भांगरभूंय | प्रतिनिधी
हांगाच्या मेयर राधाकृष्णन स्टेडियमार चालू आशिल्ले आशियायी चॅम्पियन्स ट्रॉफीचे चवथे रावण्ड रॉबिन मॅचींत येजमान भारतान दक्षीण कोरियाक 3-2 अशा गोल फरकांनी हारोवन सेमी फायनलींतली सुवात निश्चीत केली.
भारता वतीन निलाकांत शर्मान 6व्या मिनटाक, मुखेली हरमनप्रीत सिंगान 23व्या मिनटाक आनी मनदीप सिंगान 33व्या मिनटाक गोल केलो. कोरिया वतीन किम सुंगह्युनान 12व्या आनी येंग जिहुनान 58व्या मिनटाक गोल केलो.
ह्या जैता उपरांत भारत चार मॅचींतल्यान 10 गुणां सयत वयले सुवातेर पावलो. भारतान तीन मॅचींनी जैत जोडलां, जाल्यार एक मॅच बरोबरीचेर समाधान मानचें पडलां. भारत रावण्ड रॉबिनांतली आपली निमाणी मॅच बुधवारा पाकिस्ताना आड खेळटलो.
मॅचीचे सुरवातीच्या खिणाकूच भारतान आघाडी घेतली. सुखजीतान नीलकंठ शर्माक पास दिलो. ताणें गोल करपाक कांय चूक केली ना. सव्या मिनटाक गोल करून भारतान 1-0 अशी आघाडी घेतली.
भारताची ही आघाडी चड वगत तिगूंक ना. किम सुंगह्युनान किमाक पास दिलो. तो भारताच्या सर्कलाचे धडेर उबो आशिल्लो. ताणें जलद रितीन बॉल गोल पोस्टांत घालो आनी स्कोर 1-1 असो केलो.
भारतान परतून आक्रमक सुरू केलें. ताचो ताका फायदो जालो. भारताक पॅनल्टी कॉर्नर मेळ्ळो. मुखेली हरमप्रीत कौरान पॅनल्टी कॉर्नराचेर गोल करून भारताक परतून आघाडी मेळोवन दिली. तिसरो क्वॉर्टर सुरू जायना फुडें भारतान तिसरो गोल केलो. 33व्या मिनटाक मनदीप सिंगान हो गोल केलो. शमशेरान दोन डिफॅण्डरांच्या मदल्यान सर्कलांत बॉल मनदीप दिलो. मनदीपान गोल करून स्कोर 3-1 असो केलो. ते उपरांत कोरियान आनीक एक गोल करून स्कोर 2-3 असो केलो. पूण, ताका बरोबरी सादपाक जमली ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
