भांगरभूंय | प्रतिनिधी
कुडटरी जिमखानान 50वी कस्टडियो यादस्तीक फुटबॉल सर्त जिखली. फायनलींत ताणें धर्मापूर स्पोर्ट्स क्लबाक 3-1 अशा गोल फरकानी हारयलो. मध्यांतरा मेरेन दोनूय क्लब 1-1 अशे बरोबरींत आशिल्ले. सुरवातीक कुडटरी जिमखाना वतीन जॉव्हेल मार्टिन्सान आनी धर्मापूर स्पोर्ट्स क्लबा वतीन लॅस्ली कोस्तान गोल करपाच्यो संदी वगडायल्यो.
मजगतीं, मॅचीच्या 30व्या मिनटाक अॅफिलियो फर्नांडीसान गोल करून कुडटरी जिमखानाचें खातें उगडलें. पूण, ताची ही आघाडी चड वगत तिगूंक ना. स मिनटां उपरांत फ्रॅंकी ओलिव्हेरान धर्मापूरा वतीन बरोबरीचो गोल केलो.
दुसऱ्या अर्दांत कुडटरी जिमखानान आक्रमक खेळ केलो. ताचो फायदो ताका रोखडोच जालो. बदली खेळगडो जॉय हिलारियोन म्हत्वाचो गोल केलो. उपरांत जेम्स फर्नांडीसान गोल करून कुडटरी जिमखानाचें जैत निश्चीत केलें.
राय स्पोर्टींग क्लबान राय पंचायतीच्या मैदानाचेर सर्तीचें आयोजन केल्लें.
कुडटरी जिमखानाक एक लाखाचें इनाम आनी करंड, जाल्यार धर्मापूर स्पोर्ट्स क्लबाक 70 हजाराचें इनाम आनी करंड फावो जालो.
वैयक्तीक इनामांः अॅफिलियो फर्नांडीस (फायनलींतलो पयलो गोल आनी सर्तींत सगल्यांत चड गोल, कुडटरी जिमखाना), सनी फर्नांडीस (फायनलींतलो उत्कृश्ट गोलकीपर, धर्मापूर स्पोर्ट्स क्लब), मारियो मास्कारेन्हस (फायनलींतलो उत्कृश्ट डिफॅण्डर, कुडटरी जिमखाना), हेडन कार्दोझ (फायनलींतलो उत्कृश्ट मिडफिल्डर, धर्मापूर स्पोर्ट्स क्लब), डॅनील रिबेलो (फायनलींतलो उत्कृश्ट फॉरवर्ड खेळगडो, धर्मापूर स्पोर्ट्स क्लब), पेड्डें बोम स्पोर्ट्स क्लब (शिस्तीचो पंगड).
इनामां भेटवण सुवाळ्याक दक्षीण गोंयचे खासदार फ्रान्सीस सार्दीन, आदले राज्य केंद्रीय मंत्री एद्युआर्द फालेरो, पीसीसी अध्यक्ष अमीत पाटकार आनी अवर लेडी ऑफ स्नॉव्साचे पॅरीस प्रिस्ट फा. जेनुरिओ डीकोस्ता हे उपस्थीत आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
