कोल्ड आउट शारोप विखारी

भांगरभूंय | प्रतिनिधी

भांगरभूंय । खबरां संस्था
फाटल्या कांय म्हयन्यांत भारतांत तयार केल्ल्या बनावट वखदां आनी खोंकलेच्या शारोपाचेर (सिरप) सतत प्रस्न निर्माण जाल्यात संवसारीक भलायकी संघटनेन आनीक एक भारतीय खोंकलेच्या शारोपाचेर इशारो जारी केला. ह्या शारोपाचो नमुनो इराकांतल्यान घेतलो आनी ताची चांचणी करपा खातीर प्रयोगशाळेंत धाडलो. भारतांत तयार केल्ल्या ह्या कोल्ड आउट शारोपांत डायथिलीन ग्लायकोल (0.25%) आनी इथिलीन ग्लायकोल (2.1%) आसता अशें कळ्ळां. जें भलायके खातीर खूब हानिकारक आसा.
डब्ल्यूएचओन जारी केल्ल्या निवेदनांत, इथिलीन ग्लायकोल आनी डायथिलीन ग्लायकोल ह्या दोनूय प्रकारां खातीर 0.10% मर्यादा थारायल्या. हाचे चड सेवन करप हें कुडीक विखारी पदार्थ दिवपा सारकें आसूं येता. हाचे आदीं जायत्या कंपनींच्या खोंकलेच्या शारोपाचेर प्रस्न निर्माण जाल्ले. संवसारांतल्या जायत्या देशांनी खोंकलेच्या शारोपाक लागून 300 परस चड भुरग्यांक मरण आयले उपरांत डब्ल्यूएचओन शिटकावणी जारी केलो. गाम्बिया आनी उझबेकिस्तानांत भुरग्यांक मरण आयले उपरांत भारतीय कंपनींचीं नांवां उजवाडाक आयलीं आनी उपरांत सरकार आनी डब्ल्यूएचओन ह्या वखदांची चवकशी केली. हे संबंदी कांय कंपनींचेरूय कारवाय जाली.
सरकारान नेमांतय बदल केल्यात आनी सरकारी लॅबांत चांचणी करिनासतना खंयचेच कंपनीक वखदां परदेशांत धाडूंक मेळची नात. तशेंच जर कोण नेमांक पाळो दिना जाल्यार ताचें उत्पादन बंद करतले अशें सरकारान सांगलें. हे नेम 1 जून 2023 सावन चालीक लायले.