भांगरभूंय | प्रतिनिधी
आत्मविस्वासान भरिल्लो भारताचो पंगड आयज आशियायी चॅम्पियन्स ट्रॉफीचे सेमी फायनलींत जपाना आड खेळटलो. पुराय मॅचींत उत्कृश्ट प्रदर्शन आनी सातत्य कायम दवरप होच भारताचो यत्न आसतलो.
रावण्ड रॉबिन फेरयेंत पांचांतल्यो चार मॅची जिखून भारतान आपलो शेक दवरला. ताका लागून आयचे मॅचींत ताचेच दालें जड दिसता. पूण, भारताक सादूर रावपाची गरज आसा. हाचे फाटलें मुखेल कारण म्हणल्यार भारता भशेन जपान लेगीत सर्तींत एकूय मॅच हारूंक ना. दोनूय पंगडां मदली मॅच 1-1 अशी बादाबाद उरिल्ली.
संवसारीक रॅंकिंगेचर नदर मारली जाल्यार दोनूय पंगडां मदीं व्हड अंतर आसा. भारत चवथे सुवातेर आसा जाल्यार जपान 19वे सुवातेर.
रावण्ड रॉबिन फेरयेंत भारतान सगल्यांत चड 20 गोल केल्यात. पूण, जपाना आडचे मॅचींत भारताच्या खेळगड्यांनी गोल करपाच्यो साबार संदी वगडायिल्ल्यो. भारताक आयचे मॅचींत परतून तीच चूक म्हारग पडुये. जपाना आड भारताक 15 पॅनल्टी कॉर्नर मेळिल्लें. पूण, तातूंतल्या फकत एकूच पॅनल्टी कॉर्नराचेर गोल करपाक ताका येस आयिल्लें. आयचे मॅचींत पॅनल्टी कॉर्नराचेर गोल करपाची वेगळी रणनिती तयार करची पडटली.
बुधवारा पाकिस्ताना आड 4-0 फरकान जैत जोडून लेगीत मुखेल प्रशिक्षक समाधानी ना. पुर्ण मॅचींत सातत्य राखप म्हत्वाचें आसा अशें ताचें म्हणणें. पाकिस्ताना आडचे मॅचींत चारूय क्वॉर्टरींत आमी सातत्य राखिल्लें. रावण्ड रॉबिन मॅचींत जपाना आड लेगीत आमी सातत्य राखिल्लें. तरी आसतना आमकां चड गोल करपाक जमूंक नाशिल्लें अशें ताणें मुखार म्हणलें.
उप मुखेली आनी मिडफिल्डर हार्दीक सिंग मुखेल प्रशिक्षकाच्या मता कडेन सहमत आसा. जपाना आड चडांतचड गोल करपा खातीर बॉक्सांत पावल्या उपरांत व्हड शॉर्ट मारपा खेरीत चड संयम राखपाची गरज आसा अशें हार्दीक सिंगान म्हणलें.
सध्या आमी उत्कृश्ट फॉर्मांत आसात. हो फॉर्म कायम राखपाचो आमचो यत्न आसतलो. तरी, पूण बॉक्सांत चड संयम बाळगुपाची गरज आसा. हो म्हत्वाचो घटक आसा अशें ताणें मुखार म्हणलें.
दुसरे वटेन जपानान बरे गोल सरासरीच्या नेटार सेमी फायनलींतली सुवात निश्चीत केल्या. सर्तींतलें ताचें प्रदर्शन प्रभावीत करपी ना. चीना आडचें जैत सोडलें जाल्यार बाकीच्यो मॅची बादाबाद उरिल्ल्यो. जपानाचो डिफॅन्स घटमूट आसा. भारता आड ताच्या डिफॅण्डरांनी गोल चड गोल पडपाक दिवंक ना. पूण, ताच्या फॉरवर्ड खेळगड्यांक म्हणपा सारकें प्रदर्शन करपाक जमूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
