भांगरभूंय | प्रतिनिधी
बाणस्तारी आयतारा अपघात जालो. तिगांक मरण आयलें. तीग जाण गंभीर जखमी जाल्यात. पांच गाडयांक धपको दिवपी मर्सिडीझ बँझ खूब वेगान आशिल्ली. ती चलोवप्याक फाटल्या दोन म्हयन्यांत हजार, देड हजारांचे स तालांव पडल्यात. ते फारीक जावंक नात, हें आॅनलायन दिसता. गाडी चुकीचे दिशेन चलयिल्ल्यान अपघात जालो. ती खूब वेगान आशिल्ली अशें अपघात प्रत्यक्ष पळोवपी सांगतात. सरकारान हो अपघात गंभीरपणान घेतला, अशें येरादारी मंत्र्याच्या उलोवण्यां वयल्यान दिसता. मात कितेंय जालें तरी वेगान आनी नशेंत गाडी चलोवप्यांक खर ख्यास्त ही जावपाकूच जाय, हें कोणूय मान्य करतलो.
अपघातांत कोण मरतात, जाल्यार गाडी चलोवप्यान केल्लो तो खूनच!! ताका लागून मरप्यांच्या कुटुंबाक अपघात करप्या कडल्यान लुकसाण भरपाय ही मेळपाक जाय. ते नदरेन कायदो जावचो, अशें येरादारी मंत्र्याक दिसता. अपघात, दुर्घटना ही चुकून वा सैमीक कारणान जाता. मरपी- जखमी जावपी केन्ना- केन्ना स्वताचे चुकीक लागून मरता- जखमी जाता तेन्ना एक समजूं येता. पूण, सोरो पियेवन वेगान गाडी चलोवप तिवूय अशीर रस्त्यार, ही मस्ती जाली. पुलिसांनी तपासकामांत घुस्पागोंदळ केल्यार आपूण सोंसून घेवचो ना, अशेंय येरादारी मंत्र्यान म्हणलां. नवो येरादारी कायदो लावपाचें वक्तव्य तांणी केलें. तातूंत कडक तालांव आसा. मात ताणें अपघात उणें जातले हाची खात्री दिवं नजं. कारण हांगा दर सप्तकाक तालांव घेवपी ड्रायव्हर आसात. एआय यंत्रणेचो डाटा तपासल्यार पुराव्यान सिद्ध जातलें.
नशेंत गाडी चलोवप हें एक कारण जालेंच. पूण इबाडिल्ले ‘फोंडकूल रस्ते’, अशीर आनी रुंद रस्ते, वाटेर काळोख, झेमत- लकणी घेत गाडी चलोवप, लागीं-लागीं सिग्नलां, बेशिस्त, मद, नेम पाळप ना, गजाली, फाजील आत्मविस्वास अशीं जायतीं कारणां अपघातां फाटल्यान आसतात. अशीर रस्त्यार वेगान गाडी धोपरावपी कानांत वारें भरिल्ले पाडका भशेन वागतात. रुंद रस्तो दिसलो काय ते शंबराची मर्यादा हुपतात. मागीर कोण अचकीत मदीं आयलो काय दोगांयचो कपाळमोक्ष. गजाली करपीय चालक आसात. कुशीक वा फाटल्यान बायलेक वा मोगिकेक बसोवन गजाली मारीत चलोवप्याचें फुडल्यान येवपी, वचपी गाडयेचेर लक्ष नासता. मोबायलाचेर उलोवपी वा मॅसेजी वाचीत गाडी चलोवपी नवे चालक तयार जाल्यात. कांय जाणांक आपणाचो गाडयेचेर कंट्रोल आसा, असो अती आत्मविस्वास आसता. तो तांकां फोंडांत घालता. थोडे सिग्नलांक विटिल्ले आसतात. पर्वरेचो वाठार हुपपाक अर्दवर लागता. येरादारीचे कोंयडेंत सांपडिल्ले मागीर गाडयेचो वेग वाडयतात. जागरणां, नशा करून चलोवपीय चड करून रातचे मेळटात. तातूंत गिरेस्तकायेचो, जुंवानपणाचो जोश आशिल्ली ड्रायव्हरांची एक जमात आसा. तांकां गाडी म्हणजे विमान कशेंच दिसता. हातूंत दुचाकी चलोवपीय आसात. आनीक एक गजाल जाता, जिवाक भियेवन सामकीच सवकासायेन गाडी चलोवपी आसात. तांकां लागून फाटल्यान रांक लागता आनी अर्द वरा उपरांत ओव्हरटेक करपाची संद मेळटकूच घुडांतल्यान एकदम धुकर भायर सरचे तशे सगलेच धांवतात आनी…. अपघात जाताच. सामकीं सवकास चलपी म्हाल व्हरपी ल्हान- व्हड वाहनांय दुसऱ्या ड्रायव्हराचें पाशिंयेस पेड्डेर करतात. अर्दवर गाडयांच्या पुरसांवांत उरतकच ड्रायव्हराची मनस्थिती कितें जाता, ती ताकाच खबर. सांगपाचो उद्देश पुलीस, आरटीओ, सरकार हांचे परस वाहनचालक स्वता सादूर रावले, नेम पाळ्ळे, बेजार जाले नात जाल्यार अपघात उणें जातले. भौशीक येरादारी आनीक सक्रिय केल्यार घडये रस्त्यां वयल्या खाजगी गाडयांचो आंकडो उणो जावये.
सोऱ्या खातीर दरेका वाहनाची तपासणी करप शक्य ना, अशें मुख्यमंत्र्यान सांगलें. पूण हाचेर कितें तरी उपाय काडचो पडटलो. बाणस्तारीचो अपघात ड्रायव्हरान सोरो पियेल्ल्यान जाला, अशें पुलिसांक दिसून आयलां. वन फोर द रोड घेवं येता, पूण गाडी चलयतना न्हय. पुलीस तालांव घालतात, तेन्ना तांणी अल्कोमिटर वांगडा घेवन ड्रायव्हराक तपासप बरें. पूण प्रत्येक गाडी आडावन तिची आनी ड्रायव्हराची तपासणी केल्यार पणजेच्यान म्हापश्यां पावपाक एक दीस लागतलो.
गोंयांत खाजगी गाडयो हिस्पा भायर वाडल्यात. कोरोना उपरांत खाजगी बशींचो आंकडो देंविल्ल्यान तातूंत आनीक वाड जाल्या. शिस्तींत गाडी चलोवंक ना जाल्यार आपूण संकश्टांत पडटलेच आनी निश्पाप लोकांकूय तांची कांयच चूक नासतना त्रासांत उडयतले. बाणस्तारी अपघाता पसून हेर वाहनचालकांनी बोध घेवचो. 1980 च्या दसकांत अपघातांचें प्रमाण पळोवन गोंयचो ‘किलर स्टेट’ असो उल्लेख एका राज्यपालान केल्लो. तें खत पुसून उडोवपाचो यत्न करुया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
