चालूच दवरलो. 52व्या मिनटाक कार्थी सेल्वमान गोल केलो.
मजगतीं, पयले सेमी फायनलींत मलेशियान दक्षीण कोरियाक 6-2 असो हारयलो. ह्या जैता सयत मलेशिया हे पयले खेपे आशियायी चॅम्पियन्स ट्रॉफीचे फायनलींत पावलो.
श्रीजेश 300वी मॅच खेळपी 9वो भारतीय खेळगडो
भारताचो गोलकीपर पी आर श्रीजेश 300 मॅच खेळपी भारताचो 9वो खेळगडो थारलो. ताचे खेरीत दिलीप तिर्की (412), धनराज पिल्ले (339), बलजीत सिंग ढिल्लन (327), सरदार सिंग (314), परगट सिंग (313), मुकेश कुमार (307), बलजीत सिंग सैनी (304) आनी मनप्रीत सिंग (320+) हे भारता वतीन 300 परस चड मॅची खेळ्ळ्यात. श्रीजेश आनी मनप्रीत सध्या खेळटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
