भांगरभूंय | प्रतिनिधी
म्हजें नांव सान्न आनी हांव वयलें वाड्यार रावतां. सान्न म्हणटगच तुमच्या मनांत खूब प्रस्न उप्रासल्यात आसतले न्ही? ही आनी कसली सान्न काय म्हणून? पूण तुमी चिंत्तात तसली फॅशनेबल सान्न न्हय हांव. माडांच्या चुट्टाच्या व्हिरां पसून तयार केल्ली हांव अदीक मोलाची सान्न. कोण म्हाका सारण म्हणटात, कोण सान्न म्हणटात. म्हणटात, कितेंय म्हणटात. पूण म्हजें दुख्ख वेगळें. म्हजें आतां मोल खूब कमी जालां.
आदल्या काळार लोकांचीं शेणां-मातयेचीं घरां तशींच आंगणां आशिल्लीं. घरां-आंगणांत सान्न मारपाक वा शेण सारोवपा खातीर लोक म्हाका दुकानांनी विकती घेवपाक गर्दी करताले, तशेच सान्न विणटल्यागेर स्वताचे व्हीर घेवन वताले. सान्न विणपी आतां फक्त गांवांनी मेळटात. शारांनी चुकून खंय एकादो मेळटा आसत.
आदल्या तेंपार हांव खूब सवाय आशिल्लें. सगळो लोक म्हजो खूब आदार घेतालो. जसो-जसो काळ बदलत गेलो तशी अर्थीक परिस्थिती बदलपाक लागली. शेणां-मातयेचीं घरां मोडून लोक सिमेण्टाचीं, टायल्साचीं घरां वांदपाक लागले. आंगणांत तशेंच घरांत टायल्स आयले. टायल्सांचेर व्हिरा सान्न घेवन सान्न मारल्यार टायल्स झरतले असो म्हजो मालक म्हाका दुशणां दिवपाक लागलो आनी बाजारांत वचून फॅशनेबल सान्न विकती घेवन आयलो. ताणें म्हाका काडून खोंपींत उडयले. मालकाचीं हीं उतरां आयकून म्हाका खूब दुख्ख जालें पूण हांव वोगी कोनशाक बसून रावलें.
आतां आनी कितें करतलें, कोणाकच म्हजी पर्वा ना. म्हजें दुख्ख आयकुपाक कोणूच तयार ना. म्हजें निर्शेणीचें दूक दोळ्यांतूच झिरून गेलें. आतां हांव फक्त म्हज्या निमाण्या दिसाची वाट पळयतां.
अशेंच तीन-चार दीस निराशी रावनच गेल्ले, अचकीत खूब वारो मारून घसघशीत पावस पडलो, वार्यान घरच्या सरभोंवतणी तशेंच आंगणांत झाडांचो पालो झडलो.
कांय वेळान जसो पावस थांबलो तसो घराचो मालक पालो झाडून उडोवपाक आपली फॅशनेबल सान्न घेवन भायर सरलो. मालकान आंगणांत टायल्सांचेर पडिल्ल्या पाल्याक सान्न मारपाक सुरवात केली, पूण पावसाच्या उदकान फुगून आशिल्लो पालो कसोच मुखार वचना जालो. मालक खूब थकलो. हें सगळें हांव खोंपींत कोनशाक बसून पळयतालें आनी म्हाका खूब खोशी भोगली आनी हांव मुरमुरख्या हांसूंक लागलें.
मालकान आपली फॅशनेबल सान्न थंयच पडवेंत रागान शेवटून उडयली आनी सरळ म्हजे दिकेन येता तें हांवें पळयलें. हांवें मतिंतूच म्हणलें, निमणे हाका म्हजोच आदार जाय पडलो. मालकान म्हाका आंगणांत व्हेलें, सगळो पालो एकठांय करपाक हांवें ताका खूब आदार केलो. उपरांत ताणें म्हाका नळाचेर व्हरून न्हाणयलें आनी आशिल्लें तशें परत वेवस्थीत खोंपींत दवरलें आनी तो भितर गेलो. “पाल्याक फक्त व्हिरा सान्न वापरची पडटा न्हय फॅशनेबल” अशें तो आपले बायलेक सांगता तें हांवें जुस्त आयकलें.
आरे…. व्हिरा सान्न विणप हो एक गोंयचो मोटो वेवसाय. आदल्या काळार सान्न विणून लोक आपलें पोट भरतालें. आधुनीक काaळार ह्या वेवसायाची लज दिसपाक लागल्या. इतलेंच न्हय, तर सान्न वापरपाक लेगीत लज दिसता पूण आतां फक्त पालो झाडून उडोवपाक इतले खातिरूच वापरतात.
गांवांनी खूब कमी प्रमाणांत हो वेवसाय आयज दिसता. आनी तांच्यांनी लेगीत सान्न म्हारग केल्ल्या देखून लोक सान्न घेवपाक वचनात. पूण बाजारांत वचून फॅशनेबल सान्न कितली म्हारग आसल्यार लेगीत विकती घेवन येतात. व्हिरा सानेक मोल ना देखून सवाय मागप हें समाजाचें चिंतप.
व्हीर काडप, तें ताचप उपरांत विणप, बांदपाक सुतलेचो वापर करप अशीं खूब कामां आसतात. व्हिरा सान्न वापरांत दवरल्यारूच आमकां खंय तरी सान्न विणपी दिसतलें. देखून हांव तुमकां सगळ्यांक दर एका म्हज्या भावा-भयण्यांक म्हजो वापर करचो म्हणून मागतां. तशेंच व्हिरा सान्न विणपी वेवसाय सांबाळून दवरपाचो उलो मारतां.
मेल्विटा फर्नांडीस
7776985581
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
