आमी न्हय, युती शिवसेनेन तोडली : मोदी
भांगरभूंय | प्रतिनिधी
भांगरभूंय । खबरां संस्था
नवी दिल्ली : प्रधानमंत्री नरेंद्र मोदी हांणी शिवसेना (ठाकरे गट) पक्ष मुखेली उद्धव ठाकरे हांचेर टिका केल्या. ‘भाजपान न्हय, जाल्यार शिवसेनेन युती तोडल्या’ अशी टिका प्रधानमंत्र्यानी उद्धव ठाकरे हांचेर केल्या. तशेंच 2024 वर्सा जावपी वेंचणुकेंत राष्ट्रीय लोकशायेक (एनडीए) दणदणीत जैत मेळटलें, असो विस्वास प्रधामंत्री मोदी हांणी उक्तायला.
महाराष्ट्रांतल्या ‘एनडीए’च्या खासदारां कडेन मोदी हांणी चर्चा केली. तेन्ना तांणी ‘भाजपाने न्हय, शिवसेनेन युती तोडली. गरजे भायर वाद निर्माण केले. पूण आमी ते सोंसले. एके वटेन सत्तेर रावप आनी दुसरे वटेन टिका करप. हें कशें शक्य आसा?’ अशें म्हणलें.
बिहारांत 2020 वर्सा जाल्ले विधानसभा वेंचणुकेंत भाजपाक 74 आनी जनता दल युनायटेडाक (जेडीयू) 43 सुवातो मेळिल्ल्यो. तरीय नितीश कुमार हांकां मुख्यमंत्री केले, अशें प्रधानमंत्री मोदी हांणी फुडें म्हणलें.
काँग्रेसी प्रमाण भाजपा अहंकारी न्हय. 2024 वर्सा जावपी लोकसभा वेंचणुकेंत एनडीएक जैत फावो जातलें असो विस्वास प्रधानमंत्र्यानी उक्तायलो.
राऊत हांचें प्रधानमंत्र्यांक प्रत्युत्तर
शिवसेनेन युती तोडली, अशें प्रधानमंत्री म्हणटात, जाल्यार ते दिकाभूल करतात. 2014 ची परिस्थिती प्रधानमंत्र्यांक याद आसपाक जाय. 2014 वर्सा युती कोणी आनी कित्याक तोडली हें पुराय देशान आयकलें आनी पळयलें. उपरांत शिवसेना स्वतंत्र लढली. आमची युती तुटली, आमी वेगळे जाले, अशें भाजपा वतीन एकनाथ खडसे हांणी ठाकरे हांकां फोन करून सांगलें. ताका लागून शिवसेनेची साथ कोणी सोडली, हाचे आदले रेकॉर्ड प्रधानमंत्र्यांनी तपासून पळोवंचे, अशें खासदार संजय राऊत हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
