भांगरभूंय | प्रतिनिधी
भारताच्या एच एस प्रणयान ऑस्ट्रेलियन ओपन बॅडमिंटन सर्तीचे फायनलींत सुवात मेळयली. सेमी फायनलींत ताणें आपल्याच देशाच्या प्रियांशू राजावताक 21-18 आनी 21-12 अशा सरळ गेमींनी हारयलो.
फायनलींत प्रणय चीनाच्या वेंग होंगयांग आड खेळटलो. वेंग हाणें दुसरे सेमी फायनलींत मलेशियाच्या ली जी जिया हाका 21-19, 13-21 आनी 21-13 अशा तीन गेमींनी हारयलो.
प्रणयान अणभवाचो फायदो घेत 43 मिनटांनी मॅच जिखली. राजावत पयले खेपे सुपर 500 सर्तीचे सेमी फायनलींत पाविल्लो. पयले गेमींत ताणें प्रणयाक खर आव्हान दिलें. पूण, दुसरे गेमींत अंदूंची मलेशिया मास्टर्स जिखपी प्रणयान आपल्या अणभवाचो पुर्णपणान फायदो घेत दुसरी गेम सहज जिखली.
प्रणय मलेशिया मास्टर्साचे फायनलींत वेंग हाच्याच आड खेळिल्लो. वेंगाक हारोवन प्रणयान स वर्सांनी आपलो किताब जिखिल्लो. ऑस्ट्रेलियन ओपनांत दोगूय परतून एकामेका आड खेळटलो.
मजगतीं, बायलांच्या एकोड्या गटांतली फायनल दक्षीण कोरियाची किम गा युन आनी अमेरिकेची बेईवेन झांग हांचे मदीं जातली, जाल्यार दादल्यांच्या दोट्टी गटांतली फायनल दक्षीण कोरियाचे कांग मिन ह्युक आनी सेओ सेउंग जे आनी जपानाचे ताकुरो होकी आनी युगो कोबायाशी हे जोडये मदीं जातली. बायलांच्या दोट्टी गटांतली फायनल चीनाचे लिउ चे शिउ आनी तांग निंग आनी दक्षीण कोरियाचे किम सो येओंग आनी कोंग ही योंग हे जोडये मदीं जातली. जाल्यार मिश्र गटांतली फायनल जपानाचे हिरोकी मिडोरिकावा आनी नात्सू सायटो आनी चीनाचे फेंग यान झे आनी हुआंग डोंग पिंग हे जोडये मदीं जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
