भांगरभूंय | प्रतिनिधी
राजधानी दिल्लीचो बॉस मुख्यमंत्री न्हय जाल्यार नायब राज्यपालूच आसतलो, हें देशाचे संसदेंत थारिल्लें आसतना
थंय उत्तर प्रदेशांतल्या वाराणशी हांगासरल्या ज्ञानव्यापी मशिदीचेर हक्क कोणाचो हाचे वयल्यान सुरू आशिल्ल्या बोवाळाचेरूय भारतीय पुरातत्व विभागा कडल्यान रोखडोच सोक्षमोक्ष लागपाची शक्यताय आसा. ज्ञानव्यापी वैज्ञानीक पळोवणी आडावपा खातीर मुस्लीम पक्षान सर्वोच्च न्यायालया मेरेन दाद मागली, पूण तांकां तातूंत येस आयलें ना. भारतीय पुरातत्व विभागा कडल्यान सद्या ज्ञानव्यापीचें सर्वेक्षण चालू आसून ह्या सर्वेक्षणांतल्यान नेमकें कितें निश्पन्न जाता हाचे कडेन समेस्त हिंदू पक्षाचें लक्ष लागून आसा. वाराणशीत ज्ञानव्यापी म्हणून वळखुपी मशीद हिंदूंचें मंदीर उद्धवस्त करुनूच बांदिल्ल्याचो दावो हिंदू पक्षाचो आसून, ह्या मशिदीची पळोवणी केल्यार तें कोणाकूय दिसून येतलें अशें तांचें म्हणणें आसा. हाका मशीद न्हय जाल्यार ज्ञानव्यापीच म्हणात, त्रिशूल, स्वस्तीक आनी हिंदू देवांच्यो प्रतिमा थंय स्पश्टपणान दिसून येतात अशें उलोवप करून मुख्यमंत्री आदित्यनाथ योगी हांणी जाल्यार मुस्लीम पक्षाक एके तरेन आव्हानूच दिलां. वाद गरजे भायर चिगळावं नाकात अशी विनंती आनी सल्लोय दिला. मुख्यमंत्री योगी हांणी घेतिल्ले रोखठोक भुमिकेचें सगल्यांकूच अजाप दिसत आसलें तरी आतां ज्ञानव्यापी लेगीत बाबरी मशिदी प्रमाण अयोध्येच्या मार्गानूच ल्हवू ल्हवू वाटचाल करूंक लागिल्ल्याचें स्पश्ट संकेत मेळूंक लागल्यात.
वाराणशींतल्या जगप्रसिद्ध बाबा काशी विश्वनाथ देवळाचे लागसार आशिल्ल्या ज्ञानव्यापी मशिदी वयल्यान चालू आशिल्लो हो वाद तसो बरोच पोरणो. सतराव्या शेंकड्यांत म्हणल्यार 1699 त औरंगजेबान काशी विश्वनाथाचें देवूळ मोडून ज्ञानव्यापी मशीद उबारिल्ल्याचो इतिहास मुखार आयिल्ल्यान आतां ल्हवू ल्हवू पूण एका निश्चीत अशा निश्कर्शा मेरेन हिंदू पक्ष येवन पावला आनी भारतीय पुरातत्व विभागा कडल्यान चालू आशिल्ल्या सर्वेक्षणांतल्यान एकूण दाव्याक पुरक अशा खूबशा गजालींचेर उजवाड पडूंक लागला. आयज संवसारभरांतल्या हिंदू भाविकांचें श्रद्धास्थान आशिल्ल्या बाबा काशी विश्वनाथ देवळाची उबारणी इंदूरच्यो महाराणी अहिल्याबाई होळकर हांणी केल्ली. लागींच आशिल्ली मशीद कुशीक काडची अशी मागणी करपी याचिका सगल्यांत पयलीं सादारण 32 वर्सां आदीं न्यायालयांत दाखल जाल्ली. उपरांत हे मागणेक खऱ्या अर्थान चालना मेळ्ळी ती 2019 वर्सा, आनी चार वर्सांत भारतीय पुरातत्व विभागाच्या सर्वेक्षणान एकूण चित्र बरेंच बदल्लां. बाबा काशी विश्वनाथ देवळाच्या शेजराच आशिल्ल्या मशीद वाठारांत दीसपट्टो श्रृंगार गौरी देवीची पुजा करून घेवपाक परवानगी मेळची अशी मागणी करीत पांच बायलांनी फाटल्या वर्सा जिल्हो न्यायालयांत याचिका दाखल केल्ली. जिल्हो न्यायालयान मशिदीचें सर्वेक्षण आनी व्हिडिओग्राफी करपाचो आदेश दिले उपरांत तातूंतल्यान जे पुरावे मेळत गेले तातूंतल्यान ही लडाय सर्वोच्च न्यायालया मेरेन पावली, आनी वट्ट सर्वेक्षणांतल्यान हिंदू पक्षाचो दावो आनीक घटमूट जायत गेलो. ज्ञानव्यापीचेंय तेंच जावंक शकलें जें बाबरी मशिदीचे बाबतींत जालें असो विस्वास उक्तायतात.
मुस्लीम पक्षान आतां ज्ञानव्यापी प्रकरणांत अदीक अट्टाहास करिनासतना स्वता जावन मुखार येवन इतिहासांत जाल्ली चूक सुदारपा खातीर प्रस्ताव सादर करपाची गरज आसा आनी तोच ह्या प्रकरणांत योग्य उपाय थारूंक शकतलो अशें सांगून मुख्यमंत्री आदित्यनाथ योगी हांणी मुस्लीम पक्षा खातीर मुखार कसलें ताट वाडून दवरलां हाचो जणू संदेशूच दिला अशें म्हणूंक येतलें. बाबरी मशिदीच्या प्रकरणांत निमाणें कितें मेळ्ळें हाची कल्पना आशिल्ल्यान वेळारूच तसो पवित्रो घेनासतना सहकार्याचो हात मुखार केल्यार कसल्याच वादा बगर हाचेर सहमती जावंक शकतली अशें जेन्ना मुख्यमंत्री योगी म्हणटात तेन्नाच ज्ञानव्यापीचो लढो एक तरी आमी जिखिल्ल्याचें तांकां सांगपाचें आसा हें कळून येता. सद्या चालू आशिल्ल्या सर्वेक्षणाक सर्वोच्च न्यायालयान दिल्ल्या आदेशा उपरांतूय आडखळी हाडपाचें मुस्लीम पक्षाचें यत्न दिसतात आनी सर्वेक्षणाचेर बहिश्कार घालपाचो पवित्रोय तांणी घेतला. वाद चिगळावपा खातीर हो खटाटोप चालू आसलो तरी सर्वेक्षणांतल्यान आतां खूबशो गजाली भायर येवंक लागल्यात. ज्ञानव्यापी वाठारांत जमनी पोंदा देवळा वयल्या शिखरा प्रमाण दिसपी भाग एएसआयच्या पंगडाक दिसून आयला आनी ह्या वाठारांत पयलीं देवूळ आशिल्लें हें सिद्ध जावंक शकतलें अशी खूबशी म्हायती हाताक लागिल्ल्यान मुस्लीम पक्षाची सामकी कोंयडी जाल्ल्याचें दिसून येता. उपरांतूय ‘बाबरी मशीद तर आमी दिली आतां आमी ज्ञानव्यापीकय दिवची’ असो कांयसो सूर मुस्लीम पक्ष आळयतना दिसून येता.
अयोध्येंत बाबरी ह्या नांवान वळखुपी मशिदूच नाशिल्ली अशें बाबरी खटल्या वेळार खूबशे मुस्लीम फुडारी सांगताले. पूण राजकी कारणांक लागून ताचे कडेन हेतुपुरस्सर आडनदर केली हो इतिहास ताजो आसलो तरी बाबरी मशीद प्रकरणांत सर्वोच्च न्यायालयान दिल्ल्या निवाड्या उपरांत ताचें म्हत्व आतां कांयच उरिल्लें ना आनी ह्या निवड्या उपरांत फाटल्या अडेज, तीन वर्सांत अयोध्येंत भव्य अशें श्रीराम देवळानूय आकार घेतिल्लो दिसता. नव्या वर्साचे सुरवेकूच मकर संक्रातीच्या सुमाराक हें देवूळ भाविकांक उक्तें जावपाचे संकेत मेळत आसात. हेच फाटभुंयेर ज्ञानव्यापीचो विशय चर्चेक येत आसून ह्या प्रकरणांतली सत्य स्थिती लोकां मुखार येवची हे खातीर हिंदू पक्ष यत्न करतना दिसता. अयोध्या प्रकरणांत केल्ली घोडचूक मुस्लीम पक्षान परतून न करप हेंच बऱ्याचें आसून वस्तुस्थिती कितें आसा ती स्विकारची होच सगल्यांचो आग्रो दिसता. ज्ञानव्यापी प्रकरणांतलें सत्य आतां रोखडेंच भायर येवपाचें आशिल्ल्यान अदीक ताणून धरून लेगीत कांयच साद्य जावचें ना हाचें भान दवरुनूच सत्य स्विकारपाची मनाची तयारी मुस्लीम पक्षाक दवरची पडटली. ज्ञानव्यापीचें सत्य उजवाडा येवपा पसून आडावपाचे आतां मेरेन यत्न जाल्ले नात अशेंय न्हय. पूण हें सगलें आतां खंय तरी थांबपाची गरज आसा. मशीद-मंदीर वाद देशाक नवो न्हय. हिंदू संघटणेच्या अजेंड्याचेर अजून लेगीत अशीं खूबशीं थळां आसात की हाचे मुखार तीं वादाचो विशय थारूंक शकतलीं. मथुरेंतूय सर्वेक्षणाची मागणी जायत आसा. पांच राज्यांतल्या धा मुखेल मशिदीं वयल्यान बोवाळ निर्माण जाल्ले प्रस्न आतां तडजोडीन सोडोवपांतूच सगल्यांच्याच फायद्याचें आसा हातूंत कसलोच दुबाव ना.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
