भांगरभूंय | प्रतिनिधी
चर्च संस्थेन आपली पोरणी भुमिका अजून सोडूंक ना, हाचे संकेत आर्चडायोसिसाच्या ‘रेनोव्हासांव’च्या आॅगस्टाच्या अंकांतल्या एका लेखांत मेळटात. हें एकूणच प्रकरण फक्त गोंयकार हिंदू, क्रिस्तांव भावांक भडकावपी आसाच, पूण हिंदु विशीं तांच्या मनांत वीख कालोवपी आसा. गोंयचो भावचार इबाडपी आसा, अशें हिंदू रक्षा महाआघाडी, गोंय हे संघटनेचें मत. आमी ताचो निशेध करतात. एकूण प्रकरणाची सरकारान गंभीर दखल घेवपाक जाय, अशी मागणीय करतात.
वाचप्यांचे म्हायती खातीर आॅगस्ट 1- 15 च्या रेनोव्हासांव अंकांतल्या लेखांतले हे कांय मुद्दे दितां.
1. मणिपुरा उपरांत मानवी जिविताच्या सर्वंकश विध्वंसाचें (होलोकाॅस्ट) गोंय राज्य लक्ष्य जावपाची शक्यताय आसा. पुर्तुगेज वसाहवादाच्यो खुणो नश्ट करतले, पुर्तुगेजांनी उध्वस्त केल्ल्या देवळांचें पुनर्निर्माण करतले, ह्यो मुख्यमंत्री डाॅ. प्रमोद सावंत हांच्यो घोशणा म्हणल्यार गोंयांत जावपी होलोकाॅस्टाची तयारी.
2. अल्पसंख्यांकांक सोंपोवप ही तांची विचारसरणी आसा.
3. सेक्युलर आनी लिबरल हीं दोन उतरां म्हणल्यार गाळीच अशें ते थारावपाक लागल्यात.
4. ते पवित्र जनावराच्या राखणेच्या निमतान फक्त दुबावा वयल्यान माॅब- लिचिंग (चोंबो करून येवन मनशाक मारप) करपाक लागल्यात.
5. तुमच्या आज्या- पणज्यांनी 1967 वर्सा ओपिनियन पोला वरवीं गोंय वाटायलें. आयज डाॅ. जॅक सिकेरा नात आनी गोंयकार संघटीत नात.
6. आयज चर्ची मोडपाची शक्यताय आसा. धर्मगुरुंक मारपेट जावपाची शक्यताय आसा… आनी तुमचें कुटुंब… मतींत आसूं दी.
7. प्रायश्चित म्हूण निदान गोंयांतल्यान दोन सेक्युलर प्रतिनिधी तरी वेंचून दिल्लीक धाडूंक जाय.
‘गोवन्स नीड टु युनायट… आॅर दे विल पेरीश’ (पान क्र. 10) ह्या डाॅ. एफ. ई. नोरोन्हा हांणी बरयिल्ल्या ह्या लेखांत वयले मुद्दे आसात.
रेनोव्हासांव हें आर्चडायोसिसाचें मुखपत्र. चर्चीची गोंयच्या समाजांत फूट घालपी भुमिका आसल्यार हिंदू रक्षा महाआघाडी तिचो विरोध करता. तशी ती ना जाल्यार चर्चीन योग्य तो खुलासो करचो आनी आपल्या अधिकृत मुखपत्रांत ही भुमिका छापून हाडिल्ले खातीर गोंयकारांची माफी मागची, अशी मागणी हिंदू रक्षा महाआघाडी करता.
तशेंच चार जापसालदार धर्मगुरुंनी केल्ल्या विधानांचेर चर्चसंस्थेन आपली प्रतिक्रिया दिवची, अशी मागणी महाआघाडी करता. सां जासिंतो जुंव्याचेर बावटो हुबारपाक सुरवातेक धर्मगुरून केल्लो विरोध, गोंयच्या 60 व्या मुक्तिदिसा धर्मगुरू सुकूर मेंदिश हांणी केल्लें देशविरोधांतलें भाशण, पुर्तुगेजांनी मोडलीं तीं देवळां हिंदूंचीं न्हय, तर हेर पंथांचीं आशिल्लीं, असो फादर व्हिक्टर फेर्रांव हांणी बरयिल्लो लेख, फादर बोलमॅक्स परेरा हांचें शिवाजी महाराजां वयलें वादग्रस्त उलोवप हीं तीं विधानां.
हिंदू रक्षा महाआघाडी फुडाराक ह्या ‘डिनॅशनलायजेशना’च्या यत्ना आड जागरण मोहीम सुरू करतली.
– सुभाष भास्कर वेलिंगकार,
राज्य निमंत्रक,
हिंदू रक्षा महाआघाडी, गोंय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
