भांगरभूंय | प्रतिनिधी
एका शिकिल्ले चलयेच्या बापायचो फोन आयलो. ताका चलये खातीर मार्गदर्शन जाय आशिल्लें. तें जर लागीं आसा तर ताकाच उलोवनी अशे सांगतकच तीच चली उलयली. ताणें खंय मुलाखत दिल्ली आनी तातूंत तें यशस्वी जावंक नाशिल्लें. आतां हांव कितें करू? असो ताचो प्रश्न आशिल्लो. हांवें ताका योग्य तें मार्गदर्शन केलें. सर्गेस्त कलाम साहेबांच्या जिणेंतली गजाल आमकां खबर आसतली. तांकां लेगीत अपेस सोंसचें पडलें तेन्ना तांकां मार्गदर्शन करतना एका स्वामींन म्हणलें की जें जाता तें बऱ्या खातीर जाता. हाच्या परस बरें कितें तरी तुजी वाट पळयता आसत. तेन्ना तूं निराश जावं नाका. बरेच वेळा आमचेर असो प्रसंग येता तेन्ना कितें करचें तें कळना. आमी सिंहावलोकन करून कितें चुकलें हाचो विचार करूं शकतात. मुलाखत बरी जावची अशीं जायतीं पुस्तकां मेळटात तीं वाच्चीं. तशेंच जो विशय आवडटा ताचेर मेळटा तर कोर्स करप. ना जाल्यार पुस्तकां वाचप हें करूं
शकतात.
जायत्या उमेदवारांचे तकलेंत संगणकाक बरे दीस आयल्यात, अशें दिसता. पालक लेगीत आपल्या भुरग्याक संगणकाची आवड आसा अशें सांगतात. गजाल खरी आसत, पूण ताणें कोर्स तरी केला असो प्रस्न केल्यार तांचे कडेन जाप आसना. खेरीज तांणी कोर्स केला तरी आतां ह्या फाट्यान जायते बदल जायत आसात हाची तांणी नोंद घेतल्या? हाचेरूय तांची जाप आसना. जेन्ना संगणकाचो कोर्स आमी करतात, तेन्ना ताचो सराव करचो पडटा. कित्याक तर हाचें तंत्रज्ञान बदलत आसता. कोर्सा वेळार शिकिल्लें वचून नवे आयिल्लें आसता. आमी कसल्या तरेचो कोर्स करतात? तो संगणक कसो चलोवचो हो कोर्स ना मुं? खरेंतर एक्सेलाचेर ती म्हायती घालून ताची कारणा सोदपाचें काम आमी शिकूंक जाय. जीं साधना आसतात तांची बारकायेन म्हायती आमी घेवपाक जाय. सद्या खंयच्या फाट्यांत भास जाय पडटा ती भास तुमी आपल्या आपूण विकसित करूं शकतात. आतां तर ऑनलायन शिकपाची सुविधा आसा. एक अभ्यास म्हूण साधना कसली आसा? आनी सदा खातीर आमी खंयची वापरतात? हांचेर लक्ष दिवं येता. हाचेर पुस्तकां लेगीत मेळटात. त्या खेरीज यु ट्यूबाचेरूय म्हायती मेळटा. संगणक ऑपरेट करप वेगळें आनी इंजिनियरिंग करप वेगळें. हो फरक आमी जाणून घेवपाक जाय, चडशे हांचेर काम करपी मनीस ऑफिसांनी दिसतात ते ऑपरेट करपी. ताका इंजिअनियर जावपाची गरज नासता. घरांत संगणक कित्या खातीर वापरचो? हांच्या खातीर ज्यो सोयी सुविधा आसता ते काम इंजिनिअर करता. जर एखादो संगणक चलना जाल्यार आमी तज्ञांक आपयतात. हो वावर दुसरो मनीस करता. जर तुमी ह्या मनशांक मेळशात तर तुमकां बरीच म्हायती मेळूं शकता. जर तुमका फुडें वाचून शिकपाचें आसा तर डिस्टन्स शिक्षण दिवपी विद्यापीठान प्रवेश घेवपाक विसरू नाकात.
करियरा भितर निरीक्षणाक खूब महत्व आसता. तुमी जर लागींच्या राष्ट्रीयकृत बॅंकेन गेले तर थंयचो स्टाफ चुकून स्थानिक आसू शकता. मागीर तुमका हिंदी ना जाल्यार इंग्लेज भास उलोवची पडटा. तुमी हांचेर विचार करू शकता. जांकां ही भास येना तांकां अडचण येवची ना? मागीर तुमी बॅंकेच्या फाट्यान कित्याक येवचें न्हय? हो प्रस्न पडलो की हाचे खातीर कितें करचे पडटलें ? परीक्षा तर दिवचीच पडटली
पूण ह्या फाट्यांक फाव तें गिन्यान हांव घेवपाक सुरु करतलों हें मनावर घेवपाक जाय. ते खातीर पुस्तकां मेळटात. एकाद्या अनुभवी कर्मचारी वा ऑफिसर म्हायती दिवं शकता. जी गजाल बॅंक फाट्याची तीच गजाल हेर फाट्यांची. मनांत आतां सावनूच निर्धार करात आनी एक विसरू नाकात की कांय कारणाक लागून जर तुमकां तुमच्या मनांतलो फाटो मेळूंक ना जाल्यार तुमचे लागी पर्याय आसुंकूच जाय. Try your best but expect worst हे धर्तीवर तुमी अभ्यास करूंक जाय . हातूंतल्यान तुमका निरर्शेवणी येवपाची शक्यता उणी.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
