कॅन्सराच्या नव्या वखदाची मनशाचेर चाचणी
भांगरभूंय | प्रतिनिधी
अॅनाक श्रद्धांजली म्हूण वखदाक AOH1996 नांव
भांगरभूंय । खबरां संस्था
वॉशिंग्टन ः कॅन्सराचेर उपचार करपाच्या मळार शास्त्रज्ञ उदरगत करतना दिसतात. AOH1996 नांवाच्या ‘कॅन्सर वखदा’ची अमेरिकेंत मनशाचेर चांचणी सुरू जाल्या. हें वखद कुडींतल्या निरोगी पेशींक हानी करिनासतना कॅन्सराचे ट्यूमराक नश्ट करुंक शकता अशें शास्त्रज्ञ म्हणटात.
1996 वर्सा जल्मल्ल्या अॅना ऑलिव्हिया हिली हिचे वयल्यान ह्या वखदाचें नांव पडलां अशें शास्त्रज्ञांनी सांगलें. तिका न्यूरोब्लास्टोमा नांवाचो कॅन्सर जाल्लो. अॅनाक 2006 वर्सा मरण आयलें. न्यूरोब्लास्टोमा हो भुरगेपणांत जावपी कॅन्सर. हो मूत्रपिंड ग्रंथींचो कॅन्सर आसून तो पोट, छाती, गळ्याच्या हाडांत जाता. अॅनाक श्रद्धांजली म्हणून कॅन्सर वखदाक AOH1996 हें नांव दिलें.
हें वखद २० वर्सां संशोधन करून तयार केलां. हें वखद कॅन्सर पेशींत मेळपी प्रथिनां आनी प्रलिफेरेटिंग सेल न्यूक्लियर प्रतिजन (PCNA) हांका लक्ष्य करता. ह्या कॅन्सर प्रथिनाक लागूनच ट्यूमर कुडींत पातळटा आनी वाडटा. पयलीं ह्या प्रथिनाचेर उपचार नाशिल्ले, पूण आतां ताचे आड एक नवें वखद प्रभावी थारता. वखद तयार करपी प्राध्यापक लिंडा मलकास सांगता, हें वखद कॅन्सरांतल्या प्रोटीन्साक नश्ट करपाक मजत करता. हाका लागून ट्यूमर बेगीन तयार जायना. ट्यूमर जालो तरी तो ना करपाक हें वखद प्रभावी थारलां. तशेंच कॅन्सराच्यो पेशी मारपाचें काम करता. ह्या वखदाक लागून कसलेच दुश्परिणाम जायनात.
डोस्टारलिमॅब वखदाची क्लिनीकल चांचणी शंबर टक्के प्रभावी जाली. गुदाशय कॅन्सर आशिल्ल्या कांय दुयेंतींचेर डोस्टारलिमाब ह्या वखदाची क्लिनीकल चांचणी केल्या. हाचे वांगडाच फकत 6 म्हयन्यांत कॅन्सराची गाठ पुरायपणान नश्ट जाली. हें संशोधन न्यू इंग्लंड जर्नल ऑफ मेडिसीनांत उजवाडाक आयलां. डोस्टरलिमाब ह्या वखदाक अमेरिकेंत आनी युरोपांत 2021 वर्सा मान्यताय मेळ्ळी. टेसारो कंपनीन 2020 वर्सा ते तयार करपाक सुरवात केली.
2,50,000 दुयेंतींचेर केल्ल्या संशोधनांतल्यान 18 प्रकारच्या कॅन्सराक लागून मरण येवपाचो धोको उणो जावंक शकता अशें दिसून आयलां. कॅन्सर वाडटा तेन्ना तो कुडीच्या वेगवेगळ्या भागांनी नेटान पातळपाक लागता. ऍस्पिरिन वखद कॅन्सर पुराय कुडींत पातळपाक आडायता. हाका लागून कॅन्सराचेर उपचार करपाक एस्पिरिन हें एक प्रभावी वखद म्हणून वळखतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
