भांगरभूंय | प्रतिनिधी
मुखेली हरमनप्रीत सिंगाच्या दोन गोलां नेटार भारतान काल आशियायी चॅम्पियन्स ट्रॉफी हॉकी सर्तीचे रावण्ड रॉबीन लिगेचे आपले निमाणे मॅचींत पाकिस्तानाक 4-0 अशा गोल फरकांनी हारयलो. ह्या जैता सयत भारतात गुणक्रमवारींतली पयली सुवात राखली. भारतान सेमी फायनलींतली सुवात आदींच निश्चीत केल्ली. दुसरे वटेन हे हारीक लागून पाकिस्तानाचें सेमी फायनलींत सुवात मेळोवपाचें सपन भंगलें.
भारतान दरेक क्वॉर्टरींत गोल केलो. हरमनप्रीत सिंगान 15व्या आनी 23व्या मिनटाक पॅनल्टीचेर गोल केले. जुगराज सिंगान 36व्या मिनटाक पॅनल्टी कॉर्नराचेर गोल केलो जाल्यार आकाशदीप सिंगान 55व्या मिनटाक मैदानी गोल केलो.
भारतान अशे तरेन पांचांतल्यो चार मॅची जिखल्यो जाल्यार एक मॅच बादाबाद दवरली. भारत शुक्रारा दुसरे सेमी फायनलींत चवथे सुवात मेळोवपी जपानाच्या पंगडा आड खेळटलो. जाल्यार पयले सेमी फायनलींत दुसरे सुवाते वयलो मलेशियाचो पंगड तिसरे सुवाते वयल्या दक्षीण कोरियाच्या पंगडा आड खेळटलो.
मजगतीं, मलेशियान दक्षीण कोरिया पंगडाक 1-0 अशा फरकान हारोवन आपल्या गुणांची संख्या 12चेर व्हेली. दक्षीण कोरिया, जपान आनी पाकिस्तान हांचे समान पांच गूण जाले. दक्षीण कोरिया आनी जपान ह्या पंगडांनी बऱ्या गोल सरासरीच्या नेटार सेमी फायनलींत सुवात मेळयली. पाकिस्तानाचो पंगड पांचवे सुवाते खातीर प्ले ऑफांत चीन पंगडा आड खेळटलो.
पाकिस्तानान मॅचीचे सुरवातीक आक्रमक खेळ केलो. तिसऱ्याच मिनटाक ताणें गोल केलो. भारतान रिव्ह्यू घेतलो. हातूंत रॅफ्रीन गोल न्हयकारलो. पाकिस्तानाक पॅनल्टी कॉर्नर मेळ्ळो. पूण, गोलकीपर कृष्ण बहादूर पाठकान उत्कृश्ट रितीन गोलपोस्टाची राखण केली.
ते उपरांत भारतान लय मेळयली. ताणें कांय उत्कृश्ट मुव्ह वरवीं पाकिस्तानाच्या खेळगड्यांक व्यस्त दवरले. भारताक हाचो फायदो पयल्या क्वॉर्टरांत मेळ्ळो. क्वॉर्टराच्या निमाण्या खिणाक भारताक पॅनल्टी कॉर्नर मेळ्ळो. हरमनप्रित सिंगान पॅनल्टी कॉर्नर गोलान रुपांतरीत करून भारताचें खातें उगडलें. 23व्या मिनटाक भारताक आनीक एक पॅनल्टी मेळ्ळी. हरमनप्रितान परतून येसस्वी रितीन आपलो आनी पंगडाचो दुसरो गोल केलो.
मध्यांतरा उपरांत दोनूय पंगडांनी गोल करपाचो खर यत्न केलो. पूण, गोल करपाक भारतान येस मेळयलें.
खेळाच्या 36व्या मिनटाक गुरजंत सिंगान पॅनल्टी कॉर्नर मेळयलो. हे खेपे हरमनप्रित सिंगाच्या बदला जुगराज सिंगान जापसालदारकी सांबाळ्ळी. ताची ड्रॅग फ्लिकांत बरीच ताकद आशिल्ली. पाकिस्तानाच्या गोलकीपराच्या हाताक लागून लेगीत बॉल जाळांत गेलो.
तीन मिनटां उपरांत गोल करपाची आनीक एक संद भारता कडेन आशिल्ली. पूण, बॉल गोलपोस्टाक तेंकून गेलो.
चवथ्या क्वॉर्टरांत आकाशदीपान मैदानी गोल करून भारताचो स्कोर 4-0 केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
